(ສພຊ) – ວັນທີ 24 ພຶດສະພາ 2024 ທີ່ສະພາແຫ່ງຊາດ, ຄະນະຮັບຜິດຊອບການເປັນເຈົ້າພາບກອງປະຊຸມສະພາທີ່ປຶກສາໄອປາ ກ່ຽວກັບໄພອັນຕະລາຍຂອງຢາເສບຕິດ (AIPACODD) ຄັ້ງທີ 7 ໄດ້ຈັດກອງປະຊຸມປຶກສາຫາ ລືກັນກ່ຽວກັບການກະກຽມຄວາມພ້ອມ ພາຍໃຕ້ການເປັນປະທານຂອງທ່ານ ສັນຍາ ປຣະເສີດ ປະທານກຳມາທິການການຕ່າງປະເທດ, ຫົວໜ້າອະນຸກຳມະການກອງເລຂາແຫ່ງຊາດ ໄອປາ-45; ໂດຍມີຄະນະຮັບຜິດຊອບຈາກກໍາມາທິການປ້ອງກັນຊາດ-ປ້ອງກັນຄວາມສະຫງົບ, ກຳມາທິການວັດທະນະທຳ-ສັງຄົມ, ກະຊວງປ້ອງກັນຄວາມສະຫງົບ ແລະ ພະນັກງານ-ວິຊາການ ທີ່ກ່ຽວຂ້ອງເຂົ້າຮ່ວມ ລວມທັງໝົດຈຳນວນ 18 ທ່ານ.
ກອງປະຊຸມໄດ້ຮັບຟັງການນຳສະເໜີກ່ຽວກັບຮູບແບບ ແລະ ລາຍງານກ່ຽວກັບການກະກຽມເປັນເຈົ້າພາບກອງປະຊຸມ AIPACODD ຄັ້ງທີ 7 ເຊິ່ງຈະຈັດຂຶ້ນພາຍໃຕ້ຫົວຂໍ້: “ເພີ່ມທະວີບົດບາດຂອງລັດຖະສະພາ ໃນການຮ່ວມມື ເພື່ອແກ້ໄຂບັນຫາຢາເສບຕິດ ເຮັດໃຫ້ອາຊຽນປອດຢາເສບຕິດຢ່າງເປັນຮູບປະທຳ” ຫຼັງຈາກນັ້ນຜູ້ເຂົ້າຮ່ວມໄດ້ປຶກສາຫາລືກັນກ່ຽວກັບການກະກຽມຮ່າງເນື້ອໃນຂອງກອງປະຊຸມດັ່ງກ່າວ ເພື່ອເຂົ້າຜ່ານກອງປະຊຸມຄະນະປະຈຳສະພາແຫ່ງຊາດ ກ່ອນນຳໄປພິຈາລະນາຮ່ວມກັບຄະນະຜູ້ແທນລັດຖະສະພາສະມາຊິກໄອປາ ໃນກອງປະຊຸມ AIPACODD ຄັ້ງທີ 7 ເຊິ່ງຈະຈັດຂຶ້ນໃນລະຫວ່າງວັນທີ 06-09 ສິງຫາ 2024 ທີ່ແຂວງຫຼວງພະບາງ; ນອກຈາກນັ້ນ, ໄດ້ປຶກສາຫາລືກັນກ່ຽວກັບຮູບແບບ ແລະ ກົນໄກການດຳເນີນກອງປະຊຸມ ເພື່ອເປີດໃຫ້ຂະແໜງການກ່ຽວຂ້ອງໄດ້ມີການວາງສະແດງກິດ ຈະກຳ ແລະ ການທັດສະນະສຶກສາ ກ່ຽວກັບວຽກງານຕ້ານຢາເສບຕິດຂອງ ສປປລາວ, ພ້ອມທັງມີທິດຊີ້ນຳໃນການກະ ກຽມການເປັນເຈົ້າພາບກອງປະຊຸມ AIPACODD ຄັ້ງທີ 7 ໃຫ້ມີປະສິດທິພາບ ແລະ ຜົນສຳເລັດຢ່າງຈົບງາມ.
(ກົມພົວພັນລັດຖະສະພາຫຼາຍຝ່າຍ, ກຳມາທິການການຕ່າງປະເທດ)