(ສພຊ) – ເພື່ອສ້າງຄວາມເຂັ້ມແຂງດ້ານພາວະການເປັນຜູ້ນໍາ, ການຄຸ້ມຄອງສໍາເນົາເອກະສານ, ການຮ່າງເອກະສານ ທາງລັດຖະການ ແລະ ມາລະຍາດທາງສັງຄົມ-ມາລະຍາດສາກົນ ໃຫ້ແກ່ພະນັກງານສະພາແຫ່ງຊາດ ແລະ ສະພາປະຊາຊົນຂັ້ນແຂວງ; ວັນທີ 7-9 ຕຸລາຜ່ານມາ ທີ່ເມືອງແກ້ວອຸດົມ ແຂວງວຽງຈັນ, ສະຖາບັນຄົ້ນຄວ້ານິຕິກໍາສະພາແຫ່ງຊາດ (ສນສ) ໄດ້ຈັດກອງປະຊຸມເຝິກອົບຮົມໃນຫົວຂໍ້ດັ່ງກ່າວ ໂດຍການເປັນປະທານຂອງທ່ານ ສິນທະລາ ຫຼ້າສຸກສະໄໝ ຫົວໜ້າສະຖາບັນຄົ້ນຄວ້ານິຕິກໍາ ເຊິ່ງມີຮອງຫົວໜ້າ ສນສ, ວິທະຍາກອນຈາກມະຫາວິທະຍາໄລແຫ່ງຊາດ, ກະຊວງພາຍໃນ ແລະ ກະຊວງການຕ່າງປະເທດ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ໃນກອງປະຊຸມ, ສໍາມະນາກອນໄດ້ຮຽນຮູ້ກ່ຽວກັບພາວະການເປັນຜູ້ນໍາ ຈາກທ່ານ ຮສ. ປອ. ບົວຄໍາ ແສງຄໍາຄຸດ ລາວົງ ອະດີດຫົວໜ້າຫ້ອງການມະຫາວິທະຍາໄລແຫ່ງຊາດ ເຊິ່ງມີບາງຕອນວ່າ: ຜູ້ນຳ (Leader) ແມ່ນບຸກຄົນທີ່ສາມາດ ນຳພາກຸ່ມໄປໃນທາງທີ່ຕ້ອງການ ໂດຍໃຊ້ອິດທິພົນ ຫຼື ຄວາມສາມາດຈູງໃຈໃຫ້ຜູ້ຕາມປະຕິບັດຕາມຄວາມເຫັນຂອງຕົນ ເພື່ອໃຫ້ບັນລຸຈຸດປະສົງຂອງກຸ່ມໃນສະຖານະການໃດໜຶ່ງ; ພາວະຜູ້ນຳ ໝາຍເຖິງສະພາວະການທີ່ບຸກຄົນໃດໜຶ່ງ ໃຊ້ອິດທິພົນຂອງຕົນຊີ້ນຳກະຕຸກຊຸກຍູ້ບຸກຄົນ ຫຼື ກຸ່ມຄົນ ໃຫ້ມີຄວາມເຕັມໃຈ ແລະ ກະຕືລືລົ້ນໃນການປະຕິບັດວຽກງານຈົນບັນລຸຈຸດປະສົງຂອງກຸ່ມ; ຜູ້ນໍາ ເປັນທັງຫົວໜ້າ, ເປັນທັງຕົວແທນ, ເປັນທັງສັນຍະລັກ, ເປັນທັງຄັນທຸງເຕົ້າໂຮມຄວາມສາມັກຄີ ຄວາມເປັນນ້ຳໜຶ່ງໃຈດຽວຂອງບຸກຄະລາກອນ ເພື່ອພ້ອມກັນເຮັດສຳເລັດໜ້າທີ່ຂອງໜ່ວຍງານ. ດັ່ງນັ້ນ, ຜູ້ນຳຈຶ່ງມີບົດບາດ ສຳຄັນທີ່ຈະນຳພາໜ່ວຍງານໄປສູ່ການບັນລຸຈຸດປະສົງເປົ້າໝາຍທີ່ວາງໄວ້. ນອກນັ້ນ, ຍັງໄດ້ຮຽນຮູ້ການຄຸ້ມຄອງ-ສໍາເນົາເອກະສານ ແລະ ການຮ່າງເອກະສານທາງການ ຈາກທ່ານ ແສງດາວເດດ ກັດຕິຍະສັກ ຮອງຫົວໜ້າກົມເອກະສານແຫ່ງຊາດ, ກະຊວງພາຍໃນ; ການສ້າງທີມງານ ແລະ ການສື່ສານ ຈາກທ່ານ ພອນໄຊ ປານສີວົງໄຊ ຫົວໜ້າພະແນກຝຶກອົມຮົມ, ສະ ໍຖາບັນຄົ້ນຄວ້າວິທະຍາສາດການເມືອງ ແລະ ຝຶກອົບຮົມ, ກະຊວງພາຍໃນ.

ພິທີປິດກອງປະຊຸມ, ທ່ານ ສິນທະລາ ຫຼ້າສຸກສະໄໝ ມີຄໍາເຫັນວ່າ: ບັນດາຫົວຂໍ້ທີ່ນໍາມາເຝິກອົບຮົມຄັ້ງນີ້ ແມ່ນຖືກຕ້ອງ ແລະ ມີຄວາມສໍາຄັນ, ຈໍາເປັນ ສໍາລັບພະນັກງານວິຊາການຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ທີ່ຕ້ອງໄດ້ຮຽນຮູ້ເພື່ອເປັນວິທີພື້ນຖານໃນການພັດທະນາຕົນເອງໃຫ້ມີຄວາມກ້າວໜ້າໃນອະນາຄົດ. ໃນ 3 ຫົວຂໍ້ທີ່ນໍາມາເຝິກອົບຮົມຄັ້ງນີ້ ຕ້ອງເອົາໃຈໃສ່ຫົວຂໍ້ທັກສະພາວະຄວາມເປັນຜູ້ນໍາທີ່ດີ ເຊິ່ງຜູ້ນໍາທີ່ດີຕ້ອງປະຕິບັດໃຫ້ໄດ້ 6 ຢ່າງ, 5 ທັກສະ ແລະ 9 ແນວຄິດທີ່ຄວນຕ້ານ; 6 ຢ່າງຄື: 1. ກໍາແໜ້ນດ້ານຫຼັກການ, 2. ນໍາພາລວມສູນປະຊາທິປະໄຕ, 3. ເດັດດ່ຽວ ແລະ ເດັດຂາດຕໍ່ບັນຫາ, 4. ມີເຫດ ແລະ ມີຜົນ, 5. ມີໄຫວພິບ ແລະ 6. ຈິງໃຈ; 5 ທັກສະຄື: 1. ເຂົ້າໃຈຈຸດແຂງ, ຈຸດອ່ອນຂອງແຕ່ລະຄົນ ແລະ ຮູ້ວິທີແກ້ໄຂ, 2. ການເວົ້າ ແລະ ສ້າງແຮງຈູງໃຈໃຫ້ພະນັກງານເຕັມໃຈເຮັດວຽກ, 3. ການມອບໝາຍວຽກໃຫ້ຊັດເຈນ, 4. ຕິດຕາມ ແລະ ຊຸກຍູ້ວຽກ ແລະ 5. ໃຫ້ບາງອັນ ຫຼື ສ້າງສິ່ງຈູງໃຈ; 9 ແນວຄິດຕ້ານຄື: 1. ແນວຄິດໂລບມາກໂລພາ, 2. ແນວຄິດຂີ້ຄ້ານ, 3. ແນວຄິດອວດອົ່ງ, 4. ແນວຄິດຕັນຫາຊື່ສຽງ, 5. ແນວຄິດຂາດລະບຽບວິໄນ, 6. ແນວຄິດຄັບແຄບ, 7. ແນວຄິດອາຍາສິດ, 8. ແນວຄິດເອກະຊົນ ແລະ 9. ແນວຄິດສວຍໂອກາດ.

(ບຸນເກີດ ວົງໄຊຍາ)