(ສພຂ) – ທ່ານ ປອ. ເກດແກ້ວ ສີຫາລາດ ຮອງປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ (ກສຕສ) ພ້ອມດ້ວຍຄະນະ ໄດ້ເຄື່ອນໄຫວຕິດຕາມກວດກາການຈັດຕັ້ງປະຕິບັດໂຄງການກໍ່ສ້າງ, ບູລະ ນະສ້ອມແປງເສັ້ນທາງ ແລະ ການພັດທະນາຂະຫຍາຍພື້ນຖານໂຄງລ່າງທີ່ຈຳເປັນເຊື່ອມຈອດເຂົ້າສູ່ແລວທາງເສດຖະ ກິດ ຢູ່ແຂວງໄຊສົມບູນ ເມື່ອວັນທີ 20 ກັນຍາຜ່ານມາ ໂດຍໄດ້ຈັດກອງປະຊຸມເພື່ອຕິດຕາມກວດກາວຽກງານດັ່ງກ່າວ ທີ່ຫ້ອງປະຊຸມສະພາປະຊາຊົນແຂວງ (ສພຂ) ພາຍໃຕ້ການເປັນປະທານຂອງທ່ານຮອງປະທານ ກສຕສ ໂດຍມີທ່ານ ຄຳພູທອນ ວົງພະຈັນ ຮອງປະທານ ສພຂ ພ້ອມດ້ວຍບັນດາພະແນກການ ແລະ ພາກສ່ວນທີ່ກ່ຽວຂ້ອງຂອງແຂວງ, ຜູ້ປະກອບການຂົນສົ່ງ ເຂົ້າຮ່ວມຢ່າງພ້ອມພຽງ.

ທ່ານ ປອ. ເກດແກ້ວ ສີຫາລາດ ໄດ້ມີຄຳເຫັນ ແລະ ຄຳຖາມເຈາະຈີ້ມກ່ຽວກັບການຈັດຕັ້ງປະຕິບັດວຽກງານດັ່ງກ່າວ ເພື່ອຕິດຕາມກວດກາ, ເກັບກຳຂໍ້ມູນຕົວຈິງໃນການຈັດຕັ້ງປະຕິບັດງົບປະມານລົງທຶນປີ 2024 ເຂົ້າໃນການກໍ່ສ້າງ ແລະ ສ້ອມແປງບັນດາໂຄງການພັດທະນາພື້ນຖານໂຄງລ່າງທີ່ຈໍາເປັນ ເປັນຕົ້ນ: ດ່ານສາກົນ, ເສັ້ນທາງ, ຂົວຕາມບັນດາເສັ້ນທາງສາຍຫຼັກຢູ່ທ້ອງຖິ່ນຕ່າງໆ ໃນການເຊື່ອມຈອດກັບພາກພື້ນ ແລະ ການອໍານວຍຄວາມສະດວກດ້ານການຂົນສົ່ງສິນຄ້າ ແລະ ໂດຍສານ ພ້ອມທັງຮອງຮັບໃຫ້ແກ່ການເປີດປີທ່ອງທ່ຽວລາວ ປີ 2024; ນອກນີ້ ກໍເພື່ອເກັບກຳຂໍ້ມູນຕົວຈິງຕໍ່ການຮ້ອງທຸກຂອງສະມາຄົມລົດຂົນສົ່ງພາຍໃນ ທີ່ມີຜົນກະທົບຕໍ່ການດໍາເນີນກິດຈະການ ແລະ ຕິດຕາມສະພາບຕົວຈິງຂອງລົດຂົນສົ່ງຕ່າງປະເທດທີ່ມາດໍາເນີນການຂົນສົ່ງຢູ່ແຕ່ລະທ້ອງຖິ່ນ ກໍຄືແຂວງໄຊສົມບູນ ເພື່ອຊອກໃຫ້ເຫັນດ້ານດີທີ່ຄວນເສີມຂະຫຍາຍ, ຊຸກຍູ້ສົ່ງເສີມ ແລະ ດ້ານອ່ອນ, ຂໍ້ຄົງຄ້າງ ທີ່ຈະຕ້ອງຊອກຫາວິທີການແກ້ໄຂ ແນໃສ່ເຮັດໃຫ້ພາກສ່ວນກ່ຽວຂ້ອງ ຈັດຕັ້ງປະຕິບັດໃຫ້ຖືກຕ້ອງຕາມກົດໝາຍ, ສອດຄ່ອງກັບແຜນພັດທະນາເສດຖະກິດ-ສັງ ຄົມແຕ່ລະໄລຍະ ເພື່ອເປັນຂໍ້ມູນສັງລວມລາຍງານຕໍ່ຄະນະປະຈຳສະພາແຫ່ງຊາດ. ພ້ອມກັນນັ້ນ, ຍັງໄດ້ຮັບຟັງການລາຍງານຈາກພາກສ່ວນທີ່ກ່ຽວຂ້ອງຂອງແຂວງ ກ່ຽວກັບສະພາບການຈັດຕັ້ງປະຕິບັດການກໍ່ສ້າງ, ບູລະນະສ້ອມແປງເສັ້ນທາງ ແລະ ການພັດທະນາຂະຫຍາຍພື້ນຖານໂຄງລ່າງທີ່ຈຳເປັນເຊື່ອມຈອດເຂົ້າສູ່ແລວທາງເສດຖະກິດ, ການຄຸ້ມຄອງການຂົນສົ່ງສິນຄ້າ ແລະ ແຮ່ທາດ, ການຊຳລະງົບປະມານໃຫ້ແກ່ໂຄງການກໍ່ສ້າງ ແລະ ການເກັບລາຍຮັບຈາກການຂົນສົ່ງສິນຄ້າ ແລະ ແຮ່ທາດ (ຕາມຄໍາຖາມເຈາະຈີ້ມ).

ຫຼັງຈາກນັ້ນ, ກໍໄດ້ພ້ອມກັນລົງພາກສະໜາມເພື່ອເກັບກຳຂໍ້ມູນຢ່າງລະອຽດ ພ້ອມທັງຕິດຕາມກວດກາພື້ນທີ່ຕົວຈິງ ເປັນຕົ້ນ: ເສັ້ນທາງ 5B ແຕ່ 3 ແຍກເທດສະບານແຂວງ ຫາ ບ້ານວຽງທອງ ເມືອງທ່າໂທມ, ເສັ້ນທາງແຕ່ເຕ່ຼຍເບ່ ເມືອງອະນຸວົງ ຫາ ບ້ານນໍ້າຊານ ແລະ ເສັ້ນທາງແຕ່ຂົວນໍ້າຍອນ ຫາ ບ້ານນໍ້າຜາໃຫຍ່ ເມືອງລ້ອງແຈ້ງ.

(ນາງ ອໍາໄພພອນ ແກ້ວວິໄລ)