(ສພຊ) ໃນຕອນເຊົ້າຂອງວັນພະຫັດທີ 8 ກຸມພາ 2024 ທີ່ສະພາແຫ່ງຊາດ, ທ່ານ ທັນຕາ ກອງຜາລີ ຮອງປະ ທານກໍາມາທິການແຜນການ, ການເງິນ ແລະ ການກວດສອບ (ກຜງສ), ສະພາແຫ່ງຊາດລາວ ພົບປະ ແລະ ເຮັດວຽກກັບທ່ານ Andreas Larem ສະມາຊິກລັດຖະສະພາ ແຫ່ງ ສາທາລະນະລັດ ສະຫະພັນເຢຍລະມັນ ໃນໂອກາດມາຢ້ຽມຢາມ ແລະ ເຮັດວຽກ ຢູ່ ສປປລາວ.
ທ່ານ ທັນຕາ ກອງຜາລີ ໄດ້ສະແດງຄວາມຕ້ອນຮັບຢ່າງອົບອຸ່ນ ພ້ອມທັງຕີລາຄາສູງຕໍ່ການພົບປະຄັ້ງນີ້ ເຊິ່ງຈະເປັນໂອກາດດີທີ່ຈະໄດ້ປຶກສາຫາລື ແລະ ຊຸກຍູ້ເສີມຂະຫຍາຍສາຍພົວພັນມິດຕະພາບທີ່ມີມາແຕ່ດົນນານ ແລະ ການຮ່ວມມືທີ່ມີໝາກຜົນລະຫວ່າງ ສປປລາວ ກັບ ສສ ເຢຍລະມັນ ເວົ້າລວມ, ເວົ້າສະເພາະການພົວພັນຮ່ວມມື ລະຫວ່າງລັດຖະສະພາຂອງສອງປະເທດ ໃຫ້ໄດ້ຮັບການພັດທະນາ ແລະ ຂະຫຍາຍຕົວຍິ່ງໆຂຶ້ນຢ່າງຕໍ່ເນື່ອງ; ສອງປະເທດໄດ້ມີການແລກປ່ຽນການຢ້ຽມຢາມລະຫວ່າງຄະນະຜູ້ແທນຂັ້ນສູງ ແລະ ຂັ້ນຕ່າງໆຢ່າງປົກກະຕິ, ປະຊາຊົນສອງປະເທດໄປມາຫາສູ່ກັນ, ມີການພົວພັນດ້ານການຄ້າ-ການລົງທຶນ, ການທ່ອງທ່ຽວ ແລະ ອື່ນໆ. ທ່ານຮອງປະ ທານ ກຜງສ ຍັງໄດ້ແຈ້ງສະພາບການໂດຍຫຍໍ້ກ່ຽວກັບການພົວພັນຮ່ວມມືລະຫວ່າງສະພາແຫ່ງຊາດລາວ ກັບລັດ ຖະສະພາເຢຍລະມັນ ເຊິ່ງສະແດງອອກໃນການແລກປ່ຽນການຢ້ຽມຢາມຂອງຄະນະຜູ້ແທນນໍາກັນຢ່າງປົກກະຕິ ເປັນຕົ້ນແມ່ນປີ 2022, ທ່ານ ສັນຍາ ປຣະເສີດ ປະທານກໍາມາທິການການຕ່າງປະເທດ ພ້ອມດ້ວຍຄະນະ ຢ້ຽມ ຢາມ ແລະ ແລກປ່ຽນບົດຮຽນຢູ່ເຢຍລະມັນ ແລະ ທ່ານ Wulf Gallert ປະທານກໍາມາທິການການຕ່າງປະເທດ ພັກຝ່າຍຊ້າຍເຢຍລະມັນ ຢ້ຽມຢາມ ແລະ ເຮັດວຽກ ຢູ່ ສປປລາວ ໃນເດືອນສິງຫາ 2023; ສອງຝ່າຍໄດ້ແລກປ່ຽນຂໍ້ມູນຂ່າວສານ, ສານຊົມເຊີຍ, ສານອວຍພອນໃນໂອກາດວັນສຳຄັນຕ່າງໆ ພ້ອມທັງສະໜັບສະໜູນເຊິ່ງກັນ ແລະກັນໃນເວທີພາກພື້ນ ແລະ ສາກົນ ເປັນຕົ້ນແມ່ນກອງປະຊຸມຄູ່ຮ່ວມເຈລະຈາລັດຖະສະພາອາຊີເອີຣົບ (ASEP), ສະພັນລັດຖະສະພາສາກົນ (IPU) ແລະ ອື່ນໆ. ນອກຈາກນີ້, ສສ ເຢຍລະມັນ ກໍໃຫ້ການຊ່ວຍເຫຼືອສະໜັບສະ ໜູນໃຫ້ແກ່ສະພາແຫ່ງຊາດລາວ ໂດຍຜ່ານເຊກາ, ໂລຊາລຸກຊໍາບວກ ແລະ ອົງການສາກົນຕ່າງໆ ເພື່ອເສີມສ້າງຄວາມເຂັ້ມແຂງໃນດ້ານຕ່າງໆ ເປັນຕົ້ນທາງດ້ານເຕັກນິກ-ວິຊາການ, ການສ້າງ ແລະ ປັບປຸງກົດໝາຍ, ທັດສະນະສຶກສາ, ກອງປະຊຸມສໍາມະນາ ແລະ ອື່ນໆ ເຊິ່ງເປັນປະໂຫຍດຢ່າງຍິ່ງໃຫ້ແກ່ສະພາແຫ່ງຊາດລາວ.
ໃນໂອກາດດຽວກັນນີ້, ທ່ານຮອງປະທານກໍາມາທິການແຜນການ, ການເງິນ ແລະ ການກວດສອບ ກໍໄດ້ແຈ້ງສະພາບລວມໂດຍຫຍໍ້ຂອງສະພາແຫ່ງຊາດລາວຊຸດທີ IX ພ້ອມທັງແຈ້ງໃຫ້ຊາບວ່າ ໃນປີນີ້ ສປປ ລາວ ເປັນປະທານອາຊຽນ ແລະ ເປັນເຈົ້າພາບກອງປະຊຸມສຸດຍອດອາຊຽນ, ເປີດປີທ່ອງທ່ຽວປີ 2024 ແລະ ສະພາແຫ່ງຊາດລາວ ຈະໄດ້ເປັນເຈົ້າພາບກອງປະຊຸມສະມັດຊາລັດຖະສະພາລະຫວ່າງຊາດອາຊຽນ ຄັ້ງທີ 45 ຫຼື AIPA-45 ຢູ່ນະຄອນຫຼວງວຽງຈັນ ໃນເດືອນຕຸລາ 2024.
ທ່ານ Andreas Larem ໄດ້ສະແດງຄວາມຂອບໃຈຕໍ່ທ່ານຮອງປະທານກໍາມາທິການແຜນການ, ການເງິນ ແລະ ການກວດສອບ ທີ່ໄດ້ໃຫ້ການຕ້ອນຮັບຢ່າງອົບອຸ່ນ; ພ້ອມນີ້, ກໍມີຄວາມສົນໃຈກ່ຽກັບການພັດທະນາເສດຖະກິດ-ສັງຄົມ ຂອງ ສປປລາວ ແລະ ການເຄື່ອນໄຫວຢູ່ໃນເວທີລັດຖະສະພາສາກົນ (IPU) ຂອງສະພາແຫ່ງຊາດລາວ. ໃນໂອກາດນີ້ ກໍຢືນຢັນຈະໃຫ້ການປະກອບສ່ວນສືບຕໍ່ຊຸກຍູ້, ສົ່ງເສີມສາຍພົວພັນມິດຕະພາບ ແລະ ການຮ່ວມມືອັນດີງາມລະຫວ່າງສອງປະເທດ ກໍຄືສອງອົງການນິຕິບັນຍັດ ເຢຍລະມັນ-ລາວ ທີ່ມີມາແລ້ວນັ້ນ ໃຫ້ໄດ້ຮັບການເສີມຂະຫຍາຍ ແລະ ເປັນຮູບປະທຳຍິ່ງໆຂຶ້ນໄປ.