(ສພຊ) – ເພື່ອປັບປຸງຮ່າງຄູ່ມື, ແບບໂຄງຮ່າງບົດຄົ້ນຄວ້າຄັດຫຍໍ້ກົດໝາຍ ແລະ ລາຍການປະເມີນ-ກວດກາຄຸນນະພາບການຄົ້ນຄວ້າຄັດຫຍໍ້ກົດໝາຍ, ວັນທີ 12-13 ຕຸລານີ້ ທີ່ເມືອງວັງວຽງ ແຂວງວຽງຈັນ, ສະຖາບັນຄົ້ນຄວ້ານິຕິກໍາສະພາແຫ່ງຊາດ (ສນສ) ໄດ້ຈັດກອງປະຊຸມສໍາມະນາປັບປຸງເນື້ອໃນຮ່າງຄູ່ມືການຄົ້ນຄວ້າບົດຄັດຫຍໍ້ກົດໝາຍ ໂດຍການເປັນປະທານຂອງທ່ານ ສິນທະລາ ຫຼ້າສຸກສະໄໝ ຫົວໜ້າສະຖາບັນຄົ້ນຄວ້ານິຕິກໍາ ເຊິ່ງມີຮອງຫົວໜ້າ ສນສ, ຫົວໜ້າ-ຮອງຫົວໜ້າກົມ ແລະ ສູນ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

            ກອງປະຊຸມສໍາມະນາຄັ້ງນີ້ ມີຄວາມໝາຍສໍາຄັນ ແລະ ຈໍາເປັນຢ່າງພາວະວິໄສ ເພາະວ່າວຽກງານຄົ້ນຄວ້າຄັດຫຍໍ້ຮ່າງກົດໝາຍເພື່ອເປັນຂໍ້ມູນໃຫ້ແກ່ຄະນະປະຈໍາສະພາແຫ່ງຊາດ ແລະ ສະມາຊິກສະພາແຫ່ງຊາດ ໃນການປະກອບຄໍາເຫັນ ແລະ ພິຈາລະນາຮັບຮອງເອົາກົດໝາຍຕ່າງໆໃນກອງປະຊຸມສະໄໝສາມັນຂອງສະພາແຫ່ງຊາດ; ນອກນັ້ນ ຍັງເພື່ອເປັນບ່ອນອີງພື້ນຖານໃນການເຄື່ອນໄຫວວຽກງານຕົວຈິງ, ເຮັດໃຫ້ເນື້ອໃນມີຄວາມຮັດກຸມ, ຄົບຖ້ວນ ແລະ ສົມບູນ ກ່ອນຈະນໍາໄປທາບທາມລະດົມຄວາມເຫັນຈາກພາກສ່ວນກ່ຽວຂ້ອງພາຍໃນສະພາແຫ່ງຊາດ (ສພຊ); ປຶກສາຫາລືການກໍານົດແຜນ ການຈັດກອງປະຊຸມທາບທາມລະດົມຄວາມເຫັນຈາກພາກສ່ວນກ່ຽວຂ້ອງພາຍໃນ ສພຊ ແລະ ພາຍນອກ.

            ທ່ານ ສິນທະລາ ຫຼ້າສຸກສະໄໝ ມີຄໍາເຫັນວ່າ: ຕະຫຼອດການຈັດຕັ້ງປະຕິບັດວຽກງານຄົ້ນຄວ້າຄັດຫຍໍ້ຂອງສະຖາບັນຄົ້ນຄວ້ານິຕິກໍາສະພາແຫ່ງຊາດ ແມ່ນຍັງບໍ່ທັນມີນິຕິກໍາເປັນບ່ອນອ້າງອີງໃນການຈັດຕັ້ງປະຕິບັດ ເປັນຕົ້ນການສະໜອງບົດຄົ້ນຄວ້າ, ຂໍ້ມູນການສົມທຽບກົດໝາຍໃຫ້ຄະນະປະຈໍາສະພາແຫ່ງຊາດ ແລະ ສະມາຊິກສະພາແຫ່ງຊາດ; ສະນັ້ນ, ຈຶ່ງຮຽກຮ້ອງໃຫ້ບັນດາທ່ານຜູ້ເຂົ້າຮ່ວມກອງປະຊຸມສຸມເນື້ອໃນຈິດໃຈໃນການປະກອບຄໍາເຫັນ, ແລກປ່ຽນກັບວິທະຍາກອນ ເພື່ອໃຫ້ຄູ່ມືສະບັບນີ້ເປັນວິທະຍາສາດໄປຕາມໂຄງຮ່າງ, ຮູບແບບ ແລະ ຈຸດພິເສດຂອງສະພາແຫ່ງຊາດ.

           ສໍາມະນາກອນໄດ້ຮັບຟັງການສະເໜີ ແລະ ແລກປ່ຽນຄວາມເຫັນຕໍ່ເນື້ອໃນສຳຄັນຄື: ຮ່າງຄູ່ມືການຄົ້ນຄວ້າຄັດຫຍໍ້ກົດໝາຍຂອງສະຖາບັນຄົ້ນຄວ້ານິຕິກຳສະພາແຫ່ງຊາດ, ແບບໂຄງຮ່າງບົດຄົ້ນຄວ້າຄັດຫຍໍ້ກົດໝາຍ, ລາຍການປະເມີນ-ກວດກາຄຸນນະພາບການຄົ້ນຄວ້າຄັດຫຍໍ້ກົດໝາຍ, ປຶກສາຫາລື ແລະ ກຳນົດແຜນຈັດກອງປະຊຸມທາບທາມລະດົມຄວາມ ຄິດເຫັນໃສ່ຮ່າງຄູ່ມືຈາກພາກສ່ວນກ່ຽວຂ້ອງພາຍໃນສະພາແຫ່ງຊາດ ແລະ ພາຍນອກ.

           ກອງປະຊຸມຄັ້ງນີ້ ໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານຈາກໂຄງການ STEPs ໂດຍຜ່ານກອງເລຂາຄຸ້ມຄອງແຫຼ່ງທຶນຊ່ວຍເຫຼືອລ້າໃຫ້ແກ່ສະພາແຫ່ງຊາດ.

(ບຸນເກີດ ວົງໄຊຍາ)