ວັນທີ 26 ກັນຍາ 2024 ທີ່ຜ່ານມາ ຢູ່ທີ່ສະພາປະຊາຊົນແຂວງຈຳປາສັກ ໄດ້ມີກອງປະຊຸມ ຊຸກຍູ້ວຽກງານການກະກຽມກອງປະຊຸມໃຫຍ່ 3 ຂັ້ນຂອງພັກຂັ້ນແຂວງ ລະຫວ່າງ ຄະນະອະນຸກຳມະການເນື້ອໃນຂັ້ນແຂວງ ຮ່ວມກັບ ອະນຸກຳມະການເນື້ອໃນບົດລາຍງານການຂັ້ນເມືອງ ເມືອວມຸນລະປະໂມກ ໂດຍການເປັນປະທານ ສະຫາຍ ສົມສີ ມະນີນິນ ກຳມະການພັກແຂວງ, ຮອງປະທານສະພາປະຊາຊົນແຂວງ, ຫົວໜ້າອະນຸກໍາມະການເນື້ອໃນ ບົດລາຍງານການເມືອງຂັ້ນແຂວງ, ສະຫາຍ ວັນນະສັກ ຊາດຕາກູນ ກຳມະການພັກແຂວງ, ເລຂາພັກເມືອງ, ເຈົ້າເມືອງມຸນລະປາໂມກ ມີບັນດາສະຫາຍອານຸກຳມະການເນື້ອໃນຂັ້ນແຂວງ, ຂັນເມືອງ ແລະ ພະນັກງານທີ່ກ່ຽວຂ້ອງເຂົ້າຮ່ວມມີ.

ຈຸດປະສົງ, ເພື່ອຊຸກຍູ້ວຽກງານໃນການກະກຽມຄວາມພ້ອມຂອງບົດລາຍງານການເມືອງ ໃຫ້ຄະນະພັກເມືອງມຸນລະປາໂມກ ມີຄວາມຮັບຮູ້ເຂົ້າໃຈ, ສາມາດຈັ້ງຕັ້ງຜັນຂະຫຍາຍ ແລະ ຈັດຕັ້ງປະຕິບັດຄໍາສັ່ງແນະນໍາຂອງຄະນະເລຂາທິການສູນກາງພັກ ສະບັບເລກທີ 411/ຄລສພ, ລົງວັນທີ 8 ສິງຫາ 2023 ແລະ ຄໍາສັ່ງແນະນໍາຂອງຄະນະຈັດຕັ້ງສູນກາງພັກ ສະບັບເລກທີ 211/ຄຈສພ, ລົງວັນທີ 16 ສິງຫາ 2023 ວ່າດ້ວຍການກະກຽມດໍາເນີນກອງປະຊຸມ 3 ຂັ້ນຂອງພັກ ໃຫ້ກວ້າງຂວາງ, ທົ່ວເຖິງ ແລະ ມີຄວາມເປັນເອກະພາບໃນທົ່ວອົງຄະນະພັກຂອງກອງບັນຊາການທະຫານແຂວງ ໃຫ້ມີຄວາມພ້ອມຮອບດ້ານ ແລະ ຮັບປະກັນການກະກຽມດ້ານຂະບວນ ການ, ດ້ານເນື້ອໃນ ແລະ ດ້ານບຸກຄະລາກອນ. ວາລະດຳເນີນກອງປະຊຸມ, ຕາງໜ້າຄະນະພັກເມືອງມຸນລະປາໂມກ ໄດ້ຮັບລາຍງານກ່ຽວກັບການກະກຽມຄວາມພ້ອມໃນການກະກຽມ ຈາກອະນຸກຳມະການເນື້ອໃນ ບົດລາຍງານການເມືອງ ທີ່ຈະດຳເນີນກອງປະຊຸມໃຫຍ່. ຈາກນັ້ນ, ອະນຸກໍາມະການເນື້ອໃນຂັ້ນແຂວງໄດ້ແນະນຳວິທີການກຳນົດເນື້ອໃນກອງປະຊຸມ ແລະ ບົດປີ່ນອ້ອມຕ່າງໆ ແລະ ກອງປະຊຸມໄດ້ມີການແລກປ່ຽນປະກອບຄຳເຫັນບົນພື້ນຖານຄວາມເປັນເອກະພາບ, ການຕີລາຄາຜົນຂອງການຈັດຕັ້ງປະຕິບັດໜ້າທີ່ວຽກງານໃນແຕ່ດ້ານໃຫ້ເຫັນໄດ້ຜົນສໍາເລັດ, ຂໍ້ຄົງຄ້ານ, ທິດທາງທີ່ຈະສືບຕໍ່ຈັດຕັ້ງປິຕິບັດ ບົນພື້ນຖານຄວາມຖືກຕ້ອງສອດຄ່ອງຕາມລະບຽບຂອງ ພັກ-ລັດ ທີ່ວາງໄວ້.

(ພາບ-ຂ່າວ: ສຸລິຍາ ເພັງສະຫວັດ)