(ສພຊ) – ໃນລະຫວ່າງວັນທີ 24-25 ກໍລະກົດ 2024, ທ່ານ ປອ. ສຸລາພອນ ອິນທະວົງ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 13 ແຂວງສະຫວັນນະເຂດ ແລະ ທ່ານ ອຸດົມ ວົງໄກສອນ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 11 ແຂວງບໍລິຄໍາໄຊ ໄດ້ເຂົ້າຮ່ວມກອງປະຊຸມສໍາມະນາຮ່ວມຄັ້ງທີ 2 ລະຫວ່າງອົງການອາຫານ ແລະ ກະສິກຳ (FAO), ກອງເລຂາໄອປາ ແລະ ສະຖາບັນການພັດທະນາແບບຍືນຍົງສາກົນ (IISD) ກ່ຽວກັບການ ຈັດຕັ້ງປະຕິບັດຄໍາແນະນໍາຂອງອາຊຽນ ສໍາລັບການສົ່ງເສີມການລົງທຶນຢ່າງມີຄວາມຮັບຜິດຊອບ ໃນຂະແໜງການອາ ຫານ, ກະສິກໍາ ແລະ ປ່າໄມ້ (ASEAN RAI) ທີ່ບາຫຼີ, ປະເທດອິນໂດເນເຊຍ. ເຂົ້າຮ່ວມກອງປະຊຸມໃນຄັ້ງນີ້ ມີຄະ ນະຜູ້ແທນຈາກສະມັດຊາລັດຖະສະພາລະຫວ່າງຊາດອາຊຽນ ຫຼື ໄອປາ (AIPA) ເຊັ່ນ: ອິນໂດເນເຊຍ, ຫວຽດນາມ, ກຳປູເຈຍ, ມາເລເຊຍ, ຟີລິບປິນ; ນອກນັ້ນ, ຍັງມີຄະນະຜູ້ແທນຈາກລັດຖະສະພາ ຕີມໍ ແລັດສະເຕ, ກອງເລຂາໄອປາ, ກອງເລຂາອາຊຽນ ແລະ ບັນດາອົງການຈັດຕັ້ງສາກົນທີ່ເປັນຄູ່ຮ່ວມມື ASEAN RAI. ບັນດາຄະນະຜູ້ແທນທີ່ເຂົ້າຮ່ວມ ໄດ້ພ້ອມກັນທົບທວນຄືນ, ສົນທະນາ ແລະ ປຶກສາຫາລືກັນຢ່າງກົງໄປກົງມາ ແລະ ສ້າງສັນ ກ່ຽວກັບການຈັດ ຕັ້ງປະຕິບັດຄໍາແນະນໍາຂອງອາຊຽນ ສໍາລັບການສົ່ງເສີມການລົງທຶນຢ່າງມີຄວາມຮັບຜິດຊອບ ໃນຂະແໜງການອາຫານ, ກະສິກໍາ ແລະ ປ່າໄມ້.
ທ່ານ ປອ. ສຸລາພອນ ອິນທະວົງ ໄດ້ຕາງໜ້າໃຫ້ແກ່ຄະນະຜູ້ແທນສະພາແຫ່ງຊາດລາວ ລາຍງານ ແລະ ປະກອບຄຳເຫັນຕໍ່ຫົວຂໍ້: “ການເພີ່ມທະວີການຮ່ວມມືໃນພາກພື້ນ: ຊຸກຍູ້ວຽກງານການຄຸ້ມຄອງ ແລະ ຈັດຕັ້ງປະຕິບັດຄໍາແນະນໍາຂອງອາຊຽນ ສໍາລັບການສົ່ງເສີມການລົງທຶນຢ່າງມີຄວາມຮັບຜິດຊອບ ໃນຂະແໜງການອາຫານ, ກະສິກໍາ ແລະ ປ່າ ໄມ້ ຢ່າງມີປະສິດຜົນ” ເຊິ່ງຍົກໃຫ້ເຫັນເຖິງຄວາມພະຍາຍາມ ແລະ ເອົາໃຈໃສ່ ຂອງ ສປປລາວ ໃນການປັບປຸງ ແລະ ພັດ ທະນານິຕິກໍາ ໂດຍໄດ້ມີຂະບວນການທົບທວນ ແລະ ປະເມີນຜົນການຈັດຕັ້ງປະຕິບັດບັນດານິຕິກໍາທີ່ກ່ຽວຂ້ອງ ເປັນ ຕົ້ນ ກົດໝາຍວ່າດ້ວຍການສົ່ງເສີມການລົງທຶນ, ກົດໝາຍວ່າດ້ວຍກະສິກໍາ, ກົດໝາຍວ່າດ້ວຍສັດນໍ້າ ແລະ ການປະມົງ, ກົດໝາຍວ່າດ້ວຍຊົນລະປະທານ, ກົດໝາຍວ່າດ້ວຍປ່າໄມ້, ກົດໝາຍວ່າດ້ວຍອາຫານ, ກົດໝາຍວ່າດ້ວຍທີ່ດິນ ແລະ ນິຕິກໍາອື່ນທີ່ກ່ຽວຂ້ອງ ເພື່ອໃຫ້ສອດຄ່ອງກັບຄໍາແນະນໍາຂອງ ASEAN RAI. ພ້ອມກັນນັ້ນ, ທ່ານຍັງໄດ້ຍົກໃຫ້ເຫັນຄວາມສໍາຄັນ ແລະ ປະກອບຄໍາຄິດຄໍາເຫັນບາງຈຸດຕໍ່ກອງປະຊຸມຄື: 1) ການສ້າງຄວາມເຂັ້ມແຂງລົງເລິກວິຊາການສະ ເພາະດ້ານ ໂດຍຜ່ານການເຝິກອົບຮົມ, ສໍາມະນາວິຊາການ, ກອງປະຊຸມແລກປ່ຽນວິຊາການ, ແລກປ່ຽນ ແລະ ຖອດຖອນບົດຮຽນ ໃຫ້ແກ່ສະພາແຫ່ງຊາດ ແລະ ກະຊວງກ່ຽວຂ້ອງ ໃຫ້ມີຄວາມຮັບຮູ້ເຂົ້າໃຈເລິກເຊິ່ງ ແລະ ເປັນເອກະພາບກັບຄວາມສໍາຄັນຂອງຄໍາແນະນໍາຂອງ ASEAN RAI; 2) ເພີ່ມທະວີການໂຄສະນາເຜີຍແຜ່ຂໍ້ມູນຂ່າວສານ ໂດຍແມ່ນສະພາແຫ່ງຊາດ ເປັນເຈົ້າການເຜີຍແຜ່ໃຫ້ແກ່ທຸກພາກສ່ວນກ່ຽວຂ້ອງ ເຂົ້າໃຈ ແລະ ມີສ່ວນຮ່ວມໃນການຈັດຕັ້ງປະຕິບັດຄໍາແນະນໍາຂອງ ASEAN RAI ພ້ອມທັງຊຸກຍູ້ຕິດຕາມກວດກາການຈັດຕັ້ງປະຕິບັດ ແລະ ການປະເມີນຜົນເປັນແຕ່ລະໄລຍະ; 3) ເພີ່ມທະວີໃນການແບ່ງປັນ ແລະ ແລກປ່ຽນບົດຮຽນ, ປະສົບການ ແລະ ຂໍ້ມູນຂ່າວສານ ກັບບັນດາສະມາຊິກລັດຖະສະພາປະເທດອາຊຽນ, ອົງການຈັດຕັ້ງສາກົນ ແລະ ຄູ່ຮ່ວມພັດທະນາອື່ນທີ່ກ່ຽວຂ້ອງ ແລະ 4) ເພີ່ມທະວີໃນການຍາດແຍ່ງການຊ່ວຍເຫຼືອ ແລະ ຮ່ວມມືສາກົນ ທາງດ້ານທຶນຮອນ ແລະ ເຕັກນິກວິຊາການ ເພື່ອສະໜັບສະໜູນການເຄື່ອນໄຫວການສ້າງຄວາມເຂັ້ມແຂງໃຫ້ແກ່ສະມາຊິກສະພາແຫ່ງຊາດ ແລະ ສະມາຊິກສະພາປະຊາ ຊົນຂັ້ນແຂວງ ພ້ອມທັງວິຊາການຊ່ວຍວຽກຂອງສະພາແຫ່ງຊາດ ລວມທັງການຊຸກຍູ້ສົ່ງເສີມ ແລະ ຕິດຕາມກວດກາ ການຈັດຕັ້ງປະຕິບັດຄໍາແນະນໍາຂອງ ASEAN RAI ໃຫ້ມີປະສິດທິພາບ ແລະ ປະສິດທິຜົນ.
ນອກຈາກນີ້, ກອງປະຊຸມຍັງໄດ້ປັບປຸງບັນດາກິດຈະກໍາ, ເນື້ອໃນ ຂອງຮ່າງແຜນດໍາເນີນງານຂອງລັດຖະສະພາ ຕໍ່ການຈັດຕັ້ງປະຕິບັດຄໍາແນະນໍາຂອງ ASEAN RAI ພ້ອມທັງປະກອບຄໍາເຫັນຕໍ່ຊື່ຫົວຂໍ້ຂອງແຜນດໍາເນີນງານດັ່ງ ກ່າວໃຫ້ມີຄວາມເປັນເອກະພາບ ເພື່ອນໍາສະເໜີພິຈາລະນາຮັບຮອງຢູ່ກອງປະຊຸມວຽກງານດ້ານເສດຖະກິດ ໃນກອງປະ ຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຄັ້ງທີ 45 ທີ່ສະພາແຫ່ຊາດລາວ ຈະເປັນເຈົ້າພາບຈັດຂຶ້ນໃນເດືອນຕຸລານີ້.