(ສພຊ) ໃນລະຫວ່າງວັນທີ 16-19 ສິງຫາ 2021, ທ່ານ ຄຳໃບ ດຳລັດ ຮອງປະທານສະພາແຫ່ງຊາດ (ສພຊ) ພ້ອມດ້ວຍຄະນະ ໄດ້ເຄື່ອນໄຫວຢ້ຽມຍາມ ແລະ ເຮັດວຽກຢູ່ ແຂວງຫົວພັນ ແລະ ໄຊສົມບູນ; ໂດຍການຕ້ອນຮັບຈາກການນຳຂອງແຂວງ, ການນຳຂອງສະພາປະຊາຊົນແຂວງ (ສພຂ) ແລະ ພາກສ່ວນກ່ຽວຂ້ອງ.
ໃນການເຄື່ອນໄຫວຢູ່ແຕ່ລະແຂວງ, ທ່ານ ຄຳໃບ ດຳລັດ ພ້ອມດ້ວຍຄະນະ ໄດ້ພົບປະ ແລະ ເຮັດວຽກກັບທ່ານເຈົ້າແຂວງ; ໄດ້ເຮັດວຽກກັບ ສພຂ ແລະ ເຂົ້າຮ່ວມພິທີປະກາດການສ້າງຕັ້ງກົງຈັກ ແລະ ແຕ່ງຕັ້ງປະທານ, ຮອງປະທານຄະນະສະມາຊິກສະພາແຫ່ງຊາດ (ຄສຊ) ປະຈຳເຂດເລືອກຕັ້ງທີ 8 ແຂວງຫົວພັນ ແລະ ປະຈຳເຂດເລືອກຕັ້ງທີ 18 ແຂວງໄຊສົມບູນ ໂດຍໄດ້ມອບມະຕິໃຫ້ຜູ້ທີ່ໄດ້ຮັບການແຕ່ງຕັ້ງ ຄື: ທ່ານ ນາງ ອຳໄພວອນ ລ້ອມບຸນແພງ ເປັນປະທານ, ທ່ານ ຄອນປະພັນ ເລືອງສີຈັນທອງ ເປັນຮອງປະທານ ຄສຊ ຊຸດທີ IX ປະຈຳເຂດເລືອກຕັ້ງທີ 8 ແລະ ທ່ານ ແດງ ປະທຸມທອງ ເປັນປະທານ, ທ່ານ ພັທ. ວິໄຊທໍ່ ເພຍຫລວງຈົ່ງເສີ ເປັນຮອງປະທານ ຄສຊ ຊຸດທີ IX ປະຈຳເຂດເລືອກຕັ້ງທີ 18. ພ້ອມດຽວກັນນີ້, ຍັງໄດ້ຮັບຟັງລາຍງານຫຍໍ້ການເຄື່ອນໄຫວວຽກງານຂອງ ຄສຊ ຊຸດທີ VIII ແລະ ແຜນການເຄື່ອນໄຫວວຽກງານ 5 ປີ ແລະ ວຽກງານຈຸດສຸມ ປະຈໍາປີ ຂອງ ຄສຊ ຊຸດທີ IX ປະຈຳເຂດເລືອກຕັ້ງທີ 8 ແລະ 18 ເຊິ່ງເຫັນໄດ້ຜົນສຳເລັດຫລາຍດ້ານທີ່ເປັນຜົນງານອັນໂດດເດັ່ນ ແລະ ຂໍ້ຄົງຄ້າງບາງດ້ານທີ່ຈະໄດ້ສືບຕໍ່ປັບປຸງແກ້ໄຂ.
ໂອກາດດັ່ງກ່າວ, ທ່ານ ຄຳໃບ ດຳລັດ ໄດ້ມີຄຳເຫັນໂອ້ລົມຕໍ່ທີ່ປະຊຸມ ເຊິ່ງໄດ້ເນັ້ນໜັກບາງບັນຫາຕໍ່ວຽກງານຂອງ ຄສຊ ວ່າ: ເນື່ອງຈາກປະທານ, ຮອງປະທານ ຄສຊ ປະຈຳເຂດເລືອກຕັ້ງ ແມ່ນຜູ້ດຽວກັນກັບປະທານ, ຮອງປະທານ ສພຂ; ສະນັ້ນ, ຕ້ອງແຍກອອກຢ່າງຈະແຈ້ງ ລະຫວ່າງພາລະບົດບາດການນໍາພາ-ຊີ້ນຳວຽກງານຂອງ ຄສຊ ປະຈໍາເຂດເລືອກຕັ້ງ ກັບ ສພຂ, ສິດ ແລະ ໜ້າທີ່ແຕ່ລະດ້ານ ບໍ່ໃຫ້ສັບສົນ ແລະ ປົນເປກັນ, ຕ້ອງເຂົ້າໃຈວ່າ ຄສຊ ປະຈໍາເຂດເລືອກຕັ້ງ ແມ່ນເສນາທິການໃຫ້ແກ່ຄະນະປະຈຳສະພາແຫ່ງຊາດ ຕ້ອງເຄື່ອນໄຫວໄປຕາມກົດໝາຍວ່າດ້ວຍສະພາແຫ່ງຊາດ ເຊິ່ງປະກອບມີ 3 ພາລະບົດບາດຕົ້ນຕໍ ເມື່ອສະພາແຫ່ງຊາດ ກໍຄືຄະນະປະຈຳສະພາແຫ່ງຊາດ ກຳນົດແຜນການອອກຄືແນວໃດ ກໍຕ້ອງໄດ້ນໍາມາຜັນຂະຫຍາຍອອກຕາມຄວາມຮັບຜິດຊອບຂອງຕົນ, ຄສຊ ປະຈໍາເຂດເລືອກຕັ້ງ ຕ້ອງກຳນົດແຜນການເຄື່ອນໄຫວເປັນແຕ່ລະໄລຍະ, ຕ້ອງໄດ້ເຮັດເປັນປົກກະຕິ ການກຳນົດແຜນແລ້ວກໍຕ້ອງຈັດຕັ້ງປະຕິບັດເຄື່ອນໄຫວຕາມແຜນການທີ່ວາງໄວ້, ຜ່ານການເຄື່ອນໄຫວໃນແຕ່ລະໄລຍະ ກໍສະຫລຸບລາຍງານຂັ້ນເທິງຕາມລະບຽບການ; ສາຍຕັ້ງຕ້ອງລາຍງານ ຕໍ່ຄະນະປະຈຳສະພາແຫ່ງຊາດ, ສາຍຂວາງ ຕ້ອງລາຍງານຕໍ່ຄະນະປະຈຳພັກແຂວງ. ນອກນັ້ນ, ການກຳນົດວຽກງານໃນແຜນການນັ້ນ ສຳຄັນຕ້ອງອີງໃສ່ແຜນການເຄື່ອນໄຫວຂອງສະພາແຫ່ງຊາດ, ຄະນະປະຈໍາສະພາແຫ່ງຊາດ ກໍຄືອົງຄະນະພັກແຂວງວາງອອກ ແລະ ອື່ນໆ.
ການເຄື່ອນໄຫວຄັ້ງນີ້ ທ່ານຮອງປະທານ ສພຊ ພ້ອມດ້ວຍຄະນະ ຍັງໄດ້ນຳເອົາຜ້າອັດປາກ-ດັງ ມອບໃຫ້ ສພຂ ຫົວພັນ ແລະ ໄຊສົມບູນ ເພື່ອປະກອບເຂົ້າໃນວຽກງານການປ້ອງກັນ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ອີກດ້ວຍ.
(ນາງ ປາກາລັກ ພົມມີໄຊ)