(ສພຊ) – ກອງປະຊຸມສ້າງຄວາມເຂັ້ມແຂງໃຫ້ແກ່ພະນັກງານ-ລັດຖະກອນຂອງກຳມາທິການວັດທະນະທຳ-ສັງຄົມ (ກວທສ) ແລະ ຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ ຂອງສະພາປະຊາຊົນຂັ້ນແຂວງ(ສພຂ) ໄດ້ໄຂຂຶ້ນໃນວັນທີ 28 ເມສາ 2024 ທີ່ເມືອງວັງວຽງ, ແຂວງວຽງຈັນ ພາຍໃຕ້ການເປັນປະທານຂອງທ່ານ ນາງ ທຸມມາລີ ວົງພະຈັນ ຄະນະປະຈຳສະພາແຫ່ງຊາດ, ປະທານ ກວທສ; ໂດຍການເຂົ້າຮ່ວມ ແລະ ເປັນວິທະຍາກອນຂອງທ່ານ ສຸບັນ ສະວະບຸດ ຄະນະປະຈຳສະພາແຫ່ງຊາດ, ປະທານກຳມາທິການວຽກງານສະມາຊິກສະພາແຫ່ງຊາດ,ບັນດາທ່ານຮອງປະທານກຳມາທິການ, ຮອງເລຂາທິການ, ບັນດາທ່ານຫົວໜ້າກົມ-ຮອງຫົວໜ້າກົມພາຍໃນສະພາແຫ່ງຊາດ ພ້ອມດ້ວຍສຳມະນາກອນທີ່ເປັນພະນັກງານ-ລັດຖະກອນຂອງ ກວທສ ແລະ ຄະນະກຳມະການວັດທະນະທຳ-ສັງ ຄົມ ແລະ ບັນດາເຜົ່າ ສພຂ ເຂົ້າຮ່ວມ.

ທ່ານ ນາງ ທຸມມາລີ ວົງພະຈັນ ໄດ້ມີຄຳເຫັນກ່າວເປີດກອງປະຊຸມວ່າ: ເພື່ອເປັນການຍົກລະດັບຄວາມຮູ້, ຄວາມເຂົ້າໃຈ ແລະ ຂີດຄວາມສາມາດໃນການຮ່າງບັນດາເອກະສານປະເພດຕ່າງໆ ຮັບໃຊ້ແກ່ວຽກງານດ້ານວິຊາສະ ເພາະ ກໍຄືບັນດາເອກະສານຮັບໃຊ້ໃຫ້ແກ່ກອງປະຊຸມສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໃຫ້ເປັນວິທະ ຍາສາດ ແລະ ເປັນມືອາຊີບຂຶ້ນ, ກຳມາທິການວັດທະນະທຳ-ສັງຄົມ ຈຶ່ງໄດ້ຈັດກອງກອງປະຊຸມສ້າງຄວາມເຂັ້ມແຂງຍົກລະດັບໃຫ້ແກ່ພະນັກງານ-ລັດຖະກອນຂອງຕົນ ແລະ ຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າຂອງສະພາປະຊາຊົນຂັ້ນແຂວງ ປະຈຳປີ 2024. ກອງປະຊຸມຄັ້ງນີ້ຈະໄດ້ຮັບຟັງບົດຮຽນສຳຄັນເປັນຕົ້ນແມ່ນ ບົດຮຽນການຮ່າງບົດສະຫຼຸບປະຈຳເດືອນ, ບົດລາຍງານຜົນສຳເລັດຂອງກອງປະຊຸມ ແລະ ຮ່າງບົດຄຳເຫັນຂອງການນຳຕໍ່ກອງປະຊຸມປະເພດຕ່າງໆ; ຮ່າງບົດບັນທຶກກອງປະຊຸມ ແລະ ບົດສັງລວມຄຳເຫັນປະທານກອງປະຊຸມ; ຮ່າງຄຳຖາມເຈາະຈີ້ມ ແລະ ຄຳຊັກຖາມ; ຮ່າງແຈ້ງການເຊີນ ແລະ ຄຳແນະນຳ; ການຄົ້ນຄວ້າ ແລະ ປະກອບຄຳເຫັນຕໍ່ການສ້າງ ແລະ ປັບປຸງກົດໝາຍ; ການປະກອບຄຳເຫັນຕໍ່ແຜນພັດທະນາເສດຖະກິດ-ສັງຄົມແຫ່ງຊາດ ແລະ ຂອງແຂວງ; ຮ່າງແຜນການຕິດ ຕາມກວດກາປົກກະຕິ, ຫົວຂໍ້ສະເພາະ ແລະ ບັນຫາພົ້ນເດັ່ນເຄັ່ງຮ້ອນ ເປັນຕົ້ນການສ້າງແຜນການ, ການສ້າງຄໍາຖາມເຈາະຈີ້ມ ແລະ ການລາຍງານຜົນການຕິດຕາມກວດກາ.

(ພາບ ແລະ ຂ່າວ: ສອນສັກ ວັນວິໄຊ)