(ສພຊ) – ກອງປະຊຸມເຝິກອົບຮົມການສ້າງເປັນຄູເຝິກວຽກງານການບໍລິຫານອົງກອນ ແລະ ບຸກຄະລາກອນ ໃຫ້ແກ່ພະນັກງານກົມຈັດຕັ້ງ-ພະນັກງານ, ຄະນະເລຂາທິການສະພາແຫ່ງຊາດ (ຄລສ) ໄດ້ຈັດຂຶ້ນໃນວັນທີ 02-04 ສິງ ຫານີ້ ທີ່ເມືອງແກ້ວອຸດົມ ແຂວງວຽງຈັນ ໂດຍການເປັນປະທານຂອງທ່ານ ນາງ ອໍາໄພວອນ ລ້ອມບຸນແພງ ເລຂາທິ ການສະພາແຫ່ງຊາດ ເຊິ່ງນັກເຝິກອົບຮົມໄດ້ຮັບຟັງການສະເໜີຫຼັກສູດການເປັນຄູເຝິກທັງໝົດ 3 ພາກ ຄື: ພາກທີ 1 ພື້ນຖານການເຝິກອົບຮົມ 10 ຫົວຂໍ້, ພາກທີ 2 ການອອກແບບ ແລະ ການເຝິກອົບຮົມ 6 ຫົວຂໍ້ ແລະ ພາກທີ 3 ການທົດລອງເຝິກອົບຮົມຕົວຈິງ 2 ຫົວຂໍ້ ຈາກບັນດາອາຈານທີ່ມີຄວາມຊ່ຽວຊານທາງດ້ານການບໍລິຫານອົງກອນ ແລະ ບຸກຄະລາກອນ ຂອງກະຊວງພາຍໃນ.

ທັງນີ້, ກໍເພື່ອຍົກສູງບົດບາດ, ໜ້າທີ່ຮັບຜິດຊອບ, ຄວາມຮູ້ ແລະ ຄວາມສາມາດ ໃຫ້ແກ່ພະນັກງານ-ລັດຖະ ກອນຂອງກົມຈັດຕັ້ງ-ພະນັກງານ ແນໃສ່ປັບປຸງຄຸນນະພາບການເຄື່ອນໄຫວວຽກງານ ໂດຍສະເພາະການເປັນເສນາທິການໃຫ້ແກ່ ຄລສ ມີປະສິດທິພາບ ແລະ ປະສິດທິຜົນເພີ່ມຂຶ້ນ, ຮັບປະກັນຄວາມເປັນເອກະພາບໃນການຈັດຕັ້ງປະຕິ ບັດຕົວຈິງ ແລະ ສອດຄ່ອງຕາມລະບຽບຫຼັກການ; ຍົກສູງຄວາມຮູ້, ຮັດແໜ້ນຄວາມເຂົ້າໃຈ ແລະ ທັກສະດ້ານຕ່າງໆ ເພື່ອກະກຽມຄວາມພ້ອມໃນການເປັນຄູເຝິກວຽກງານການບໍລິຫານອົງກອນ ແລະ ການບໍລິຫານບຸກຄະລາກອນ ເຊິ່ງກວມເອົາບັນດາຫຼັກການພື້ນຖານ ແລະ ທັກສະຈໍາເປັນໃນການເປັນຄູເຝິກ ລວມທັງການອອກແບບ, ການຈັດຕັ້ງປະຕິ ບັດ ແລະ ການປະເມີນການເຝິກອົບຮົມ ທັງເປັນການຖອດຖອນບົດຮຽນ ແລະ ສົນທະນາແລກປ່ຽນຄວາມຄິດເຫັນໃນຂະບວນການເຄື່ອນໄຫວວຽກງານຕົວຈິງສົມທຽບກັບທິດສະດີ.
ທ່ານ ນາງ ອໍາໄພວອນ ລ້ອມບຸນແພງ ມີຄໍາເຫັນວ່າ: ການສ້າງ ຫຼື ພັດທະນາບຸກຄະລາກອນໃຫ້ກາຍເປັນຄູເຝິກ ຫຼື ເປັນຊ່ຽວຊານສະເພາະດ້ານ ເປັນປັດໄຈໜຶ່ງທີ່ສຳຄັນໃນການພັດທະນາອົງກອນ ກໍຄືຍົກສູງບົດບາດ ເພື່ອການຂັບເຄື່ອນວຽກງານລວມຂອງສະພາແຫ່ງຊາດ ໃຫ້ມີທ່າກ້າວທີ່ເຂັ້ມແຂງຂຶ້ນ, ເຊິ່ງກົມຈັດຕັ້ງ-ພະນັກງານ ແມ່ນກົງຈັກການ ຈັດຕັ້ງໜຶ່ງທີ່ມີບົດບາດສຳຄັນໃນການບຳລຸງກໍ່ສ້າງ ແລະ ພັດທະນາບຸກຄະລາກອນຂອງສະພາແຫ່ງຊາດ ໃຫ້ກາຍເປັນບຸກຄະລາກອນທີ່ມີຄຸນນະພາບ ແລະ ສາມາດປະກອບສ່ວນວຽກງານເຂົ້າໃນຂົງເຂດວິຊາສະເພາະຕ່າງໆໄດ້ຢ່າງມີປະສິດທິ ພາບ.
ບັນດານັກເຝິກອົບຮົມ ໄດ້ເອົາໃຈໃສ່ຕິດຕາມຮັບຟັງການສະເໜີ, ຄົ້ນຄວ້າ, ແລກປ່ຽນຄໍາເຫັນຕໍ່ເນື້ອໃນຫົວຂໍ້ຕ່າງໆທີ່ວິທະຍາກອນນຳມາສະເໜີ ເພື່ອສາມາດເປັນຄູເຝິກທີ່ມີຄຸນນະພາບ ປະກອບສ່ວນເຮັດໃຫ້ວຽກງານບໍລິຫານອົງກອນ ແລະ ບຸກຄະລາກອນ ມີປະສິດທິພາບ, ປະສິດທິຜົນສູງຂຶ້ນ.
ກອງປະຊຸມເຝິກອົບຮົມຄັ້ງນີ້ ໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານຈາກໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຫຼື ສະເຕັບສ໌ (STEPs) ໂດຍຜ່ານກອງເລຂາຄຸ້ມຄອງແຫຼ່ງທຶນຊ່ວຍເຫຼືອລ້າໃຫ້ແກ່ສະພາແຫ່ງຊາດ ສົມທົບ​ກັບງົບປະມານ​ຂອງ​ຄະນະ​ເລຂາທິການ​ສະພາ​ແຫ່ງ​ຊາດ.
(ສອນສັກ ວັນວິໄຊ)