(ສພຊ) – ກອງປະຊຸມເຝິກອົບຮົມວຽກງານການສ້າງເປັນຄູເຝິກໃຫ້ແກ່ພະນັກງານ-ລັດຖະກອນພາຍໃນກົມເລຂານຸການ, ຄະນະເລຂາທິການສະພາແຫ່ງຊາດ (ຄລສ) ພາຍໃຕ້ການເປັນປະທານຂອງທ່ານ ຄໍາສະໄໝ ສໍາມາວົງ ຫົວໜ້າກົມເລຂານຸການ ເຊິ່ງມີວິທະຍາກອນຈາກກະຊວງພາຍໃນເຂົ້າຮ່ວມ. ຈຸດປະສົງການເຝິກອົບຮົມແມ່ນເພື່ອຍົກສູງບົດບາດ, ໜ້າທີ່ຮັບຜິດຊອບ, ຄວາມຮູ້ ແລະ ຄວາມສາມາດ ແນໃສ່ປັບປຸງຄຸນນະພາບການເຄື່ອນ ໄຫວວຽກງານ ໂດຍສະເພາະການເປັນເສນາທິການໃຫ້ແກ່ ຄລສ ມີປະສິດທິພາບ ແລະ ປະສິດທິຜົນເພີ່ມຂຶ້ນ, ຮັບ ປະກັນຄວາມເປັນເອກະພາບໃນການຈັດຕັ້ງປະຕິບັດຕົວຈິງ ແລະ ສອດຄ່ອງຕາມລະບຽບຫຼັກການ; ເພື່ອຍົກລະ ດັບຄວາມຮູ້, ຮັດແໜ້ນຄວາມເຂົ້າໃຈ ແລະ ທັກສະດ້ານຕ່າງໆ ເພື່ອກະກຽມຄວາມພ້ອມໃນການເປັນຄູເຝິກວຽກງານການເປັນເສນາທິການດ້ານເນື້ອໃນໃຫ້ແກ່ກອງປະຊຸມສະພາແຫ່ງຊາດ ແລະ ຄະນະປະຈຳສະພາແຫ່ງຊາດ ເຊິ່ງກວມເອົາບັນດາຫຼັກການພື້ນຖານ ແລະ ທັກສະຈຳເປັນໃນການເປັນຄູເຝິກ ລວມທັງການອອກແບບ, ການຈັດຕັ້ງປະຕິບັດ ແລະ ການປະເມີນການເຝິກອົບຮົມ ທັງເປັນການຖອດຖອນບົດຮຽນ ແລະ ສົນທະນາແລກປ່ຽນຄວາມຄິດເຫັນໃນຂະບວນການເຄື່ອນໄຫວວຽກງານຕົວຈິງສົມທຽບກັບທິດສະດີ.
ຜູ້ເຂົ້າຮ່ວມໄດ້ຮັບຟັງການສະເໜີຫົວຂໍ້: ການຮຽນວິເຄາະຄວາມຕ້ອງການໃນການເຝິກອົບຮົມ; ຫຼັກການການຮຽນຮູ້ແບບຜູ້ໃຫຍ່; ການວາງແຜນການສອນ; ບົດບາດການເປັນຄູເຝິກ; ການສ້າງຄວາມໝັ້ນໃຈຂອງການເປັນຄູເຝິກ; ທັກສະໃນການເວົ້າ, ການຟັງ, ການສັງເກດ ແລະ ການສື່ສານໃນການເຝິກອົບຮົມ. ຈາກນັ້ນ, ໄດ້ຈັດແບ່ງກຸ່ມເພື່ອຄົ້ນຄວ້າເຮັດບົດເຝິກຫັດ, ທົດລອງຂຶ້ນນຳສະເໜີບົດຕົວຈິງ ໃຫ້ທີມງານຄູເຝິກມີຄຳຄິດຄຳເຫັນຕໍ່ບົດຕ່າງໆ ເພື່ອໃຫ້ນັກເຝິກອົບຮົມໄປປັບປຸງແກ້ໄຂບົດຂອງຕົນເອງ ໃຫ້ມີເນື້ອໃນທີ່ຖືກຕ້ອງຕາມຫຼັກການ ແລະ ມີຄຸນນະພາບ.
ທ່ານ ສິງຄຳ ວົງພະຈັນ ຮອງເລຂາທິການສະພາແຫ່ງຊາດ ໄດ້ມີຄຳເຫັນວ່າ: ກົມເລຂານຸການ ເປັນເສນາທິການດ້ານເນື້ອໃນ, ວຽກງານກະກຽມກອງປະຊຸມ ລວມເຖິງການສ້າງນິຕິກຳຕ່າງໆທີ່ພົວພັນກັບການເຄື່ອນໄຫວປະສານງານ ແລະ ຮັບໃຊ້ການນຳສະພາແຫ່ງຊາດ. ດັ່ງນັ້ນ, ພະນັກງານພາຍໃນກົມ ຕ້ອງໄດ້ເອົາໃຈໃສ່ຄົ້ນຄວ້າແນວທາງນະໂຍ ບາຍ, ກົດໝາຍ, ນິຕິກໍາຕ່າງໆທີ່ກ່ຽວຂ້ອງ ລວມທັງການກໍານົດ ແລະ ຈັດຕັ້ງຜັນຂະຫຍາຍບັນດາແຜນການ-ແຜນງານ, ໂຄງການຕ່າງໆ ໃຫ້ໄດ້ຮັບການຈັດຕັ້ງປະຕິບັດບັນລຸຜົນສໍາເລັດຕາມຄາດໝາຍທີ່ວາງໄວ້; ນອກນັ້ນ, ກໍຕ້ອງໄດ້ເອົາໃຈ ໃສ່ກະກຽມຮອບດ້ານແຕ່ຫົວທີ ເປັນຕົ້ນການສ້າງແຜນການ, ບົດລາຍງານຂໍທິດຊີ້ນໍາດ້ານເນື້ອໃນ, ການຮ່າງມະຕິດໍາເນີນກອງປະຊຸມ, ແຈ້ງການຫາພາກສ່ວນຕ່າງໆກະກຽມເນື້ອໃນ, ເຮັດວຽກງານຮ່ວມກັບພາກສ່ວນກ່ຽວຂ້ອງ ແລະ ກະ ກຽມບັນດາເອກະສານສໍາຄັນໃຫ້ສໍາເລັດ.
ເຝິກອົບຮົມຄັ້ງນີ້ ຈັດຂຶ້ນໃນວັນທີ 27-29 ກັນຍາຜ່ານມາ ທີ່ເມືອງແກ້ວອຸດົມ ແຂວງວຽງຈັນ ເຊິ່ງໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານຈາກມູນນິທິເອເຊຍ (The Asia Foundation) ໂດຍຜ່ານກອງເລຂາຄຸ້ມຄອງແຫຼ່ງທຶນຊ່ວຍເຫຼືອລ້າໃຫ້ແກ່ສະພາແຫ່ງຊາດ ສົມທົບກັບງົບປະມານຂອງ ຄລສ.
(ອານຸສອນ ພູມມີທອນ)