ເພື່ອຮັບປະກັນໃນການປະຕິບັດພາລະບົດບາດ ໃນການ ຕິດຕາມກວດກາ, ຊຸກຍູ້ ແລະ ຈັດຕັ້ງຜັນຂະຫຍາຍມະຕິ ຂອງກອງ ສະໄໝສາມັນ ເທື່ອທີ 4 ແລະ ເທື່ອທີ 5 ສະພາແຫ່ງຊາດ ແລະ ສະພາປະຊາຊົນແຂວງຫົວພັນ ຢູ່ບັນດາອົງການຈັດຕັ້ງລັດ ແລະ ບັນດາບ້ານ ໃຫ້ໄດ້ຮັບຜົນສຳເລັດເລັດ ຕາມລະດັບຄາດໝາຍທີ່ວາງໄວ້

          ວັນທີ 17 – 20 ຕຸລາ 2023 ຜ່ານມານີ້, ທ່ານ ສົມສັກ ດອນຈານິດ ຮອງປະທານ ສະພາປະຊາຊົນ ແຂວງຫົວພັນ ພ້ອມດ້ວຍຄະນະທີມງານໄດ້ລົງຊຸກຍູ້ຕິດຕາມກວດກາ ການຈັດຕັ້ງປະຕິບັດມະຕິກອງປະຊຸມສະໄໝສາມັນ ເທື່ອທີ 4 ແລະ ເທື່ອທີ 5 ຂອງສະພາແຫ່ງຊາດ ແລະ ສະພາປະຊາຊົນ ແຂວງຫົວພັນ ຢູ່ເມືອງແອດ ທັງໝົດ 4 ຈຸດ ຄື: ຈຸດ ເທດສະບານເມືອງ, ບ້ານລູ້, ບ້ານແຈຝາຍ ແລະ ດ່ານບ້ານດ່ານ ໃນການລົງເຮັດວຽກໃນຄັ້ງນີ້ ເປັນການເກັບກຳຂໍ້ມູນໃຫ້ ສະມາຊິກສະພາແຫ່ງຊາດ ປະຈຳເຂດເລືອກຕັ້ງ ແລະ ສະມາຊິກສະພາປະຊາຊົນແຂວງ ໃນນາມເປັນຕົວແທນແຫ່ງສິດ ແລະ ຜົນປະໂຫຍດ ຂອງປະຊາຊົນບັນດາເຜົ່າ ໃນການປະຕິບັດພາລະບົດບາດ, ພິຈາລະນາ ແລະ ຕົກລົງບັນຫາສຳຄັນພື້ນຖານຂອງທ້ອງຖິ່ນ ແລະ ເປັນການຕິດຕາມ  ກວດກາ ບັນດາມະຕິ ຂອງກອງປະຊຸມສະພາແຫ່ງຊາດ ແລະ ສະພາປະຊາຊົນແຂວງທີ່ຮັບຮອງໄປແລ້ວນັ້ນ, ພ້ອມທັງເປັນການເກັບກຳຂໍ້ມູນ ດ້ານເນື້ອໃນຕ່າງໆ ເພື່ອຮັບໃຊ້ໃຫ້ແກ່ການເຂົ້າຮ່ວມ ກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ແລະ ສະພາປະຊາຊົນແຂວງ ທີ່ຈະໄດ້ໄຂຂື້ນໃນທ້າຍປີ 2023 ນີ້. ໂອກາດລົງເຮັດວຽກຄັ້ງນີ້ທາງທີມງານ ຍັງໄດ້ລົງຊຸກຍູ້ຕິດຕາມ ຊົນລະປະທານ ນາທົ່ງ ບ້ານຫີນຄູນ ທີ່ໄດ້ຮັບຜົນກະທົບຈາກໄພພິບັດໃນລະດູຝົນ, ໂຄງການລ້ຽງໝູ ຂອງບໍລິສັດຊວນເຮືອງ ແລະ ຢ້ຽມຢາມກຸ່ມຫັດຖະກຳເຄື່ອງປັ້ນດິນເຜົາ ສິນຄ້າໜຶ່ງເມືອງ ໜຶ່ງຜະລິດຕະພັນແຫ່ງຊາດ ຢູ່ບ້ານລູ້ ຕື່ມອີກ.

ພາບ ແລະ ຂ່າວ: ສພຂ ຫົວພັນ