ໃນລະຫວ່າງວັນທີ 6-7 ມີນາ 2024 ຢູ່ທີ່ເມືອງຊະນະຄາມ, ແຂວງວຽງຈັນ, ສະພາປະຊາຊົນແຂວງວຽງຈັນ ໄດ້ຈັດກອງປະຊຸມຝຶກອົບຮົມ ກ່ຽວກັບການເກັບກໍາ, ການຄົ້ນຄ້ວາວິໄຈບັນຫາ, ການຮ່າງມະຕິກອງປະຊຸມສະພາປະຊາຊົນແຂວງ ແລະ ການສະຫຼຸບສັງລວມລາຍງານ, ການຊຸກຍູ້, ຕິດຕາມກວດກາການພັດທະນາຊົນນະບົດ ແລະ ແກ້ໄຂຄວາມທຸກຍາກ, ໃຫ້ແກ່ສະມາຊິກສະມາຊິກສະພາປະຊາຊົນແຂວງ, ພະນັກງານ-ລັດຖະກອນ ສະພາປະຊາຊົນແຂວງ ແລະ ພະນັກງານຊ່ວຍວຽກສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງ 11 ເມືອງ; ໂດຍການເປັນປະທານຂອງທ່ານ ລໍາໄມ ກູດລາວົງ ຄະນະປະຈໍາພັກແຂວງ, ຮອງປະທານສະພາປະຊາຊົນແຂວງວຽງຈັນ; ໃຫ້ກຽດເປັນວິທະຍາກອນໃນກອງປະຊຸມຝຶກອົບຮົມ ໂດຍທ່ານ ສຸບັນ ສະວະບຸດ ກໍາມະການຄະນະປະຈໍາ ສະພາແຫ່ງຊາດ, ປະທານກໍາມາທິການວຽກງານສະມາຊິກສະພາແຫ່ງຊາດ, ທ່ານ ສິງ ເລືອງວິຫານ ຫົວໜ້າກົມວຽກງານຊົນເຜົ່າ; ກອງປະຊຸມຝຶກອົບຮົມຄັ້ງນີ້ ໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານຈາກ ມູນນິທິເອເຊຍ (The Asia Foundation).

ກອງປະຊຸມດັ່ງກ່າວ, ນັກວິທະຍາກອນໄດ້ຂຶ້ນສະເໜີບົດຮຽນກ່ຽວກັບ 3 ຫົວຂໍ້ຫຼັກໆ ຄື: ຄວາມຮູ້ພື້ນຖານກ່ຽວກັບຂໍ້ມູນທີ່ສໍາຄັນ ແລະ ວິທີການຄົ້ນຄ້ວາ ປະກອບຄໍາເຫັນຕໍ່ກອງປະຊຸມສະພາປະຊາຊົນແຂວງ; ການຮ່າງມະຕິກອງປະຊຸມສະພາປະຊາຊົນແຂວງ ແລະ ສະຫຼຸບສັງລວມລາຍງານ; ການຊຸກຍູ້ຕິດຕາມກວດກາການພັດທະນາຊົນນະບົດ ແລະ ແກ້ໄຂຄວາມທຸກຍາກ; ພ້ອມນັ້ນ, ບັນດາຜູ້ເຂົ້າຮ່ວມຝຶກອົບຮົມ ໄດ້ສົນທະນາແລກປ່ຽນຄໍາຄິດຄໍາເຫັນເຊິງກັນ ແລະ ກັນ.

ໃນຕອນທ້າຍ, ທ່ານ ລໍາໄມ ກູດລາວົງ ໄດ້ມີຄໍາຄິດເຫັນໂອ້ລົມວ່າ: ການຝຶກອົບຮົມໃນຄັ້ງນີ້ ສະແດງໃຫ້ເຫັນເຖິງຄວາມເປັນເອກະພາບ ແລະ ຄວາມຮັບຜິດຊອບສູງຂອງບັນດາທ່ານນັກສໍາມະນາກອນທຸກໆທ່ານ ທີ່ມີຄວາມເອົາໃຈໃສ່ຮັບຟັງການນໍາສະເໜີບົດຮຽນ ຂອງວິຍະຍາກອນໃນແຕ່ລະຫົວຂໍ້, ໃຫ້ການຮ່ວມມືໃນການສົນທະນາ, ປຶກສາຫາລືແລກປ່ຽນຄໍາຄິດຄໍາເຫັນເຊິ່ງກັນ ແລະ ກັນ; ພ້ອມທັງ, ຮຽກຮ້ອງໃຫ້ບັນດາທ່ານ ທີ່ເຂົ້າຮ່ວມກອງປະຊຸມຝຶກອົບຮົມ ຈົ່ງນໍາເອົາບົດຮຽນທີ່ໄດ້ຮຽນຮູ້ໃນເທື່ອນີ້ ໄປໝູນໃຊ້ເຂົ້າໃນການປະຕິບັດວຽກງານຕົວຈິງ ຕາມພາລະບົດບາດຂອງຕົນຮັບຜິດຊອບ ໃຫ້ມີປະສິດທິພາບ ແລະ ປະສິດທິຜົນສູງຂຶ້ນກ່ວາເກົ່າ.