(ສພຊ) ເພື່ອເຮັດໃຫ້ພະນັກງານ-ວິຊາການ ຍຸຕິທຳ, ປ້ອງກັນຊາດ-ປ້ອງກັນຄວາມສະຫງົບ (ປກຊ-ປກສ) ສະ ພາປະຊາຊົນຂັ້ນແຂວງ (ສພຂ), ສະພາແຫ່ງຊາດ (ສພຊ) ແລະ ອົງການທີ່ກ່ຽວຂ້ອງ ຮັບຮູ້ເຂົ້າໃຈຢ່າງເລິກເຊິ່ງກ່ຽວກັບວຽກງານການສ້າງ ແລະ ປັບປຸງກົດໝາຍ, ນິຕິກຳໃຕ້ກົດໝາຍ; ການໂຄສະນາເຜີຍແຜ່, ການປະເມີນຜົນການຈັດຕັ້ງປະ ຕິບັດກົດໝາຍ ເພື່ອເປັນເສນາທິການທາງດ້ານວຽກງານດັ່ງກ່າວໃຫ້ການນໍາຂອງຕົນ ໄດ້ຢ່າງມີຄຸນນະພາບສູງ ແລະ ສາ ມາດນໍາເອົາບົດຮຽນດັ່ງກ່າວໄປໝູນໃຊ້ເຂົ້າໃນການປະຕິບັດໜ້າທີ່ວຽກງານຕົວຈິງ ໄດ້ຢ່າງມີປະສິດທິຜົນ ແລະ ເພື່ອເຮັດໃຫ້ການປະສານງານໃນການຈັດຕັ້ງປະຕິບັດວຽກງານການສ້າງ ແລະ ປັບປຸງກົດໝາຍ, ນິຕິກຳໃຕ້ກົດໝາຍ; ການໂຄ ສະນາເຜີຍແຜ່, ການປະເມີນຜົນການຈັດຕັ້ງປະຕິບັດກົດໝາຍ ລະຫວ່າງກຳມາທິການຍຸຕິທຳ, ກຳມາທິການ ປກຊ-ປກສ ກັບ ອົງການທີ່ກ່ຽວຂ້ອງ ໃຫ້ມີຄວາມຖືກຕ້ອງຕາມກົດໝາຍກໍານົດ ແລະ ໄປຕາມທິດທາງລວງດຽວກັນ. ກຳມາທິການຍຸຕິທໍາ ຮ່ວມກັບກຳມາທິການປ້ອງກັນຊາດ-ປ້ອງກັນຄວາມສະຫງົບ ໄດ້ຈັດກອງປະຊຸມເຝິກອົບຮົມສ້າງຄວາມເຂັ້ມແຂງກ່ຽວກັບວຽກງານການສ້າງ ແລະ ປັບປຸງກົດໝາຍ, ນິຕິກຳໃຕ້ກົດໝາຍ; ການໂຄສະນາເຜີຍແຜ່, ການປະເມີນຜົນການຈັດຕັ້ງປະຕິບັດກົດໝາຍ ໃຫ້ແກ່ພະນັກງານ-ວິຊາການ ຍຸຕິທຳ, ປກຊ-ປກສ ຂອງ ສພຂ, ສພຊ ແລະ ອົງການທີ່ກ່ຽວຂ້ອງ ໃນລະຫວ່າງວັນທີ 18-19 ມັງກອນ 2024 ທີ່ເມືອງວັງວຽງ ແຂວງວຽງຈັນ ໂດຍການເປັນປະທານຮ່ວມຂອງທ່ານ ຄຳແພງ ວິລະພັນ ປະທານກຳມາທິການຍຸຕິທຳ ແລະ ທ່ານ ພົຕ. ປອ. ວົງສັກ ພັນທະວົງ ປະທານກຳມາທິການປ້ອງກັນຊາດ-ປ້ອງກັນຄວາມສະຫງົບ; ເຂົ້າຮ່ວມມີບັນດາທ່ານຮອງປະທານກຳມາທິການຍຸຕິທຳ, ຮອງປະທານກຳ ມາທິການ ປກຊ-ປກສ, ປະທານ-ຮອງປະທານຄະນະກຳມະການຍຸຕິທຳ ແລະ ປກຊ-ປກສ ຈາກ 18 ເຂດເລືອກຕັ້ງ, ກະຊວງປ້ອງກັນປະເທດ, ກະຊວງປ້ອງກັນຄວາມສະຫງົບ, ສະຫະພັນນັັກຮົບເກົ່າ, ຄະນະກົມ, ຄະນະພະແນກ ພ້ອມດ້ວຍພະນັກງານ-ວິຊາການຈາກກຳມາທິການຍຸຕິທຳ, ກຳມາທິການ ປກຊ-ປກສ ແລະ ຄະນະກຳມະການຍຸຕິທຳ ແລະ ປກຊ-ປກສ.

ໃນກອງປະຊຸມໄດ້ຮັບຟັງການສະເໜີຫົວຂໍ້ຄື: ຍົກສູງວຽກງານສ້າງ ແລະ ປັບປຸງກົດໝາຍ, ນິຕິກຳໃຕ້ກົດໝາຍຂົງເຂດວຽກງານປ້ອງກັນຊາດ-ປ້ອງກັນຄວາມ; ບົດຮຽນການສ້າງ ແລະ ປັບປຸງກົດໝາຍວ່າດ້ວຍການແກ້ໄຂຄຳຮ້ອງທຸກ ແລະ ການຜັນຂະຫຍາຍເນື້ອໃນບັນດາມາດຕາຂອງກົດໝາຍອອກເປັນນິຕິກຳໃຕ້ກົດໝາຍ; ບົດຮຽນກ່ຽວກັບຂັ້ນຕອນ ແລະ ວິທີການປະເມີນຜົນການຈັດຕັ້ງປະຕິບັດກົດໝາຍຂົງເຂດວຽກງານປ້ອງກັນຊາດ-ປ້ອງກັນຄວາມສະຫງົບ; ພ້ອມກັນນັ້ນ, ກອງປະຊຸມຍັງໄດ້ຮັບຟັງການເຜີຍແຜ່ຄຳແນະນຳວ່າດ້ວຍການສະຫຼຸບຕີລາຄາການໂຄສະນາເຜີຍແຜ່ກົດໝາຍ, ຄຳແນະນຳການສ້າງແຜນການສ້າງ ແລະ ປັບປຸງກົດໝາຍ ໄລຍະ 2026-2030, ມະຕິຂອງຄະນະປະຈຳສະພາແຫ່ງຊາດ ວ່າດ້ວຍການຕິດຕາມກວດກາການຜັນຂະຫຍາຍມາດຕາຂອງກົດໝາຍ ທີ່ກຳນົດໃຫ້ອອກເປັນນິຕິກຳໃຕ້ກົດໝາຍ.

ທ່ານ ຄຳແພງ ວິລະພັນ ໄດ້ມີຄຳເຫັນວ່າ: ບັນດາເນື້ອໃນທີ່ນຳມາເຝິກອົບຮົມ ແລະ ເຜີຍແຜ່ໃນກອງປະຊຸມຄັ້ງນີ້ ມີຄວາມໝາຍສຳຄັນ ເຖິງວ່າຈະມີເວລາຈຳກັດ; ສະນັ້ນ, ເພື່ອເຮັດໃຫ້ບັນດາເນື້ອໃນຂອງກອງປະຊຸມໄດ້ຮັບການຄົ້ນ ຄວ້າຢ່າງເລິກເຊິ່ງ ຮຽກຮ້ອງມາຍັງບັນດາທ່ານຄະນະນຳ, ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ, ຜູ້ແທນກອງປະຊຸມ ຈົ່ງນໍາໃຊ້ສິດປະຊາທິປະໄຕ ແລະ ເຊີດຊູຄວາມຮັບຜິດຊອບການເມືອງຂອງຕົນຕໍ່ກັບບັນດາເນື້ອໃນທີ່ນຳມາຄົ້ນຄວ້າ, ແລກປ່ຽນຄຳເຫັນ ແລະ ເຊື່ອມຊຶມ ຢ່າງກົງໄປກົງມາ ດ້ວຍເຫດ, ດ້ວຍຜົນ ເພື່ອເຮັດໃຫ້ບັນດາເນື້ອໃນຕ່າງໆນັ້ນ ສາມາດນຳໄປຈັດຕັ້ງຜັນຂະຫຍາຍໃນການຈັດຕັ້ງປະຕິບັດໜ້າທີ່ວຽກງານໃນຕໍ່ໜ້າ ໃຫ້ມີຜົນສຳເລັດຫຼາຍຂຶ້ນກວ່າເກົ່າ ເພື່ອຮັບປະກັນສິດສະເໝີພາບຕໍ່ໜ້າກົດໝາຍຂອງປະຊາຊົນ ເຮັດໃຫ້ສັງຄົມມີຄວາມສະຫງົບ ເປັນລະ ບຽບຮຽບຮ້ອຍ, ເຮັດໃຫ້ການຄຸ້ມຄອງລັດ ຄຸ້ມຄອງເສດຖະກິດ-ສັງຄົມ ມີຄວາມຍຸຕິທຳ ແລະ ໂປ່ງໃສ.

ຈາກນັ້ນ, ບັນດາຜູ້ເຂົ້າຮ່ວມໄດ້ສົນທະນາແລກປ່ຽນບົດຮຽນ ແລະ ແກ້ຂໍ້ຂ້ອງໃຈໃນແຕ່ລະຫົວຂໍ້ທີ່ທາງກອງປະ ຊຸມໄດ້ຍົກຂຶ້ນມາ.

​ກອງ​ປະຊຸມຄັ້ງນີ້ ໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານສົມທົບຈາກໂຄງການສ້າງຄວາມເຂັ້ມແຂງໃຫ້ແກ່ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ (STEPs).

(ພາບ ແລະ ຂ່າວ: ນາງ ສຸພາວັນ ຫອມສະນິດ)