(ສພຊ) ເພື່ອເປັນການສ້າງຄວາມເຂັ້ມແຂງໃຫ້ແກ່ບຸກຄະລາກອນຂອງກົມສື່ມວນຊົນ ທາງດ້ານເຕັກນິກ ແລະ ເນື້ອໃນວຽກງານສື່ມວນຊົນ, ເປັນຕົ້ນວຽກງານການຂຽນຂ່າວ, ບົດ ແລະ ການຕັດຕໍ່ວິດີໂອເຂົ້າໃນລາຍການໂທລະພາບ ແລະ ສື່ອອນລາຍ; ບຳລຸງຍົກລະດັບຄວາມຮູ້, ຄວາມສາມາດ, ປະສົບການ, ຄວາມເຂົ້າໃຈດ້ານວຽກງານສື່ມວນຊົນ ແລະ ເພື່ອຮັບປະກັນຄຸນນະພາບທາງດ້ານຂໍ້ມູນ-ຂ່າວສານຂອງສະພາແຫ່ງຊາດ ໃຫ້ມີປະສິດທິພາບ ແລະ ປະສິດທິຜົນ ສາມາດຕອບສະໜອງໄດ້ໜ້າທີ່ວຽກງານຂອງສະພາແຫ່ງຊາດ ແລະ ເພື່ອເປັນການສຳມະນາບົດຮຽນດ້ານເຕັກນິກ, ແລກປ່ຽນທາງດ້ານວຽກງານການຂຽນຂ່າວ-ບົດ ແລະ ວິທີການແກ້ໄຂບັນຫາຕ່າງໆ ໃນການປະຕິບັດວຽກງານສື່ມວນຊົນໃນຕົວຈິງ ໃນລະຫວ່າງວັນທີ 17-18 ມິຖຸນາ 2023 ກົມສື່ມວນຊົນ ຄະນະເລຂາທິການສະພາແຫ່ງຊາດ ໄດ້ຈັດກອງປະຊຸມສໍາມະນາສ້າງຄວາມເຂັ້ມແຂງ ໃຫ້ລັດຖະກອນພາຍໃນກົມສື່ມວນຊົນ ກ່ຽວກັບການຈັດລາຍການສົນທະນາ ແລະ ວຽກງານສື່ອອນລາຍຂອງສະພາແຫ່ງຊາດ ໂດຍການເປັນປະທານຂອງທ່ານ ນາງ ປິ່ງຄໍາ ລາຊະສິມມາ ເລຂາທິການສະພາແຫ່ງຊາດ, ເຂົ້າຮ່ວມມີທ່ານ ສິງຄໍາ ວົງພະຈັນ ຮອງເລຂາທິການສະພາແຫ່ງຊາດ, ຜູ້ຊີ້ນໍາວຽກງານຂອງກົມສື່ມວນຊົນ; ຄະນະທີ່ປຶກສາວຽກງານສື່ມວນຊົນ ຂອງສະພາແຫ່ງຊາດ, ວິທະຍາກອນ, ຄະນະກົມ ພ້ອມດ້ວຍນັກສໍາມະນາກອນພາຍໃນກົມສື່ມວນຊົນ ແລະ ສະພາປະຊາຊົນແຂວງວຽງຈັນ.

               ກອງປະຊຸມໄດ້ຮັບຟັງການສະເໜີຫົວຂໍ້ການຂຽນຂ່າວ, ບົດ, ການຈັດເນື້ອໃນລາຍການຂ່າວ ເພື່ອຜະລິດເປັນລາຍການໂທລະພາບ ແລະ ສື່ອອນລາຍ ຈາກທ່ານ ວັນໄຊ ຕະວິນຍານ ຮອງຫົວໜ້າຄະນະໂຄສະນາອົບຮົມສູນກາງພັກ ທັງເປັນຫົວໜ້າບັນນາທິການໃຫຍ່ ໜັງສືພິມປະຊາຊົນ; ຫົວຂໍ້ວິທີສໍາພາດ ແລະ ເປັນພິທີກອນຂ່າວ ແລະ ພິທີກອນລາຍການໂທລະພາບຕ່າງໆ ຈາກວິທະຍາກອນຮັບເຊີນຂອງໂທລະພາບແຫ່ງຊາດ ແລະ ຫົວຂໍ້ການຖ່າຍທໍາ ແລະ ຕັດຕໍ່ລາຍການໂທລະພາບ ແລະ ສື່ອອນລາຍ ຈາກວິທະຍາກອນຂອງສະພາແຫ່ງຊາດ. ຈາກນັ້ນ, ຜູ້ເຂົ້າຮ່ວມທັງໝົດ ໄດ້ຈັດແບ່ງກຸ່ມເຮັດບົດເຝິກຫັດຕົວຈິງ ແລະ ກວດແກ້, ສົນທະນາແລກປ່ຽນບົດຮຽນ ເຊິ່ງກັນ ແລະ ກັນ.

ກອງປະຊຸມຄັ້ງນີ້ ໄດ້ຮັບການສະໜັບສະໜູນງົບປະມານຈາກ ຄະນະທີ່ປຶກສາວຽກງານສື່ມວນຊົນ ຂອງສະພາແຫ່ງຊາດ.