(ສພຊ) – ວັນທີ 27-28 ມັງກອນນີ້ ທີ່ເມືອງແກ້ວອຸດົມ ແຂວງວຽງຈັນ ໄດ້ມີກອງປະຊຸມສຳມະນາສ້າງຄວາມເຂັ້ມແຂງໃຫ້ແກ່ວຽກງານຄະນະເລຂາທິການສະພາແຫ່ງຊາດ (ຄລສ) ໂດຍການເປັນປະທານຂອງທ່ານ ນາງ ອຳໄພວອນ ລ້ອມບຸນແພງ ກຳມະການສຳຮອງສູນກາງພັກ, ເລຂາທິການສະພາແຫ່ງຊາດ ແລະ ທ່ານ ສິງຄຳ ວົງພະຈັນ ຮອງເລຂາທິການສະພາແຫ່ງຊາດ ເຊິ່ງມີບັນດາທ່ານຮອງປະທານກຳມາທິ ການ, ຮອງເລຂາທິການ, ຮອງຫົວໜ້າສະຖາບັນຄົ້ນຄວ້ານິຕິກຳສະພາແຫ່ງຊາດ (ສພຊ); ເລຂາທິການ-ຮອງເລຂາທິການສະພາປະຊາຊົນແຂວງ-ນະຄອນຫຼວງ ພ້ອມດ້ວຍຄະນະກົມ, ສູນ ແລະ ຫ້ອງການ; ຄະນະພະແນກ ແລະ ລັດຖະກອນຈາກ ສພຊ ເຂົ້າຮ່ວມ 120 ກວ່າທ່ານ.

ຜູ້ເຂົ້າຮ່ວມໄດ້ຮັບຟັງການການເຜີຍແຜ່ຂໍ້ຕົກລົງເພີ່ມຕື່ມວ່າດ້ວຍການປັບ ປຸງບາງມາດຕາຂອງຂໍ້ຕົກລົງວ່າດ້ວຍກຳນົດໝາຍການໃຊ້ຈ່າຍງົບປະມານຂອງລັດ, ການປະຢັດ ແລະ ຕ້ານການຟຸຍເຟືອຍ ສະບັບເລກທີ 0012/ກງ, ລົງວັນທີ 03 ມັງ ກອນ 2025 ແລະ ຄຳແນະນຳວ່າດ້ວຍການປັບປຸງເງິນອຸດໜູນ ແລະ ເງິນນະໂຍບາຍຕ່າງໆ ສະບັບເລກທີ 4524/ກງ, ລົງວັນທີ 13 ທັນວາ 2024 ສະເໜີໂດຍທ່ານ ເອກກະໄຊ ພູທອນສີ ຮອງຫົວໜ້າກົມງົບປະມານ, ກະຊວງການເງິນ; ສະພາບລວມການ ຂຶ້ນແຜນກິດຈະກຳຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ (ສພຂ) ທີ່ຈະນຳສະເໜີຜູ້ໃຫ້ທຶນພິຈາລະນາໃນປີ 2025, ລະບຽບການເງິນຂອງໂຄງການສະ ໜັບສະໜູນ ສພຊ ແລະ ສພຂ, ການຂຽນແຜນກິດຈະກຳ ແລະ ບົດລາຍງານຜົນສຳ ເລັດທີ່ນຳໃຊ້ງົບປະມານໂຄງການ ສະເໜີໂດຍພະນັກງານໂຄງການຊ່ວຍເຫຼືອສະພາແຫ່ງຊາດ; ນິຕິກຳກ່ຽວກັບການຂຽນ-ການກຳນົດຕຳແໜ່ງງານໃນຂົງເຂດຂອງ ສພຊ ແລະ ສພຂ ສະເໜີໂດຍທ່ານ ພອນປະເສີດ ກຸລະວົງ ຮອງຫົວໜ້າກົມພັດທະ ນາການບໍລິຫານລັດ, ກະຊວງພາຍໃນ; ນິຕິກຳກ່ຽວກັບການສ້າງແຜນການລົງທຶນຂອງລັດໃນຂົງເຂດຂອງ ສພຊ ແລະ ສພຂ ສະເໜີໂດຍທ່ານ ປອ. ຈັນຕະນາພອນ ວົງໄຊ ຮອງຫົວໜ້າກົມແຜນການ, ກະຊວງແຜນການ ແລະ ການລົງທຶນ. ຈາກນັ້ນ, ບັນດາຜູ້ເຂົ້າຮ່ວມກໍໄດ້ແລກປ່ຽນບົດຮຽນ ແລະ ປະກອບຄໍາເຫັນໃສ່ບັນດາເນື້ອໃນທີ່ນໍາສະເໜີ ແລະ ປຶກສາຫາລື ເພື່ອຍົກໃຫ້ເຫັນດ້ານດີ, ດ້ານອ່ອນ, ສາເຫດ ແລະ ສະ ເໜີວິທີການແກ້ໄຂຢ່າງກົງໄປກົງມາ ເຊິ່ງຈະເປັນຂໍ້ມູນນໍາໄປປັບປຸງໃນຕໍ່ໜ້າ.

ກອງປະຊຸມຄັ້ງນີ້ ໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານຈາກມູນນິທິເອເຊຍ (The Asia Foundation – TAF) ໂດຍຜ່ານກອງເລຂາຄຸ້ມ ຄອງແຫຼ່ງທຶນຊ່ວຍເຫຼືອລ້າໃຫ້ແກ່ສະພາແຫ່ງຊາດ ສົມທົບກັບງົບປະມານຂອງຄະນະເລຂາທິການສະພາແຫ່ງຊາດ.

(ຂ່າວ: ນາງ ສຸພາວັນ ຫອມສະນິດ; ພາບ: ສອນສັກ ວັນວິໄຊ)