ວັນທີ 11 ມີນາ 2024 ທ່ານ ນາງ ບັງອອນ ໄຊຍະສິດ ກຳມະການປະຈໍາພັກແຂວງ ຮອງປະທານຄະນະສະມາຊິກສະພາຊາດປະຈໍາເຂດເລືອກຕັ້ງທີ 12 ແຂວງຄໍາມ່ວນ ( ຄສຊຂ12) ຮອງປະທານສະພາປະຊາຊົນແຂວງຄໍາມ່ວນ ແລະ ທ່ານ ອິນທະວົງ ພົມມະຈັນ ຮອງເລຂາພັກເມືອງ ປະທານກວດກາພັກ-ລັດເມືອງ ທັງເປັນຫົວໜ້າຄະນະສະມາຊິກສະພາປະຊາຊົນຂັ້ນແຂວງປະຈໍາເຂດເລືອກຕັ້ງເມືອງມະຫາໄຊ ແຂວງຄໍາມ່ວນ ໄດ້ເຄື່ອນໄຫວໄປພົບປະຜູ້ມີສິດເລືອກຕັ້ງ ເພື່ອເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ (ສພຊ) ຊຸດທີ IX ແລະ ສະພາປະຊາຊົນແຂວງຄໍາມ່ວນ ຊຸດທີ II ຢູ່ 2 ຈຸດ ຄື: ຫ້ອງວ່າການປົກຄອງເມືອງມະຫາໄຊ ແລະ ບ້ານນາກະທ້າງທົ່ງ ໂດຍມີ ທ່ານ ສົມບູນ ແກ້ວວົງສາ ເຈົ້າເມືອງມະຫາໄຊ ພ້ອມດ້ວຍບັນດາທ່ານໃນຄະນະປະຈໍາພັກເມືອງ, ກຳມະການພັກເມືອງ, ກຳລັງປ້ອງກັນ ຊາດ-ປ້ອງກັນຄວາມສະຫງົບ (ປກຊ-ປກສ), ພະນັກງານຫຼັກແຫ່ງຂອງເມືອງ, ອຳນາດການປົກຄອງບ້ານ ແລະ ພໍ່ແມ່ປະ ຊາຊົນບັນດາເຜົ່າເຂົ້າຮ່ວມ 324 ເທື່ອຄົນ, ຍິງ 160 ເທື່ອຄົນ.
ໃນວາລະຂອງການຈັດຕັ້ງເຜີຍແຜ່ຜົນສຳເລັດ ກອງປະຊຸມສະພາໃນຄັ້ງນີ້ ໄດ້ຮັບຟັງການລາຍງານໂດຍສັງເຂບຂອງເມືອງ ແລະ ບ້ານ ກ່ຽວກັບສະພາບທີ່ຕັ້ງ ແລະ ຈຸດພິເສດ, ມີດ້ານການເມືອງ-ແນວຄິດ, ວຽກງານປ້ອງກັນຊາດ-ປ້ອງກັນຄວາມສະຫງົບ, ການພັດທະນາເສດຖະກິດ-ສັງຄົມ ແລະ ທິດທາງແຜນການຈັດຕັ້ງປະຕິບັດວຽກງານໃນຕໍ່ໜ້າ, ເຊິ່ງເຫັນໄດ້ດ້ານຈັດຕັ້ງປະຕິບັດມີທັງຂໍ້ສະດວກ ແລະ ຂໍ້ຄົງຄ້າງ, ມີວຽກງານຈຸດສຸມໃນຕໍ່ໜ້າທີ່ຈະຕ້ອງໃຫ້ສຳເລັດ. ພ້ອມນັ້ນ, ກອງປະຊຸມໄດ້ຮັບຟັງຄຳຄິດ-ຄຳເຫັນ ແລະ ຄຳສະເໜີ ເປັນຕົ້ນດ້ານການກໍ່ສ້າງພື້ນຖານໂຄງລ່າງຂອງເມືອງ. ຈາກນັ້ນ, ທ່ານ ນາງ ບັງອອນ ໄຊຍະສິດ ຮອງປະທານ (ຄສຊຂ 12) ແຂວງຄໍາມ່ວນ ໄດ້ເຜີຍແຜ່ໃຫ້ຜູ້ມີສິດເລືອກຕັ້ງຊາບຕໍ່ບັນດາເອກະສານສຳ ຄັນທີ່ກອງປະຊຸມສະໄໝສາມັນ ເທື່ອທີ 6 ໄດ້ພິຈາລະນາ ແລະ ຮັບຮອງເອົາ ເປັນຕົ້ນແມ່ນບົດລາຍງານໂດຍສັງເຂບຂອງລັດຖະບານກ່ຽວກັບສະພາບການເຄື່ອນໄຫວປະຕິບັດແຜນພັດທະນາເສດຖະກິດ-ສັງຄົມທີ່ພົ້ນເດັ່ນໄລຍະກາງສະໄໝ 5 ປີ (2021-2023) ແລະ ທິດທາງແຜນການທ້າຍສະໄໝຮອດປີ 2025, ການເຄື່ອນໄຫວປະຈຳປີ 2023 ແລະ ທິດທາງແຜນການປະຈໍາປີ 2024; ບົດລາຍງານການ ຈັດຕັ້ງປະຕິບັດແຜນການເຄື່ອນໄຫວວຽກງານກາງສະໄໝ 5 ປີ (2021-2023) ແລະ ທິດທາງແຜນການຮອດປີ 2025 ການຈັດຕັ້ງປະຕິບັດແຜນການປະຈຳປີ 2003 ແລະ ທິດທາງແຜນການປີ 2024 ຂອງອົງການກວດກາແຫ່ງລັດ, ອົງການກວດສອບແຫ່ງລັດ, ສານປະຊາຊົນສູງສຸດ, ອົງການໄອຍະການປະຊາຊົນສູງສຸດ, ຂອງສະພາແຫ່ງຊາດ, ການສ້າງ ແລະ ປັບປຸງກົດໝາຍ ທັງ 7 ສະບັບ ແລະ ການປະເມີນຄວາມໄວ້ວາງໃຈໃນການປະຕິ ບັດໜ້າທີ່ຂອງບຸກຄະລາກອນທີ່ສະພາແຫ່ງຊາດເລືອກຕັ້ງ ແລະ ຮັບຮອງເອົາການເລືອກຕັ້ງ ຈຳນວນ 67 ທ່ານ, ພ້ອມດຽວກັນນີ້, ທ່ານ ອິນທະວົງ ພົມມະຈັນ ຫົວໜ້າຄະນະສະມາຊິກສະພາປະຊາຊົນຂັ້ນແຂວງປະຈໍາເຂດເລືອກຕັ້ງເມືອງມະຫາໄຊ ແຂວງຄໍາມ່ວນ ຍັງໄດ້ຍົກໃຫ້ເຫັນຜົນສຳເລັດກອງປະຊຸມສະໄໝສາມັນເທື່ອທີ 6 ສະພາປະຊາຊົນຄໍາມ່ວນ ຊຸດທີ II.
ໂດຍ: ເອື້ອ ມະໂນສິງ