(ສພຊ) ວັນທີ 13 ກໍລະກົດ 2018, ທ່ານ ນາງ ສີໃສ ລືເດດມູນສອນ ຮອງປະທານສະພາແຫ່ງຊາດ (ສພຊ), ທ່ານ ນາງ ມະນີວັນ ເຢຍປາວເຮີ ປະທານຄະນະບໍລິຫານງານສະຫະພັນແມ່ຍິງສະພາແຫ່ງຊາດ ພ້ອມດ້ວຍເອື້ອຍນ້ອງແມ່ຍິງຈໍານວນໜຶ່ງ ໄດ້ເຂົ້າຮ່ວມການເຄື່ອນໄຫວສ້າງຂະບວນການຂອງສູນກາງສະຫະພັນແມ່ຍິງລາວ ໃນຫົວຂໍ້ “ແມ່ຍິງກັບການອະນຸລັກວັດທະນະທໍາປີທ່ອງທ່ຽວລາວ, ການຮັກສາສິ່ງແວດລ້ອມສີຂຽວແບບຍືນຍົງ” ເພື່ອຂໍ່ານັບຮັບຕ້ອນວັນສ້າງຕັ້ງສະຫະພັນແມ່ຍິງລາວ ຄົບຮອບ 63 ປີ (20 ກໍລະກົດ 1955-20 ກໍລະກົດ 2018) ທີ່ສູນເຝິກອົບຮົມແມ່ຍິງລາວ ນະຄອນຫລວງວຽງຈັນ ໂດຍການເຂົ້າຮ່ວມຂອງທ່ານ ບຸນຍັງ ວໍລະຈິດ ປະທານປະເທດແຫ່ງ ສປປລາວ ພ້ອມດ້ວຍພັນລະຍາ, ມີທ່ານຮອງນາຍົກລັດຖະມົນຕີ, ການນໍາພັກ-ລັດ, ພະນັກງານປະຕິວັດອາວຸໂສ, ຄອບຄົວການນໍາຜູ້ຊົງຄຸນວຸດທິ, ທູຕານຸທູດ, ອົງການຈັດຕັ້ງສາກົນ, ຄະນະບໍລິຫານງານສູນກາງສະຫະພັນແມ່ຍິງ, ບັນດາກະຊວງອົງການຂັ້ນສູນກາງ, ແຂວງ, ນະ ຄອນຫລວງ, ນັກທຸລະກິດ ແລະ ບໍລິສັດຫ້າງຮ້ານເຂົ້າຮ່ວມ.

ທ່ານ ນາງ ອິນລາວັນ ແກ້ວບຸນພັນ ປະທານຄະນະບໍລິຫານງານສູນກາງສະຫະພັນແມ່ຍິງລາວ ໄດ້ມີຄໍາເຫັນບາງຕອນສໍາຄັນວ່າ: ການສະເຫລີມສະຫລອງວັນສ້າງຕັ້ງສະຫະ ພັນແມ່ຍິງ ໃນປີ 2018 ພາຍໃຕ້ຫົວຂໍ້ “ແມ່ຍິງກັບການອະນຸລັກວັດທະນະທໍາ ສູ່ປີທ່ອງທ່ຽວລາວ, ການຮັກສາສິ່ງແວດລ້ອມສີຂຽວ ແລະ ຍືນຍົງ” ແມ່ນມີຄວາມໝາຍຄວາມສໍາຄັນຫລາຍ ແລະ ຕິດພັນກັບປີທ່ອງທ່ຽວລາວ 2018 ຢ່າງເປັນຂະບວນຟົດຟື້ນ ແລະ ກວ້າງຂວາງ. ຕະຫລອດໄລຍະ 63 ປີຜ່ານມາ ໄດ້ສະແດງໃຫ້ເຫັນເຖິງການເຕີບໃຫຍ່ຂະຫຍາຍຕົວຂອງການຈັດຕັ້ງສະຫະພັນແມ່ຍິງລາວໃນແຕ່ລະໄລຍະ ເຊິ່ງການພັດທະນາແມ່ຍິງນັບມື້ເຕີບໃຫຍ່ເຂັ້ມແຂງຮອບດ້ານ ໄປຄຽງຄູ່ກັບການສົ່ງເສີມ ແລະ ອະນຸລັກວັດທະນະທໍາອັນດີງາມຂອງຊາດ ມູນເຊື້ອ ແລະ ທີ່ເປັນເອກະລັກວັດທະນະທໍາບັນດາເຜົ່າ ເສີມຂະຫຍາຍມູນເຊື້ອ ແລະ ຄຸນຄ່າມໍລະດົກທາງດ້ານວັດທະນະທໍາ ແລະ ຮັກສາຮີດຄອງປະເພນີອັນດີງາມຂອງຊາດໃຫ້ຢູ່ຄູ່ກັບສັງຄົມລາວຕະຫລອດໄປ, ພ້ອມທັງຮັບເອົາຄຸນຄ່າທາງດ້ານວັດທະນະທໍາທີ່ກ້າວໜ້າຂອງມວນມະນຸດຢ່າງມີການເລືອກເຟັ້ນ ແລະ ສອດຄ່ອງກັບຍຸກສະໄໝ ສາມາດເຊື່ອມໂຍງກັບສາກົນ, ປະກອບສ່ວນສະກັດກັ້ນສິ່ງຫຍໍ້ທໍ້ທາງດ້ານວັດທະນະທໍາ, ປັບປຸງ ແລະ ພັດທະນາຜະລິດຕະພັນວັດທະນະທໍາໃຫ້ມີຄວາມຫລາກຫລາຍ ແລະ ມີຄຸນນະພາບ ເພື່ອເສີມຂະຫຍາຍຫົວຄິດປະດິດສ້າງຂອງເອື້ອຍນ້ອງແມ່ຍິງ ເປັນຕົ້ນ: ໃນການຜະລິດກະສິກໍາ, ຫັດຖະກໍາທີ່ຕິດພັນກັບການດໍາລົງຊີວິດ, ການພົວພັນໃນຄອບຄົວ ແລະ ສັງຄົມ.

ໃນພິທີຄັ້ງນີ້, ໄດ້ສະແດງຂະບວນແຫ່ທີ່ສ່ອງແສງໃຫ້ເຫັນເຖິງວິຖີຊີວິດຂອງຄົນລາວໃນການທໍາມາຫາກິນ, ການຮ່ວມມືທະຫານກັບປະຊາຊົນ ແລະ ການນຸ່ງຖືແບບປະຍຸກຕາມຍຸກສະໄໝໃໝ່ ປະກອບມີ 5 ກ້ອນ, ຢ້ຽມຊົມຫໍມູນເຊື້ອແມ່ຍິງລາວ, ມີການວາງສະ ແດງຕະຫລາດນັດແບບພື້ນບ້ານ (ຫລື ເອີ້ນວ່າ: ໂລະລາດ) ທີ່ນໍາໃຊ້ວັດຖຸອຸປະກອນຈາກທໍາມະຊາດ ເພື່ອເປັນການປະກອບສ່ວນຮັກສາສິ່ງແວດລ້ອມຕາມທິດສີຂຽວ ແລະ ຍືນຍົງ, ນອກຈາກນີ້ ຍັງມີການແຂ່ງຂັນຝັດເຂົ້າ, ການຫໍ່ເຂົ້າຕົ້ມ, ຫຍີບໝາກເບັງ, ພຽນຫລອດ ແລະ ແຂ່ງຂັນກິລາອື່ນໆແບບພື້ນບ້ານ; ທັງໝົດທີ່ກ່າວມານີ້ ແມ່ນສ່ວນໜຶ່ງທີ່ສະແດງໃຫ້ເຫັນເຖິງການປະກອບສ່ວນຂອງແມ່ຍິງເຂົ້າໃນວຽກງານລວມ, ທັງເປັນການຢັ້ງຢືນຄືນອີກເທື່ອໜຶ່ງເຖິງການເຕີບໃຫຍ່ຂະຫຍາຍຕົວຂອງອົງການຈັດຕັ້ງສະຫະພັນແມ່ ຍິງລາວ ແລະ ຂະບວນການຂອງແມ່ຍິງທີ່ໄດ້ຄຽງບ່າຄຽງໄຫລ່ກັບເພດຊາຍ ໃນການປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໄປຄຽງຄູ່ກັບການປົກປັກຮັກສາ ແລະ ເສີມຂະຫຍາຍມູນເຊື້ອວັດທະນະທໍາອັນດີງາມຂອງຊາດ ເຊິ່ງກໍຄືການຮັກສາໄດ້ຄຸນລັກສະນະທີ່ເປັນມູນເຊື້ອຂອງແມ່ຍິງລາວ; ພ້ອມນີ້ ຍັງມີບໍລິການກວດ ແລະ ໃຫ້ຄໍາປຶກສາດ້ານສຸຂະພາບແບບບໍ່ເສຍຄ່າໃຫ້ພໍ່ແມ່ປະຊາຊົນໃນງານຕື່ມອີກ.

(ສອນສັກ ວັນວິໄຊ)