ຕອນບ່າຍຂອງວັນພະຫັດ, ວັນທີ 12 ພຶດສະພາ 2022 ຢູ່ທີ່ສະໂມສອນເມືອງນາໝໍ້, ສະພາປະຊາຊົນແຂວງອຸດົມໄຊ ສໍາເລັດກອງປະຊຸມຝຶກອົບຮົມສ້າງຄວາມເຂັ້ມແຂງໃຫ້ແກ່ພະນັກງານຊ່ວຍວຽກ ສະພາປະຊາຊົນແຂວງອຸດົມໄຊ ໂດຍການເປັນປະທານຂອງທ່ານ ຄຳເຜີຍ ງອນວັນຄໍາ ກຳມະການປະຈໍາພັກແຂວງ, ຮອງປະທານ ສພຂ, ມີທ່ານນາງ ບົວພອນ ແກ້ວມະນີ ຮອງເລຂາພັກເມືອງ, ສະມາຊິກສະພາປະຊາຊົນແຂວງປະຈໍາເຂດເລືອກຕັ້ງເມືອງນາໝໍ້, ມີກໍາມະການປະຈໍາ ສພຂ, ຄະນະເລຂາທິການ, ພະນັກງານວິຊາການຈາກສະພາແຫ່ງຊາດ ຜູ້ຕ່າງໜ້າອົງການ ເຊກາ(CEGGA), ນັກວິທະຍາກອນຈາກພະແນກພາຍໃນແຂວງ, ພະແນກເຕັກໂນໂລຊີ ແລະ ການສື່ສານແຂວງ, ພະນັກງານວິຊາການພາຍໃນ ສພຂ ແລະ ພະນັກງານຊ່ວຍວຽກ ຄະນະສະມາຊິກສະພາປະຊາຊົນແຂວງປະຈໍາເຂດເລືອກຕັ້ງ 7 ເມືອງ ເຂົ້າຮ່ວມຢ່າງພ້ອມພຽງ.
ກອງປະຊຸມໃນຄັ້ງນີ້ໄດ້ດໍາເນີນເປັນເວລາ 3 ວັນ, ດ້ວຍບັນຍາກາດທີ່ຟົດຟື້ນ ບັນດາທ່ານວິທະຍາກອນ ໄດ້ຖ່າຍທອດບັນດາຄວາມຮູ້, ວິທີການ-ຮູບແບບ ແລະ ສົນທະນາ-ແລກປ່ຽນຄໍາຄິດເຫັນເຊິ່ງກັນ ແລະ ກັນ ກັບນັກສໍາມະນາກອນຢ່າງກົງໄປກົງມາ; ອັນພົ້ນເດັ່ນແມ່ນກອງປະຊຸມໄດ້ຝຶກບັນດາຫົວຂໍ້ ແລະ ເນື້ອໃນສໍາຄັນດັ່ງນີ້: ພາລະບົດບາດ, ສິດ ແລະ ໜ້າທີ ຂອງສະພາປະຊາຊົນແຂວງ; ຂໍ້ຕົກລົງຮ່ວມລະ ຫວ່າງສະພາປະຊາຊົນແຂວງ ກັບ ອົງການປົກຄອງແຂວງ; ເຕັກນິກການເປັນພິທີກອນ ຫຼື ຄະນະຈັດຕັ້ງພິທີການ; ວິທີຕິດຕາມກວດກາແຜນພັດທະນາເສດຖະກິດ-ສັງຄົມ, ແຜນງົບປະມານ, ການແຕ່ງເອກະສານທາງການ ແລະ ການນໍາໃຊ້ຄອມພິວເຕີເຂົ້າໃນວຽກງານທາງລັດຖະການ.
ຈຸດປະສົງຂອງກອງປະຊຸມຝຶກອົບຮົມສ້າງຄວາມເຂັ້ມແຂງໃຫ້ແກ່ພະນັກງານ ສພຂ ແລະ ພະນັກງານຊ່ວຍວຽກ ປະຈໍາເຂດເລືອກຕັ້ງ 7 ເມືອງຄັ້ງນີ້ ເປັນການສືບຕໍ່ໃນການຈັດຕັ້ງປະຕິບັດວຽກງານການສ້າງຄວາມເຂັ້ມແຂງໃຫ້ແກ່ ສະມາຊິກສະ ພາປະຊາຊົນແຂວງ ແລະ ພະນັກງານຊ່ວຍວຽກ ປະຈໍາເຂດເລືອກຕັ້ງເມືອງ ຕາມແຜນການ ເຄື່ອນໄຫວ 5 ປີ(2021-2025) ຂອງສະພາປະຊາຊົນແຂວງ ແລະ ເພື່ອສ້າງຄວາມເຂັ້ມແຂງໃຫ້ແກ່ ສສຂ ແລະ ພະນັກງານຊ່ວຍວຽກ ປະຈໍາເຂດເລືອກຕັ້ງເມືອງ, ທັງນີ້ແມ່ນເພື່ອຮັບປະກັນໃຫ້ ສສຂ ແລະ ພະນັກງານຊ່ວຍວຽກຂັ້ນເມືອງມີຄວາມຮັບຮູ້, ເຂົ້າໃຈຕໍ່ພາລະບົດບາດ, ສິດ ແລະ ໜ້າທີ່ ຂອງຕົນ; ຮັບປະກັນການເປັນເສນາທິການທີ່ດີ ແລະ ເກັ່ງ ໃຫ້ແກ່ສະມາຊິກສະພາປະຊາຊົນແຂວງ ກໍ່ຄືການເປັນເສນາທິການຊ່ວຍວຽກງານຂອງສະພາປະຊາຊົນແຂວງ ໄດ້ຮັບປະສິດທິຜົນ-ມີຄຸນນະພາບ ແລະ ສໍາເລັດຕາມຄາດໝາຍໃນແຕ່ລະໄລຍະ.
ໃນຕອນທ້າຍປະທານກອງປະຊຸມໄດ້ຮຽກຮ້ອງມາຍັງພະນັກງານ ສພຂ ແລະ ພະນັກງານຊ່ວຍວຽກ ປະຈໍາເຂດເລືອກຕັ້ງ 7 ເມືອງ ຈົ່ງນຳເອົາເນື້ອ ແລະ ບົດຮຽນໃນການຝຶກອົບຮົມຄັ້ງນີ້ ໄປນໍາໃຊ້-ໝູນໃຊ້ ເຂົ້າໃນການ ເຄື່ອນໄຫວວຽກງານທີ່ຕົນຮັບຜິດຊອບໃນແຕ່ລະໄລຍະໃຫ້ປະສົບກັບຜົນສໍາເລັດເປັນຢ່າງດີ; ທ່ານຍັງໄດ້ສະແດງຄວາມຂອບໃຈ ຕໍ່ອົງການ ເຊກາ(CEGGA) ທີ່ໄດ້ໃຫ້ທຶນໃນການຈັດກອງປະຊຸມຝຶກອົບຮົມຄັ້ງນີ້, ຫວັງຢ່າງຍິ່ງວ່າອົງການດັ່ງກ່າວ ຍັງຈະສືບຕໍ່ໃຫ້ທຶນແກ່ພວກເຮົາອີກໃນອານາຄົດ.