(ສພຊ) ກອງປະຊຸມເຝິກອົບຮົມສ້າງຄວາມເຂັ້ມແຂງໃຫ້ແກ່ບຸກຄະລາກອນຂອງກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ (ກສຕສ) ສະພາແຫ່ງຊາດ ແລະ ບຸກຄະລາກອນຂອງຄະນະກຳມະການເສດຖະກິດ, ແຜນການ ແລະ ການເງິນ (ຄສຜງ) ຂອງສະພາປະຊາຊົນຂັ້ນແຂວງ ນັບແຕ່ເຂດທີ 1-10 ປະຈຳປີ 2021 ໄດ້ໄຂຂຶ້ນຢ່າງເປັນທາງການໃນຕອນເຊົ້າວັນທີ 12 ມັງກອນ 2022 ທີ່ເມືອງວັງວຽງ ແຂວງວຽງຈັນ ພາຍໃຕ້ການເປັນປະທານຂອງທ່ານ ລິນຄຳ ດວງສະຫວັນ ປະທານ ກສຕສ; ເຂົ້າຮ່ວມມີບັນດາທ່ານຮອງປະທານ, ຄະນະກົມ, ຄະນະພະແນກ ແລະ ວິຊາການທີ່ສັງກັດ ກສຕສ ຂອງສະພາແຫ່ງຊາດ ແລະ ຄສຜງ ຂອງສະພາປະຊາຊົນຂັ້ນແຂວງ.

        ​ທ່ານ ລິນຄຳ ດວງສະຫວັນ ໄດ້ມີຄຳເຫັນກ່າວເປີດກອງຊຸມວ່າ:    ກອງປະຊຸມໃນຄັ້ງນີ້ ແມ່ນປະຕິບັດຕາມແຜນການເຄື່ອນໄຫວວຽກງານປະຈຳປີ 2021 ໃນການສ້າງຄວາມເຂັ້ມແຂງໃຫ້ແກ່ ກສຕສ ຂອງສະພາແຫ່ງຊາດແລະ ຄສຜງ ສະພາປະຊາຊົນຂັ້ນແຂວງ 10 ແຂວງ ເພື່ອເປັນການຍົກລະດັບຄວາມອາດສາມາດໃຫ້ພະນັກງານ-ລັດຖະກອນ ທີ່ເປັນເສນາທິການໃຫ້ແກ່ສະພາແຫ່ງຊາດ ໃຫ້ມີຄວາມຮັບຮູ້, ເຂົ້າໃຈ, ກໍາໄດ້ເນື້ອໃນ, ຂັ້ນຕອນກະກຽມເອກະສານ, ໃນຫົວຂໍ້ທີ່ໄດ້ເຝິກອົບຮົມ ແລະ ສາມາດນຳໄປຈັດຕັ້ງປະຕິບັດເຂົ້າໃນວຽກງານຕົວຈິງ ໃຫ້ມີປະສິດທິພາບ ແລະ ປະສິດທິຜົນຕາມລະດັບຄາດໝາຍ ເພື່ອຮັບປະກັນໃຫ້ແກ່ການເປັນເສນາທິການໃຫ້ກຳມາທິການ ແລະ ຄະນະກຳມະການຂອງຕົນ ກໍຄືຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ.

        ​ກອງປະຊຸມຄັ້ງນີ້, ຈະໄດ້ຮັບຟັງຫລາຍບັນຫາທີ່ສຳຄັນ ເຊິ່ງຈະດຳເນີນໄປເປັນເວລາ 3 ວັນຈຶ່ງຈະສຳເລັດ.

(ພາບ ແລະ ຂ່າວ: ນາງ ປາກາລັກ ພົມມີໄຊ)