(ສພຊ) ວັນທີ 25 ຕຸລາຜ່ານມາ, ທ່ານ ພົທ. ແສງນວນ ໄຊຍະລາດ ຮອງປະທານສະພາແຫ່ງຊາດ ໄດ້ຢ້ຽມຢາມກອງພັນທະຫານຮາບທີ 9 ກອງພົນທີ 4 ແຂວງສະຫວັນນະເຂດ ໂດຍການຕ້ອນຮັບຂອງທ່ານ ພັອ. ວັນຍໍ ລິດຊົມພູ ຜູ້ບັນຊາການກອງພົນທະຫານຮາບທີ 4; ມີທ່ານ ບຸນເຕັມ ຊ່ວງສາຍະວົງ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 13 ແຂວງສະຫວັນນະເຂດ, ສະມະຊິກສະພາປະຊາຊົນແຂວງປະຈຳເມືອງ ພ້ອມດ້ວຍນາຍ ແລະ ພົນທະຫານພາຍໃນກົມກອງເຂົ້າຮ່ວມຢ່າງພ້ອມພຽງ; ທັງນີ້, ເພື່ອເປັນການຢ້ຽມຢາມ ແລະ ສະແດງຄວາມເປັນຫ່ວງເປັນໃຍຈາກພັກ, ລັດຖະບານ ກໍຄືສະພາແຫ່ງຊາດ ທີ່ມີຕໍ່ນາຍ ແລະ ພົນທະຫານ ແລະ ທັງເປັນການຍ້ອງຍໍຊົມເຊີຍວັນສ້າງຕັ້ງກອງພົນຄົບຮອບ 37 ປີ ແລະ ກອງປະຊຸມໃຫຍ່ຄັ້ງທີ 6 ຂອງຄະນະພັກກອງພົນທີ່ຈະເປີດຂຶ້ນໃນມໍ່ໆນີ້.

ໃນການເຄື່ອນໄຫວຄັ້ງນີ້,​ ຜູ້ເຂົ້າຮ່ວມໄດ້ຮັບຟັງບົດລາຍງານການເຄື່ອນໄຫວວຽກງານ ໃນໄລຍະຜ່ານມາ ຂອງກອງພັນດັ່ງກ່າວ ເຊິ່ງມີທັງຂໍ້ສະດວກ, ຂໍ້ຫຍຸ້ງຍາກ ແລະ ບັນຫາທີ່ຈະຕ້ອງໄດ້ປັບປຸງແກ້ໄຂ; ພ້ອມນັ້ນ, ຍັງໄດ້ຮັບຟັງການໂອ້ລົມຈາກທ່ານ ພົທ. ແສງນວນ ໄຊຍະລາດ ເຊິ່ງທ່ານໄດ້ສະແດງຄວາມຍ້ອງຍໍຊົມເຊີຍຕໍ່ການເຄື່ອນໄຫວໜ້າທີ່ວຽກງານຂອງກອງພັນ ໃນໄລຍະຜ່ານມາ; ພ້ອມທັງເນັ້ນໃຫ້ເອົາໃຈໃສ່ເພີ່ມທະວີການສຶກສາອົບຮົມການເມືອງ-ແນວຄິດ ໃຫ້ແກ່ນາຍ ແລະ ພົນທະຫານພາຍໃນກົມກອງຂອງຕົນໃຫ້ໜັກແໜ້ນ ໂດຍເລັ່ງໃສ່ບັນດາສະມາຊິກພັກ, ນັກຮົບມີຄວາມເຊື່ອໝັ້ນຕໍ່ພັກ ຕໍ່ການນຳພາ, ມີຄວາມຊື່ສັດບໍລິສຸດ, ຈົງຮັກພັກດີ, ມີຄວາມອົດທົນເສຍສະຫລະ, ມີຄຸນສົມບັດສິນທຳປະຕິວັດ, ມີຈັນຍາທຳ-ຈັນຍາບັນ ໃຫ້ສົມເປັນກອງທັບຂອງປະຊາຊົນ ເກີດມາຈາກປະຊາຊົນ ສູ້ຮົບເພື່ອປະຊາຊົນ ເສຍສະຫລະອົດທົນເພື່ອປະຊາຊົນ; ເອົາໃຈໃສ່ຍົກສູງຄວາມຮູ້ຄວາມສາມາດດ້ານວິຊາສະເພາະໃຫ້ສູງຂຶ້ນ ຕ້ອງໄດ້ສຶກສາຄົ້ນຄວ້າທິດສະດີໄປຄຽງຄູ່ກັບການເຝິກແອບຕົວຈິງ ເພື່ອຕອບສະໜອງຕາມຄວາມຮຽກຮ້ອງຂອງພັກຂອງຊາດ; ເອົາໃຈໃສ່ເພີ່ມທະວີວຽກງານການຫັນລົງກໍ່ສ້າງຮາກຖານການເມືອງ ຕິດພັນກັບມູນເຊື້ອອັນດີງາມຂອງຊາດ ໃນການຊ່ວຍເຫລືອເຊິ່ງກັນ ແລະ ກັນ ເພື່ອສ້າງຄວາມເຊື່ອຖື ແລະ ເຊື່ອໝັ້ນຕໍ່ການນຳພາຂອງພັກ; ເອົາໃຈໃສ່ວຽກງານພາລາທິການເຕັກນິກໃຫ້ມີຄວາມເຂັ້ມແຂງ ແລະ ສ້າງຊີວິດການເປັນຢູ່ພາຍໃນກົມກອງໃຫ້ດີຂຶ້ນ ດ້ວຍການເພິ່ງຕົນເອງ ກຸ້ມຕົນເອງ ສ້າງຄວາມເຂັ້ມແຂງດ້ວຍຕົນເອງ; ເພີ່ມທະວີການປັບປຸງກໍ່ສ້າງພັກ-ກໍ່ສ້າງພະນັກງານ, ວຽກງານອົງການຈັດຕັ້ງມະຫາຊົນໃຫ້ມີຄວາມເຂັ້ມແຂງ.

ໂອກາດດຽວກັນ, ທ່ານຮອງປະທານສະພາແຫ່ງຊາດ ຍັງໄດ້ນໍາເອົາຄອມພິວເຕີ ພ້ອມເຄື່ອງພິມ ຈຳນວນ 1 ຊຸດ ແລະ ເຄື່ອງບໍລິໂພກຈຳນວນໜຶ່ງໃຫ້ແກ່ກົມກອງດັ່ງກ່າວ; ໂດຍການກ່າວຮັບຂອງທ່ານ ພັອ. ວັນຍໍ ລິດຊົມພູ ເຊິ່ງທ່ານໄດ້ສະແດງຄວາມຮູ້ບຸນຄຸນຕໍ່ຄວາມເປັນຫ່ວງເປັນໃຍດັ່ງກ່າວ ແລະ ໃຫ້ຄຳໝັ້ນສັນຍາວ່າຈະນຳໃຊ້ເຄື່ອງດັ່ງກ່າວເຂົ້າໃນວຽກງານໃຫ້ນັບມື້ນັບໄດ້ຮັບຜົນດີຂຶ້ນເລື້ອຍໆ.