(ສພຊ) – ກອງປະຊຸມສະໄໝສາມັນເທື່ອທີ່ 8 ຂອງສະພາແຫ່ງຊາດຊຸດທີ IX ໃນຕອນເຊົ້າວັນທີ 29 ພະຈິກ 2024 ທ່ານ ປອ. ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງປະທານສະພາແຫ່ງຊາດ ໄດ້ກ່າວຄຳເຫັນຕໍ່ທີ່ປະຊຸມ ໃນໂອກາດວັນສ້າງຕັ້ງສະພາແຫ່ງຊາດ ຄົບຮອບ 49 ປີ (02/12/1975-02/12/2024 ) ໂດຍທ່ານໄດ້ກ່າວວ່າ:
ເນື່ອງໃນໂອກາດວັນທີ 2 ທັນວາ 2024 ທີ່ຈະໝູນ ວຽນມາເຖິງໃນ 3 ວັນຂ້າງໜ້ານີ້ ເຊິ່ງເປັນວັນປະຫວັດສາດອັນຍິ່ງໃຫຍ່ຂອງຊາດ ວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ແລະ ວັນສ້າງຕັ້ງສະພາ ແແຫ່ງຊາດແຫ່ງລາວ ຄົບຮອບ 49 ປີ (2/12/1975-2/12/2024), ຂ້າພະເຈົ້າ ຂໍຕາງໜ້າໃຫ້ຄະນະປະຈໍາສະພາແຫ່ງຊາດ ສົ່ງຄວາມອວຍພອນອັນປະເສີດ ມາຍັງບັນດາທ່ານການນໍາຂອງສະພາແຫ່ງຊາດ, ອົງການແນວລາວສ້າງຊາດ, ສະຫະພັນນັກຮົບເກົ່າ, ອົງການຈັດຕັ້ງມະຫາຊົນ ພ້ອມດ້ວຍສະມາຊິກສະພາແຫ່ງຊາດ ຈົ່ງມີສຸຂະພາບເຂັ້ມແຂງ, ມີຄວາມຜາສຸກ ແລະ ມີຜົນສໍາເລັດ.
ວັນຊາດ ແລະ ວັນສ້າງຕັ້ງສະພາແຫ່ງຊາດ ໃນປີນີ້ ພໍດີຢູ່ໃນຊ່ວງເວລາທີ່ສະແຫ່ງຊາດ ກຳລັງດຳເນີນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX, ໃນໂອກາດທີ່ມີຄວາມໝາຍຄວາມສໍາຄັນນີ້ ຂ້າພະເຈົ້າຕາງໜ້າຄະນະປະຈໍາສະພາແຫ່ງຊາດ, ຄະນະປະທານກອງປະຊຸມ ຫວນຄືນກ່ຽວກັບມູນເຊື້ອ, ຜົນງານ ແລະ ການເຄື່ອນໄຫວຂອງສະພາແຫ່ງຊາດໂດຍຫຍໍ້ດັ່ງນີ້:
ພາລະກິດປະຕິວັດຕໍ່ສູ້ກູ້ຊາດອັນອົງອາດກ້າແກ່ນ, ພິລະອາດຫານ, ດຸເດືອດຂ້ຽວຂາດ, ບໍ່ຍອມຈໍານົນ ແລະ ເສຍສະຫຼະຢ່າງໃຫຍ່ຫຼວງຂອງປະຊາຊົນລາວບັນດາເຜົ່າ ພາຍໃຕ້ການນໍາພາອັນປີຊາສາມາດຂອງພັກປະຊາຊົນປະຕິວັດລາວ ຕ້ານຈັກກະພັດລ່າເມືອງຂຶ້ນທັງແບບເກົ່າ ແລະ ແບບໃໝ່ ໄດ້ຮັບໄຊຊະນະຢ່າງສົມບູນ ແບບບົວບໍ່ຊໍ້ານໍ້າບໍ່ຂຸ່ນ ແຕ່ຈັບປາໄດ້ທັງໝົດ, ເປັນການຢຶດອໍານາດແບບບໍ່ນອງເລືອດ ເຊິ່ງເປັນເຫດການທີ່ຫາຍາກໃນການປະຕິ ວັດຂອງປະຊາຊາດໃນໂລກ, ສ້າງຕັ້ງລັດແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນຢ່າງສະຫງ່າຜ່າເຜີຍ ໃນວັນທີ 2 ທັນວາ 1975 ເຊິ່ງເປັນການໄຂສັງກາດໃໝ່ – ສັງກາດແຫ່ງເອກະລາດ ແລະ ອິດສະລະພາບທີ່ແທ້ຈິງຂອງປະເທດຊາດ ແລະ ປະຊາຊົນລາວບັນດາ ເຜົ່າ, ເປີດສັກກະລາດໃໝ່ໃຫ້ແກ່ການພັດທະນາປະເທດ ຊາດໄປສຸ່ຄວາມວັດທະນາຖາວອນ.
ໃນຕະຫຼອດໄລຍະ 49 ປີຜ່ານມາ, ເຖິງວ່າປະເທດຊາດຂອງພວກເຮົາ ຈະປະສົບກັບຄວາມຫຍຸ້ງຍາກ, ສິ່ງທ້າທາຍຫຼາຍປະການກໍຕາມ, ແຕ່ພາຍໃຕ້ການນຳພາອັນຖືກຕ້ອງ ແລະ ປີຊາສາມາດ ຂອງພັກປະຊາຊົນປະຕິວັດລາວ, ດ້ວຍການເສີມຂະຫຍາຍມູນເຊື້ອຮັກຊາດ ແລະ ຄວາມສາມັກຄີປອງດອງທົ່ວປວງຊົນລາວທັງຊາດ ແລະ ໄດ້ຮັບການສະໜັບສະໜູນອັນໃຫຍ່ຫຼວງຈາກສາກົນ ເປັນຕົ້ນບັນດາປະເທດສັງຄົມນິຍົມ, ພວກເຮົາສາມາດປົກປັກຮັກສາໝາກຜົນຂອງການປະຕິວັດໄວ້ໄດ້ຢ່າງໝັ້ນຄົງ, ມີການພັດທະນາຈາກຈຸດເລີ່ມທີ່ຕໍ່າທີ່ສຸດ ຈົນສາມາດມີຜົນສໍາເລັດຫຼາຍດ້ານ: ດ້ານການເມືອງມີສະຖຽນລະພາບທີ່ໜັກແໜ້ນ, ດ້ານເສດຖະກິດມີການຂະຫຍາຍຕົວເປັນກ້າວໆ, ມີການປ່ຽນແປງໃໝ່ ເຮັດໃຫ້ປະເທດເຮົາມີໂສມໜ້າໃໝ່ຂຶ້ນເລື້ອຍໆ, ປະຊາຊົນລາວບັນດາເຜົ່າໄດ້ເສີມຂະຫຍາຍສິດປະຊາທິປະໄຕຂອງຕົນຢ່າງເຕັມສ່ວນ ເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ ຢ່າງເປັນເຈົ້າການ; ລັດແຫ່ງສາທາລະນະລັດ ປະຊາທິປະໄຕ ປະຊາຊົນລາວ ທີ່ເປັນລັດໜຸ່ມນ້ອຍ ບໍ່ສະເພາະແຕ່ສາມາດຍືນຍົງຄົງຕົວຢູ່ໄດ້ເທົ່ານັ້ນ, ແຕ່ຫາກຍັງໄດ້ຮັບການປັບປຸງ, ກໍ່ສ້າງ ແລະ ເຕີບໃຫຍ່ເຂັ້ມແຂງຂຶ້ນເປັນກ້າວໆ.
ສະພາປະຊາຊົນສູງສຸດໃນເມື່ອກ່ອນ ແລະ ສະພາແຫ່ງຊາດໃນປັດຈຸບັນ ໄດ້ຮັບການສ້າງຕັ້ງຂຶ້ນພ້ອມໆກັບການສ້າງຕັ້ງລັດແຫ່ງສາທາລະນະລັດ ປະຊາທິປະໄຕ ປະຊາຊົນລາວ (ວັນທີ 2 ທັນວາ 1975) ແລະ ໄດ້ຮັບການປັບປຸງ, ກໍ່ສ້າງ ແລະ ເຕີບໃຫຍ່ຂະຫຍາຍຕົວທາງດ້ານປະ ລິມານ ແລະ ຄຸນນະພາບ.
ສະພາປະຊາຊົນສູງສຸດ ຊຸດທີ I ທີ່ເປັນສະພາປະຕິ ບັດພາລະບົດບາດຕົ້ນຕໍໃນການເຕົ້າໂຮມຄວາມສາມັກຄີປອງດອງຊາດ, ເລືອກຕັ້ງປີ 1975, ມີສະມາຊິກຈຳນວນ 45 ທ່ານ, ຍິງ 4 ທ່ານ ເທົ່າກັບ 9%;
ສະພາປະຊາຊົນສູງສຸດ ຊຸດທີ II ທີ່ເປັນສະພາຮ່າງລັດຖະທໍາມະນູນ ຈົນສາມາດຮັບຮອງ ແລະ ປະກາດໃຊ້ລັດຖະທໍາມະນູນສະບັບທໍາອິດໃນປີ 1991, ເລືອກຕັ້ງໃນປີ 1989, ມີສະມາຊິກຈໍານວນ 79 ທ່ານ, ຍິງ 5 ທ່ານ ເທົ່າກັບ 6%;
ນັບແຕ່ສະພາແຫ່ງຊາດ ຊຸດທີ III ຫາ ຊຸດທີ IX ແມ່ນສະພາແຫ່ງຊາດ, ສືບຕໍ່ປະຕິບັດ 3 ພາລະບົດບາດຕາມທີ່ໄດ້ກຳນົດໄວ້ໃນລັດຖະທຳມະນູນ ແລະ ກົດໝາຍ. ສະພາແຫ່ງຊາດຊຸດທີ III ເລືອກຕັ້ງປີ 1992, ມີສະມາຊິກຈໍານວນ 85 ທ່ານ, ຍິງ 8 ທ່ານ ເທົ່າກັບ 9.41% ແລະ ໄດ້ປ່ຽນຊື່ຈາກສະພາປະຊາຊົນສູງສຸດ ມາເປັນ ສະພາແຫ່ງຊາດ;
ສະພາແຫ່ງຊາດຊຸດທີ IV ເລືອກຕັ້ງປີ 1997 ເລືອກເອົາຜູ້ແທນໄດ້ 99 ທ່ານ, ຍິງ 21 ທ່ານ ເທົ່າກັບ 21.21%;
ສະພາແຫ່ງຊາດຊຸດທີ V ເລືອກຕັ້ງປີ 2002 ເລືອກເອົາຜູ້ແທນໄດ້ 109 ທ່ານ, ຍິງ 25 ທ່ານ ເທົ່າກັບ 22.94%;
ສະພາແຫ່ງຊາດຊຸດທີ VI ເລືອກຕັ້ງປີ 2006 ເລືອກເອົາຜູ້ແທນໄດ້ 115 ທ່ານ, ຍິງ 29 ທ່ານ ເທົ່າກັບ 25.22%;
ສະພາແຫ່ງຊາດຊຸດທີ VII ເລືອກຕັ້ງປີ 2011 ເລືອກເອົາຜູ້ແທນໄດ້ 132 ທ່ານ, ຍິງ 33 ທ່ານ ເທົ່າກັບ 25%;
ສະພາແຫ່ງຊາດຊຸດທີ VIII ເລືອກຕັ້ງປີ 2016 ປະກອບດ້ວຍ 8 ກໍາມາທິການ ແລະ ຄະນະເລຂາທິການສະພາແຫ່ງຊາດ ມີສະມາຊິກຈໍານວນ 149 ທ່ານ, ຍິງ 41 ທ່ານ ເທົ່າກັບ 27.5%;
ສະພາແຫ່ງຊາດຊຸດທີ IX ເລືອກຕັ້ງປີ 2021 ປະກອບມີ 9 ກຳມາທິການ ແລະ ຄະນະເລຂາທິການສະພາແຫ່ງຊາດ, ສະມາຊິກສະພາແຫ່ງຊາດໄດ້ເພີ່ມຂຶ້ນເປັນ 164 ທ່ານ, ຍິງ 36 ທ່ານ ເທົ່າກັບ 21.95%.
ຈໍານວນສະມາຊິກສະພາແຫ່ງຊາດ ທຽບໃສ່ສະພາປະຊາຊົນສູງສຸດ ຊຸດທີ I ໄດ້ເພີ່ມຂຶ້ນເກືອບ 4 ເທົ່າ.
ໃນຕະຫຼອດ 49 ປີທີ່ຜ່ານມາ, ສະພາແຫ່ງຊາດ ເວລາໃດກໍໄດ້ຕິດພັນຢ່າງສະໜິດແໜ້ນກັບປະຊາຊົນລາວບັນດາເຜົ່າ ເປັນຕົວແທນແຫ່ງຜົນປະໂຫຍດຂອງເຂົາເຈົ້າ, ຮັບໃຊ້ປະຊາຊົນຢ່າງສຸດອົກສຸດໃຈ ແລະ ສູ້ຊົນຈັດຕັ້ງປະຕິບັດພາລະບົດບາດຂອງຕົນຄື:
1. ດ້ານນິຕິບັນຍັດ
ເພື່ອຕອບສະໜອງຄວາມຮຽກຮ້ອງຕ້ອງການໃນການຈັດຕັ້ງປະຕິບັດນະໂຍບາຍປ່ຽນແປງໃໝ່ຂອງພັກເຮົາ ແລະ ປະຕິບັດຕາມສິດ, ໜ້າທີ່ດ້ານນິຕິບັນຍັດ, ສະພາແຫ່ງຊາດ ໄດ້ຮັບຮອງເອົາລັດຖະທຳມະນູນສະບັບທຳອິດຂອງ ສປປລາວ ແລະ ໄດ້ປະກາດໃຊ້ຕາມລັດຖະດຳລັດຂອງປະທານປະເທດ, ສະບັບເລກທີ 55/ປທປທ, ລົງວັນທີ 15 ສິງຫາ 1991, ເຊິ່ງລັດຖະທໍາມະນູນສະບັບດັ່ງກ່າວ ແມ່ນເປັນການຮັບຮູ້ຜົນງານອັນໃຫຍ່ຫຼວງທີ່ປະຊາຊົນເຮົາຍາດມາໄດ້ໃນພາລະກິດຕໍ່ສູ້ປົດປ່ອຍຊາດ, ປົກປັກຮັກສາ ແລະ ສ້າງສາປະເທດຊາດ ທັງແມ່ນໝາກຜົນລວມຍອດແຫ່ງສະຕິປັນຍາຂອງປະຊາຊົນໃນທົ່ວປະ ເທດ, ສ່ອງແສງເຖິງເຈດຈຳນົງ ແລະ ຄວາມຕັດສິນໃຈອັນສູງສົ່ງຂອງປະຊາຊົນລາວທັງຊາດ ພາຍໃຕ້ການນໍາພາຂອງພັກປະຊາຊົນ ປະຕິວັດລາວ, ພ້ອມກັນສູ້ຊົນເພື່ອບັນລຸຈຸດໝາຍສ້າງປະເທດລາວໃຫ້ເປັນປະເທດ ສັນຕິພາບ, ເອກະລາດ, ປະຊາທິປະໄຕ, ເອກະພາບ ແລະ ວັດທະນະຖາວອນ.
ເພື່ອຕອບສະໜອງຄວາມຮຽກຮ້ອງຕ້ອງການໃນການປົກປັກຮັກສາ ແລະ ສ້າງສາພັດທະນາປະເທດຊາດໃນແຕ່ລະໄລຍະ, ຜ່ານມາ ລັດຖະທຳມະນູນ ແຫ່ງ ສປປລາວ ໄດ້ຮັບການປັບປຸງ 2 ຄັ້ງ (ປີ 2003 ແລະ 2015) ແລະ ຄັ້ງທີ 3 ກຳລັງດຳເນີນຢູ່ໃນປັດຈຸບັນນີ້. ບັນດາອົງ ການລັດ ໄດ້ເປັນເຈົ້າການຜັນຂະຫຍາຍລັດຖະທຳມະນູນ ອອກເປັນບັນດາກົດໝາຍ ແລະ ສະພາແຫ່ງຊາດ ໄດ້ພິຈາລະນາຮັບຮອງເອົາການສ້າງ ແລະ ປັບປຸງກົດໝາຍ ໄດ້ທັງໝົດ 180 ສະບັບ ເຊິ່ງລວມມີກົດໝາຍຂົງເຂດປົກຄອງ ແລະ ຍຸຕິທໍາ, ຂົງເຂດປ້ອງກັນຊາດ-ປ້ອງກັນຄວາມສະຫງົບ, ຂົງເຂດເສດຖະກິດ, ຂົງເຂດວັດທະນະທໍາ-ສັງຄົມ ແລະ ຂົງເຂດການຕ່າງປະເທດ.
2. ດ້ານການຕົກລົງບັນຫາສໍາຄັນພື້ນຖານຂອງປະເທດຊາດ
ສະພາແຫ່ງຊາດ ໄດ້ປະຕິບັດສິດ, ໜ້າທີ່ດ້ານການຕົກລົງບັນຫາສໍາຄັນພື້ນຖານຂອງປະເທດຊາດ ຕາມທີ່ໄດ້ກໍານົດໃນລັດຖະທໍາມະນູນ ແລະ ກົດໝາຍ ໂດຍພິຈາລະ ນາ, ຮັບຮອງເອົາແຜນຍຸດທະສາດ, ແຜນພັດທະນາເສດ ຖະກິດ-ສັງຄົມ, ແຜນການລົງທຶນຂະໜາດໃຫຍ່, ແຜນງົບປະມານແຫ່ງລັດ, ແຜນເງິນຕາ, ການດັດແກ້ແຜນງົບປະ ມານແຫ່ງລັດ ແລະ ດັດແກ້ແຜນການລົງທຶນຂອງລັດ; ພິຈາລະນາຮັບຮອງເອົາປະທານ ແລະ ຮອງປະທານປະເທດ; ໂຄງປະກອບກົງຈັກ ແລະ ບຸກຄະລາກອນຂອງສະພາແຫ່ງຊາດ, ລັດຖະບານ, ອົງການໄອຍະການປະຊາ ຊົນສູງສຸດ, ສານປະຊາຊົນສູງສຸດ, ອົງການກວດກາແຫ່ງລັດ ແລະ ອົງການກວດສອບແຫ່ງລັດ; ໄດ້ຮັບຮອງເອົາການສ້າງຕັ້ງແຂວງໄຊສົມບູນ, ຊື່ເອີ້ນ ແລະ ກໍານົດຈໍານວນຊົນເຜົ່າໃນ ສປປລາວ ມີ 50 ຊົນເຜົ່າ (ໂດຍຈັດຕາມ 4 ໝວດພາສາຄື: ໝວດພາສາລາວ-ໄຕ, ໝວດພາສາມອນ- ຂະແມ, ໝວດພາສາມົ້ງ-ອິ້ວມຽນ ແລະ ໝວດພາສາຈີນ-ຕິເບດ) ແລະ ພິຈາລະນາ, ຮັບຮອງເອົາການເຄື່ອນໄຫວວຽກ ງານຂອງອົງການໄອຍະການປະຊາຊົນສູງສຸດ, ສານປະຊາ ຊົນສູງສຸດ, ອົງການກວດກາແຫ່ງລັດ, ອົງການກວດສອບແຫ່ງລັດ ແລະ ການເຄື່ອນໄຫວວຽກງານສະພາແຫ່ງຊາດ ແລະ ພິຈາລະນາຮັບຮອງເອົາບັນຫາສໍາຄັນອື່ນໆ.
3. ດ້ານການຕິດຕາມກວດກາຂອງສະພາແຫ່ງຊາດ
ສະພາແຫ່ງຊາດ ໄດ້ເອົາໃຈໃສ່ປະຕິບັດພາລະບົດ ບາດ, ສິດ ແລະ ໜ້າທີ່ ຕິດຕາມກວດກາຂອງຕົນ ຕາມທີ່ໄດ້ກຳນົດໄວ້ໃນລັດຖະທຳມະນູນ, ກົດໝາຍ ເປັນຕົ້ນການຕິດຕາມກວດກາການປະຕິບັດລັດຖະທໍາມະນູນ ແລະ ກົດໝາຍ, ມະຕິກອງປະຊຸມສະພາແຫ່ງຊາດ, ມະຕິກອງປະຊຸມຄະນະປະຈໍາສະພາແຫ່ງຊາດ ກ່ຽວກັບການປະຕິ ບັດແຜນພັດທະ ນາເສດຖະກິດ-ສັງຄົມ, ແຜນງົບປະມານແຫ່ງລັດ, ໂຄງການລະດັບຊາດ, ໂຄງການຂະໜາດໃຫຍ່; ຕິດຕາມກວດກາການປະຕິບັດສິດ, ໜ້າທີ່ ຕາມກົດໝາຍ, ມະຕິກອງປະຊຸມສະພາແຫ່ງຊາດ, ມະຕິກອງປະຊຸມຄະ ນະປະຈໍາສະພາແຫ່ງຊາດ, ຂອງອົງການໄອຍະການປະຊາ ຊົນສູງສຸດ, ສານປະຊາຊົນສູງສຸດ, ຜູ້ພິພາກສາ, ອົງການສືບສວນ-ສອບສວນ, ອົງການຈັດຕັ້ງປະຕິບັດຄໍາຕັດສີນຂອງສານ; ຄົ້ນຄວ້າ, ພິຈາລະນາ ແລະ ແກ້ໄຂຄໍາສະເໜີ, ຄໍາຮ້ອງຂໍຄວາມເປັນທໍາຂອງປະຊາຊົນ ຕາມສິດ, ໜ້າທີ່ ຂອງຄະນະປະຈຳສະພາແຫ່ງຊາດ ເຊິ່ງໄດ້ກໍານົດໃນກົດໝາຍ.
4. ການສ້າງຕັ້ງສະພາປະຊາຊົນຂັ້ນແຂວງ
ສະພາຂັ້ນທ້ອງຖິ່ນ ກໍເຄີຍມີການເຄື່ອນໄຫວໃນຊຸມປີ 70, ແຕ່ຕໍ່ມາໄດ້ຢຸດຕິການເຄື່ອນໄຫວ ຈົນມາຮອດການເລືອກຕັ້ງສະສະມາຊິກສະພາແຫ່ງຊາດຊຸດທີ VIII ໃນປີ 2016 ຈຶ່ງມີສະພາປະຊາຊົນຂັ້ນແຂວງ ເຊິ່ງມາຮອດປັດຈຸ ບັນ ກໍເປັນສະພາປະຊາຊົນຂັ້ນແຂວງ ຊຸດທີ II.
5. ດ້ານການເຄື່ອນໄຫວວຽກງານການຕ່າງປະເທດ
ໃນໄລຍະທີ່ຜ່ານມາ, ສະພາແຫ່ງຊາດ ໄດ້ຕັ້ງໜ້າເຄື່ອນໄຫວວຽກງານການຕ່າງປະເທດຂອງຕົນ ທັງໃນຂອບການພົວພັນຮ່ວມມືແບບສອງຝ່າຍ ແລະ ຫຼາຍຝ່າຍ ດັ່ງນີ້:
ການພົວພັນຮ່ວມມືແບບສອງຝ່າຍ: ສະພາແຫ່ງຊາດ ໄດ້ມີການພົວພັນຮ່ວມມືກັບລັດຖະສະພາບັນດາປະ ເທດໃນພາກພື້ນ ແລະ ສາກົນ ທັງໝົດ 30 ກວ່າປະເທດ ໂດຍໄດ້ແລກປ່ຽນການຢ້ຽມຢາມສັນຖະວາໄມຕີຂອງລະດັບການນໍາຂັ້ນສູງ ແລະ ຄະນະຜູ້ແທນຂັ້ນຕ່າງໆ; ສ້າງຕັ້ງຄະ ນະມິດຕະພາບກັບບັນດາລັດຖະສະພາປະເທດເພື່ອນມິດ 30 ກວ່າປະເທດ, ໄດ້ລົງນາມບັນທຶກຄວາມເຂົ້າໃຈວ່າດ້ວຍການຮ່ວມມືສອງຝ່າຍກັບສະພາແຫ່ງຊາດຫວຽດ ນາມ, ສປຈີນ, ກູບາ, ກຳປູເຈຍ, ລັດເຊຍ, ມົງໂກລີ, ສ.ເກົາຫຼີ, ເບລາຣຸດຊີ ແລະ ອາຣັບ ເອມິເຣດ.
ການພົວພັນຮ່ວມມືແບບຫຼາຍຝ່າຍ: ສະພາແຫ່ງຊາດ ໄດ້ເຂົ້າເປັນສະມາຊິກ ແລະ ເຂົ້າຮ່ວມເຄື່ອນໄຫວຢູ່ໃນອົງ ການຈັດຕັ້ງລັດຖະສະພາພາກພື້ນ ແລະ ສາກົນ ຈຳນວນ 11 ອົງການ ແລະ 2 ເວທີປຶກສາຫາລື, ໄດ້ເປັນເຈົ້າພາບຈັດກອງປະຊຸມອົງການລັດຖະສະພາພາກພື້ນ, ສາກົນ ເຊັ່ນ: ກອງປະຊຸມໃຫຍ່ປະຈຳປີໃນຂອບຂອງສະມັດຊາລັດຖະສະ ພາລະຫວ່າງຊາດອາຊຽນ ຄັ້ງທີ 26, ຄັ້ງທີ 35 ແລະ ຄັ້ງທີ 45 (ປີ 2024), ກອງປະຊຸມເວທີປຶກສາຫາລືລັດຖະ ສະພາອາຊີ-ປາຊີຟິກ ຄັ້ງທີ 17 ແລະ ກອງປະຊຸມການເປັນຄູ່ຮ່ວມລັດຖະສະພາອາຊີ-ເອີຣົບ ຄັ້ງທີ 7 ແລະ ອື່ນໆອີກຈໍານວນໜຶ່ງ.
ພິເສດ, ສະພາແຫ່ງຊາດລາວ ໄດ້ຮັບການສະໜັບສະໜູນຊ່ວຍເຫຼືອຈາກ ສສ.ຫວຽດນາມ ໂດຍຜ່ານສະພາແຫ່ງຊາດ ແຫ່ງ ສສ.ຫວຽດນາມ ໃນການກໍ່ສ້າງຕຶກອາ ຄານຫ້ອງວ່າການສະພາແຫ່ງຊາດ ແລະ ຫໍສະພາແຫ່ງຊາດຫຼັງໃໝ່ ເຊິ່ງເປັນຂອງຂວັນອັນລໍ້າຄ່າທີ່ພັກ, ລັດ ແລະ ປະຊາຊົນຫວຽດນາມ ໄດ້ມອບໃຫ້ພັກ, ລັດ ແລະ ປະຊາ ຊົນລາວບັນດາ ເຜົ່າ ເຊິ່ງເປັນສັນຍະລັກແຫ່ງສາຍພົວພັນອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ.
ສະຫຼຸບສັງລວມໄດ້ວ່າ: ໃນໄລຍະ 49 ປີທີ່ຜ່ານມາ, ສະພາແຫ່ງຊາດ ໄດ້ເຕີບໃຫຍ່ຂະຫຍາຍຕົວທາງດ້ານປະລິ ມານ ແລະ ຄຸນນະພາບ, ສາມາດເຮັດຫຼ້ອນພາລະກຳປະ ຫວັດສາດອັນມີກຽດສະຫງ່າງາມທີ່ພັກ ແລະ ປະຊາຊົນມອບໝາຍ, ໄດ້ປະກອບສ່ວນຢ່າງສົມກຽດເຂົ້າໃນຜົນງານລວມແຫ່ງການປົກປັກຮັກສາ ແລະ ສ້າງສາພັດທະນາປະ ເທດຊາດ ຕາມເສັ້ນທາງກ້າວຂຶ້ນສັງຄົມນິຍົມ, ປະກອບສ່ວນຍົກສູງບົດບາດອິດທິພົນຂອງພັກ, ລັດ ແລະ ຊາດລາວເຮົາ ໃນເວທີພາກພື້ນ ແລະ ສາກົນ ຢ່າງຕໍ່ເນື່ອງ.
ຜ່ານການເຄື່ອນໄຫວວຽກງານໃນໄລຍະ 49 ປີຜ່ານມາ, ສະພາແຫ່ງຊາດ ໄດ້ຮັບການຍ້ອງຍໍປະເພດຕ່າງໆດັ່ງນີ້:
ເນື່ອງໃນໂອກາດສະເຫຼີມສະຫຼອງການສະຖາປະນາ ສປປລາວ ຄົບຮອບ 30 ປີ (1975-2005) ສະພາແຫ່ງ ຊາດ ໄດ້ຮັບຫຼຽນໄຊອິດສະຫຼະຊັ້ນ I ຈໍານວນ 1 ໜ່ວຍ;
ເນື່ອງໃນໂອກາດສະເຫຼີມສະຫຼອງວັນສ້າງຕັ້ງສະພາແຫ່ງຊາດ ຄົບຮອບ 45 ປີ (1975-2020) ສະພາແຫ່ງຊາດຊຸດທີ VIII ໄດ້ຮັບ “ຫຼຽນຄໍາແຫ່ງຊາດ” ຈໍານວນ 1 ໜ່ວຍ;
ນອກຈາກນັ້ນແລ້ວ, ບັນດາທ່ານການນໍາ ແລະ ສະມາຊິກສະພາແຫ່ງຊາດ ໃນຫຼາຍຊຸດຜ່ານມາ ກໍໄດ້ຮັບການຍ້ອງຍໍປະເພດຕ່າງໆ: ຫຼຽນໄຊ, ຫຼຽນກາ ແລະ ໃບຍ້ອງຍໍ ຈາກການຈັດຕັ້ງພາຍໃນ ແລະ ຕ່າງປະເທດຈຳນວນໜຶ່ງ.
ໃນຊຸມປີຕໍ່ໜ້ານີ້, ສະພາແຫ່ງຊາດ ຍັງມີພາລະກໍາປະ ຫວັດສາດອັນໜັກໜ່ວງ ແຕ່ມີກຽດສະຫງ່າງາມ, ພວກເຮົາຈະຕ້ອງພ້ອມກັນສູ້ຊົນເຮັດລ້ອນໜ້າທີ່ຂອງສະພາແຫ່ງ ຊາດຊຸດທີ IX ແລະ ກະກຽມໃຫ້ແກ່ການເລືອກຕັ້ງສະພາແຫ່ງຊາດຊຸດທີ X ເພື່ອສືບຕໍ່ພາລະກິດປົກປັກຮັກສາ ແລະ ສ້າງສາປະເທດຊາດ, ພາປວງຊົນລາວທັງຊາດກ້າວເດີນຕາມເສັ້ນທາງກ້າວຂຶ້ນສູ່ສັງຄົມນິຍົມ. ປັດຈຸບັນ, ໃນເງື່ອນໄຂທີ່ພວກເຮົາປະສົບຄວາມຫຍຸ້ງຍາກດ້ານເສດຖະກິດ- ການເງິນ, ຫວັງວ່າບັນດາທ່ານສະມາຊິກສະພາແຫ່ງຊາດ ຈະສືບຕໍ່ມີສ່ວນຮ່ວມໃນການສ້າງລັດນັບມື້ນັບເຂັ້ມແຂງ, ປົກຄອງດ້ວຍກົດໝາຍ, ນໍາເອົາຄວາມຍຸຕິທໍາມາສູ່ປະຊາ ຊົນລາວບັນດາເຜົ່າ ແລະ ພ້ອມກັນສ້າງຜົນງານຂໍ່ານັບຮັບຕ້ອນ 3 ວັນປະຫວັດສາດ ແລະ ວັນຄົບ ຮອບ 50 ປີຂອງສະພາແຫ່ງຊາດລາວ.