(ສພຊ) – ໃນພິທີປິດກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX, ທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ໄດ້ກ່າວສູນທອນພົດປິດກອງປະຊຸມວ່າ: ກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດຊຸດທີ IX ທີ່ໄດ້ດໍາເນີນມາແຕ່ວັນທີ 18 ພະ ຈິກ 2024, ມາຮອດມື້ນີ້ ໄດ້ບັນລຸຜົນສໍາເລັດຕາມຈຸດປະສົງລະດັບຄາດໝາຍທີ່ວາງໄວ້. ກອງປະຊຸມຕີລາຄາສູງທີ່ສະມາຊິກສະພາແຫ່ງຊາດ, ສະມາຊິກລັດຖະ ບານ, ຜູ້ແທນກອງປະຊຸມຈາກພາກສ່ວນທີ່ກ່ຽວຂ້ອງ ໄດ້ພ້ອມກັນທຸ່ມເທເຫື່ອແຮງ, ສະຕິປັນຍາ ແລະ ເສີມຂະຫຍາຍສິດປະຊາທິປະໄຕ ເຂົ້າໃສ່ການພິຈາລະນາບັນຫາສໍາຄັນພື້ນຖານຂອງປະເທດຊາດ ຕາມພາລະບົດບາດຂອງສະພາແຫ່ງຊາດ ທີ່ກໍານົດໄວ້ໃນລັດຖະທໍາມະນູນ, ກົດໝາຍ ເຊິ່ງເປັນການຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ ເຂົ້າສູ່ວຽກງານຕົວຈິງຂອງອົງການຈັດຕັ້ງລັດ ດ້ວຍການອອກເປັນມະຕິກອງປະຊຸມສະພາແຫ່ງຊາດ ຈໍານວນ 23 ສະບັບ ເພື່ອເປັນບ່ອນອີງໃຫ້ແກ່ລັດຖະບານ, ອົງການຈັດຕັ້ງທີ່ກ່ຽວຂ້ອງ ນໍາໄປຈັດຕັ້ງປະຕິບັດ ແນໃສ່ເຮັດໃຫ້ປະເທດຊາດມີການພັດທະນາຢ່າງຕໍ່ເນື່ອງ, ສືບຕໍ່ມີສະຖຽນລະພາບທາງການເມືອງຢ່າງໜັກແໜ້ນ, ສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ, ເສດຖະກິດສືບຕໍ່ຂະຫຍາຍຕົວໃນທາງບວກ, ຊີວິດການເປັນຢູ່ຂອງປະຊາຊົນບັນດາເຜົ່າ ໄດ້ຮັບການປັບປຸງໃຫ້ດີຂຶ້ນເທື່ອລະກ້າວ. ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ໄດ້ພິຈາ ລະນາ, ຮັບຮອງເອົາເນື້ອໃນສໍາຄັນຈໍານວນໜຶ່ງດັ່ງນີ້:

1. ກອງປະຊຸມໄດ້ພິຈາລະນາ ແລະ ຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ແຜນເງິນຕາ ປະຈໍາປີ 2024 ແລະ ແຜນການປະຈໍາປີ 2025 ຕິດພັນກັບວາລະແຫ່ງຊາດ ວ່າດ້ວຍການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ; ແຜນ ການລົງທຶນຂອງລັດປະຈໍາປີ 2025, ແຜນຈັດສັນງົບປະມານໃຫ້ກະຊວງ, ອົງການ ແລະ ທ້ອງຖິ່ນ ປະຈໍາປີ 2025, ການດັດແກ້ແຜນງົບປະມານແຫ່ງລັດປະຈໍາປີ 2024.

ກອງປະຊຸມສະພາແຫ່ງຊາດ ສະແດງຄວາມຊົມເຊີຍລັດຖະບານ ທີ່ມີຄວາມພະຍາຍາມຊີ້ນໍາການຈັດຕັ້ງປະຕິ ບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ແລະ ແຜນເງິນຕາ ໃນເກືອບ 1 ປີຜ່ານມາ ແລະ ໄດ້ຮັບຜົນສໍາເລັດຫຼາຍດ້ານ ເຮັດໃຫ້ອັດຕາການເຕີບໂຕເສດຖະກິດບັນລຸໄດ້ 4.6%, ບັນດາແຂວງທົ່ວປະເທດ ສາມາດເກັບລາຍຮັບເກີນແຜນ; ການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ ໄດ້ຮັບຜົນສໍາເລັດເປັນກ້າວ ໆ. ພິເສດ, ປີນີ້ ດ້ວຍຄວາມເອົາໃຈໃສ່ນໍາພາ-ຊີ້ນໍາຂອງກົມການເມືອງສູນກາງພັກ, ຄວາມບຸກບືນສູ້ຊົນສູງຂອງຄະນະປະຈໍາສະພາແຫ່ງຊາດ, ຄວາມພະຍາຍາມຂອງລັດຖະບານ ຈຶ່ງສາມາດເຮັດໃຫ້ການສ້າງຮ່າງແຜນການລົງທຶນຂອງລັດ ປະຈໍປີ 2025 ແລະ ຮ່າງແຜນຈັດສັນງົບປະມານແຫ່ງລັດ ໃຫ້ກະຊວງ, ອົງການ ແລະ ບັນດາແຂວງ ປະຈໍາປີ 2025 ໄດ້ສໍາເລັດ ແລະ ໄດ້ນໍາສະເໜີຕໍ່ສະພາແຫ່ງຊາດ ພິຈາລະນາຮັບຮອງເອົາຕາມກົດໝາຍກໍານົດ ແລະ ຫວັງວ່າຈະສາມາດຈັດຕັ້ງປະຕິບັດໃນວັນທີ 1 ມັງກອນ 2025 ເປັນຕົ້ນໄປ.

ກອງປະຊຸມສະເໜີໃຫ້ລັດຖະບານເອົາໃຈໃສ່ຊີ້ນໍາການເກັບລາຍຮັບໃຫ້ໄດ້ຢ່າງຄົບຖ້ວນຕາມກົດໝາຍກໍານົດ ໂດຍສະເພາະລາຍຮັບຈາກຊັບພະຍາກອນທໍາມະຊາດ, ແກ້ໄຂບັນຫາການຍົກເວັ້ນການປະຕິບັດກົດໝາຍທີ່ສົ່ງຜົນກະ ທົບຕໍ່ການເກັບລາຍຮັບເຂົ້າງົບປະມານ; ຄົ້ນຄວ້າການແກ້ໄຂໜີ້ສິນສາທາລະນະ, ໜີ້ສິນໂຄງການລົງທຶນຂອງລັດ ໃຫ້ມີການຫັນປ່ຽນດີຂຶ້ນ; ສືບຕໍ່ຄວບຄຸມ ແລະ ແກ້ໄຂບັນຫາເງິນເຟີ້, ອັດຕາແລກປ່ຽນ, ການເໜັງຕີງຂອງລາຄາສິນຄ້າ ດ້ວຍການນໍາໃຊ້ມາດຕະການທາງກົດໝາຍ ແລະ ມາດຕະການທາງເສດຖະກິດ ຢ່າງເຂັ້ມງວດ ແລະ ເດັດຂາດ.

ກອງປະຊຸມໄດ້ສະເໜີໃຫ້ລັດຖະບານເພີ່ມການລົງທຶນຂອງລັດເຂົ້າໃສ່ການພັດທະນາຂົງເຂດວັດທະນະທໍາ-ສັງຄົມ ເພື່ອຍົກສູງຄຸນນະພາບໃນການເຄື່ອນໄຫວໃນຂົງເຂດດັ່ງກ່າວ ດ້ວຍການສົ່ງເສີມການພັດທະນາສີມືແຮງງານ ໃຫ້ມີຄຸນນະພາບ; ປັບປຸງການບໍລິການປິ່ນປົວ ແລະ ກອງທຶນປະກັນສຸຂະພາບ ໃຫ້ສາມາດດຶງດູດສະມາຊິກປະກັນສຸ ຂະພາບ ໃຫ້ເພີ່ມຂຶ້ນ; ເອົາໃຈໃສ່ປັບປຸງພື້ນຖານໂຄງລ່າງຂົງເຂດວຽກງານທ່ອງທ່ຽວ, ເພີ່ມທະວີການຄຸ້ມຄອງວຽກງານທ່ອງທ່ຽວ ເປັນຕົ້ນຄວາມປອດໄພໃນການທ່ອງທ່ຽວ ເພື່ອດຶງດູດ ແລະ ສ້າງຄວາມໝັ້ນໃຈໃຫ້ແກ່ນັກທ່ອງທ່ຽວ ເພື່ອໃຫ້ນັກທ່ອງທ່ຽວເຂົ້າມາທ່ຽວລາວໃຫ້ນັບມື້ນັບຫຼາຍ, ປະກອບສ່ວນສ້າງລາຍຮັບໃຫ້ແກ່ຜູ້ປະກອບການ, ສ້າງງານໃຫ້ແກ່ສັງຄົມນັບມື້ນັບເພີ່ມຂຶ້ນ.

ກອງປະຊຸມສະແດງຄວາມຊົມເຊີຍຕໍ່ລັດຖະບານໃນການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ ເຊິ່ງໄດ້ຮັບຜົນສໍາເລັດຫຼາຍດ້ານ ເຮັດໃຫ້ການຜະລິດເປັນສິນຄ້າເພື່ອທົດແທນການນໍາເຂົ້າ ແລະ ເປັນສິນຄ້າສົ່ງອອກ ມີບາດກ້າວທີ່ດີຂຶ້ນ; ການສ້າງ ແລະ ການປັບປຸງລະບົບຊົນລະປະທານ ໄດ້ມີການເອົາໃຈໃສ່ເພື່ອອໍານວຍຄວາມສະດວກໃຫ້ແກ່ການຜະລິດກະສິກໍາ ເພື່ອຮັບປະກັນການຜະລິດສະບຽບອາຫານໃນຕໍ່ໜ້າໃຫ້ດີຂຶ້ນ.

ກອງປະຊຸມສະເໜີໃຫ້ລັດຖະບານເພີ່ມທະວີຄວາມເອົາໃຈໃສ່ແກ້ໄຂຢ່າງເດັດຂາດຕໍ່ການລັກລອບນໍາເຂົ້າສິນຄ້າທີ່ບໍ່ຖືກຕ້ອງຕາມກົດໝາຍ; ຄົ້ນຄວ້າປະເພດສິນຄ້າທີ່ເປັນທ່າແຮງ ເພື່ອສຸມທຶນຮອນ, ເຕັກນິກວິຊາການ, ແນວພັນ ເຮັດໃຫ້ຜົນຜະລິດກະສິກໍາສະອາດນັບມື້ນັບມີປະສິດທິຜົນສູງ; ເອົາໃຈໃສ່ຄຸ້ມຄອງການອະນຸຍາດໃຫ້ໂຄງ ການລົງທຶນດ້ານບໍ່ແຮ່, ການຂຸດຄົ້ນແຮ່ທາດ ໃຫ້ຖືກຕ້ອງຕາມກົດໝາຍຢ່າງເຂັ້ມງວດ, ແກ້ໄຂຢ່າງຂາດຕົວບັນດາໂຄງການທີ່ບໍ່ມີຄຸນນະພາບ ແລະ ບໍ່ເປັນມືອາຊີບ, ສູ່ຊົນການເກັບລາຍຮັບຈາກການດໍາເນີນທຸລະກິດແຮ່ທາດ ເຊິ່ງເປັນລາຍຮັບທີ່ມີມູນຄ່າສູງ ໃຫ້ໄດ້ຢ່າງຄົບຖ້ວນ, ຖືກຕາມຕົວຈິງ ແລະ ຕາມກົດໝາຍກໍານົດ ແລະ ເກັບກູ້ໜີ້ຕ້ອງຮັບຂອງລັດ ໃຫ້ໄດ້ຢ່າງຄົບຖ້ວນ.

2. ກອງປະຊຸມໄດ້ຮັບຟັງລາຍງານການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ເຊິ່ງເຫັນວ່າລັດຖະບານໄດ້ເອົາໃຈໃສ່ຈັດຕັ້ງຜັນຂະຫຍາຍມະຕິຂອງກອງປະຊຸມສະພາແຫ່ງຊາດ ເຂົ້າໃນວຽກງານຕົວຈິງ ແລະ ມີຜົນສໍາເລັດໃນຫຼາຍດ້ານ; ກໍາລັງປ້ອງກັນຄວາມສະຫງົບ ໄດ້ດໍາເນີນການປາບປາມຂະບວນການຄ້າຂາຍຢາເສບຕິດປະເພດຕ່າງໆຢ່າງເດັດດ່ຽວ, ສາມາດປົກປ້ອງສັງຄົມ, ພໍ່ແມ່ປະຊາຊົນ, ຊັ້ນຄົນຕ່າງໆຈາກໄພຂອງຢາເສບຕິດ ໄດ້ໃນລະດັບທີ່ແນ່ນອນ.

ກອງປະຊຸມສະເໜີໃຫ້ລັດຖະບານເອົາໃຈໃສ່ສືບຕໍ່ໂຄສະນາເຜີຍແຜ່ຜົນຮ້າຍຂອງຢາເສບຕິດໃຫ້ຫຼາຍຂຶ້ນຕື່ມ ແລະ ປຸກລະດົມໃຫ້ສັງຄົມມີສ່ວນຮ່ວມໃນການແກ້ໄຂບັນຫາຢາເສບຕິດໃຫ້ຫຼາຍຂຶ້ນກວ່າເກົ່າ; ຄົ້ນຄວ້າອອກນິຕິກໍາຄວບຄຸມ ແລະ ລົງໂທດຕໍ່ຜູ້ກະທໍາຜິດໃນການນໍາໃຊ້ຜະລິດຕະພັນຢາເສບຕິດແບບໃໝ່ ໃຫ້ທັນເວລາ; ເກັບ ກໍາ, ຮີບໂຮມຂອງກາງຄະດີຢາເສບຕິດໃຫ້ໄດ້ຢ່າງຄົບຖ້ວນ ຕາມດໍາລັດ 280/ລບ ເພື່ອແກ້ໄຂຢ່າງທັນການ, ບໍ່ປະ ປ່ອຍໃຫ້ຜູ້ກະທໍາຜິດນໍາໄປຊຸກເຊື່ອງ, ຖ່າຍໂອນ; ສືບຕໍ່ສ້າງຄວາມເຂັ້ມແຂງໃຫ້ແກ່ກົງຈັກທີ່ຮັບຜິດຊອບແກ້ໄຂບັນ ຫາຢາເສບຕິດ ດ້ວຍການເຝິກອົບຮົມດ້ານວິຊາສະເພາະ ແລະ ການປະກອບເຄື່ອງມືທີ່ທັນສະໄໝເປັນກ້າວໆ ເພື່ອຍົກສູງຄຸນນະພາບໃນການປະຕິບັດໜ້າທີ່.

3. ກອງປະຊຸມໄດ້ຄົ້ນຄວ້າ ແລະ ຮັບຮອງເອົາການຈັດຕັ້ງປະຕິບັດວຽກງານສາມສ້າງ ຕາມມະຕິສະພາແຫ່ງຊາດ ສະບັບເລກທີ 02/ສພຊ, ລົງວັນທີ 28 ມັງກອນ 2016 ແລະ ສະເໜີໃຫ້ລັດຖະບານ ເອົາໃຈໃສ່ຄົ້ນຄວ້າສ້າງ, ປັບປຸງນິຕິກໍາ, ແຜນການເຄື່ອນໄຫວວຽກງານ 3 ສ້າງ ໃຫ້ເປັນລະບົບຄົບຊຸດ ລວມທັງການຈັດຕັ້ງໂຄສະນາເຜີຍແຜ່ ໃຫ້ພະນັກງານ, ທະຫານ, ຕໍາຫຼວດ ກໍຄືປະຊາຊົນບັນດາເຜົ່າ ໄດ້ຮັບຮູ້, ເຂົ້າໃຈ ແລະ ເຂົ້າຮ່ວມການຈັດຕັ້ງປະຕິບັດ; ຄົ້ນຄວ້າ ແລະ ປັບປຸງການແບ່ງຂັ້ນຄຸ້ມຄອງວຽກງານ 3 ສ້າງ ລະຫວ່າງສູນກາງ ແລະ ທ້ອງຖິ່ນ, ລະຫວ່າງຂະແໜງ ການ ດ້ານວຽກງານໂຄງການ, ດ້ານງົບປະມານ, ດ້ານບຸກຄະລາກອນ ແລະ ເຕັກນິກວິຊາການ ໃຫ້ສອດຄ່ອງ ເພື່ອພ້ອມກັນຈັ້ດຕັ້ງປະຕິບັດໃຫ້ໄດ້ຮັບຜົນສໍາເລັດຕາມແຜນການທີ່ວາງໄວ້.

4. ກອງປະຊຸມໄດ້ພິຈາລະນາ ແລະ ຮັບຮອງເອົາການຈັດຕັ້ງປະຕິບັດຍຸດທະສາດການປະຕິຮູບລະບົບການສຶກສາ, ການພັດທະນາຊັບພະຍາກອນມະນຸດແຫ່ງຊາດ ໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ.

ກອງປະຊຸມສະເໜີໃຫ້ລັດຖະບານ ເອົາໃຈໃສ່ແກ້ໄຂບັນຫາການຂາດແຄນຄູ ແລະ ບັນຫາການປະລະການຮຽນ; ຊຸກຍູ້, ສົ່ງເສີມ ແລະ ສ້າງເງື່ອນໄຂໃຫ້ລູກຫຼານຫັນມາຮຽນວິຊາຊີບ ເຊິ່ງເປັນຫຼັກສູດການຮຽນໄລຍະສັ້ນ, ຫຼຸດຜ່ອນພາລະຄ່າໃຊ້ຈ່າຍຂອງພໍ່ແມ່, ຜູ້ປົກຄອງ, ເມື່ອຮຽນຈົບແລ້ວ ກໍສາມາດຊອກວຽກເຮັດງານທໍາເອງຢູ່ໂຮງຈັກໂຮງານ, ບໍລິສັດຕ່າງໆຢູ່ພາຍໃນປະເທດເຮົາໄດ້ເລີຍ, ມີເງິນເດືອນ, ມີລາຍໄດ້ໃຫ້ແກ່ການດໍາລົງຊີວິດ; ສະເໜີໃຫ້ທຸກພາກສ່ວນໃນສັງຄົມ ກໍຄືແນວລາວສ້າງຊາດ, ສະຫະພັນນັກຮົບເກົ່າ, ອົງການຈັດຕັ້ງມະຫາຊົນ ພ້ອມກັນໂຄ ສະນາ, ປຸກລະດົມ ພໍ່ແມ່ຜູ້ປົກຄອງ, ນັກຮຽນ, ນັກສຶກສາ ໃຫ້ເຫັນໄດ້ຄວາມສຳຄັນຂອງວຽກງານການສຶກສາ ແລະ ມີສ່ວນຮ່ວມງານວຽກງານດັ່ງກ່າວ. ພ້ອມກັນນັ້ນ, ກໍສະເໜີໃຫ້ຄົ້ນຄວ້າການສະໜອງງົບປະມານເຂົ້າໃນຂົງເຂດການສຶກສາ ໃຫ້ມີຄວາມສອດຄ່ອງກັບວຽກງານຕົວຈິງຕື່ມ.

5. ກອງປະຊຸມໄດ້ພິຈາລະນາ ແລະ ຮັບຮອງເອົາການປະເມີນຜົນການຈັດຕັ້ງປະຕິບັດກົດໝາຍຂົງເຂດວັດ ທະນະທໍາ-ສັງຄົມ 4 ສະບັບຄື: ກົດໝາຍວ່າດ້ວຍການສຶກສາ, ກົດໝາຍວ່າດ້ວຍການຄວບຄຸມເຄື່ອງດື່ມທີ່ມີທາດເຫຼົ້າ, ກົດໝາຍວ່າດ້ວຍແຮງງານ ແລະ ກົດໝາຍວ່າດ້ວຍປ້າຍ; ຜ່ານການປະເມີນຜົນການຈັດຕັ້ງປະຕິບັດກົດໝາຍດັ່ງກ່າວ ກໍສາມາດຊອກເຫັນໄດ້ດ້ານຕັ້ງໜ້າ ແລະ ບັນຫາຄົງຄ້າງ ໃນການຈັດຕັ້ງປະຕິບັດກົດໝາຍໃນໄລຍະຜ່ານມາ.

ກອງປະຊຸມມອບໃຫ້ລັດຖະບານຊີ້ນໍາທັງ 4 ກະຊວງ ຄົ້ນຄວ້າ ແລະ ກ້າວໄປເຖິງການປັບປຸງກົດໝາຍທີ່ຢູ່ໃນຂອບເຂດຄວາມຮັບຜິດຊອບຂອງແຕ່ລະພາກສ່ວນ ເພື່ອກໍານົດມາດຕະການແກ້ໄຂບັນຫາທີ່ຄົງຄ້າງໃນໄລຍະຜ່ານມາ ລວມທັງປັບປຸງ ແລະ ຍົກສູງຄຸນນະພາບໃນການເຄື່ອນໄຫວວຽກງານຂອງຕົນ ໃຫ້ມີປະສິດທິຜົນ ແລະ ເຂັ້ມງວດຕາມກົດໝາຍຍິ່ງໆຂຶ້ນ.

6. ກອງປະຊຸມໄດ້ພິຈາລະນາ ແລະ ຮັບຮອງເອົາວິໄສທັດຮອດປີ 2040 ແລະ ແຜນຍຸດທະສາດການຄຸ້ມຄອງ ແລະ ພັດທະນາທີ່ດິນກະສິກໍາ ຮອດປີ 2030; ກອງປະຊຸມສະແດງຄວາມຊົມເຊີຍຕໍ່ລັດຖະບານ ທີ່ໄດ້ເອົາໃຈໃສ່ຊີ້ນໍາກະຊວງທີ່ກ່ຽວຂ້ອງ ສ້າງວິໄສທັດ ແລະ ຍຸດທະສາດການຄຸ້ມຄອງ ແລະ ພັດທະນາທີ່ດິນກະສິກໍາ ເຊິ່ງເປັນການຜັນຂະຫຍາຍແນວທາງນະໂຍບາຍຂອງພັກ ໃນການຄຸ້ມຄອງ ແລະ ພັດທະນາທີ່ດິນກະສິກໍາ ທີ່ເປັນທ່າແຮງທາງດ້ານເສດຖະກິດຂອງປະເທດເຮົາ.

ກອງປະຊຸມສະເໜີໃຫ້ເອົາໃຈໃສ່ການຈັດແບ່ງເຂດການຜະລິດໃຫ້ຈະແຈ້ງ, ເພີ່ມທະວີການຄຸ້ມຄອງ ແລະ ນໍາໃຊ້ທີ່ດິນກະສິກໍາ ໃຫ້ຖືກຕ້ອງ ແລະ ສອດຄ່ອງກັບກົດໝາຍ, ກໍານົດມາດຕະການຢ່າງເຂັ້ມງວດຕໍ່ການແກ້ໄຂບັນ ຫາການຫັນປ່ຽນທີ່ດິນກະສິກໍາ ເປັນທີ່ດິນປະເພດອື່ນ ແລະ ການບຸກລຸກທີ່ດິນປ່າໄມ້; ການອອກໃບຕາດິນກະສິກໍາ ຕ້ອງມີຄວາມຊັດເຈນ, ຖືກຕ້ອງ ແລະ ຮັດກຸມ ແນໃສ່ການນໍາໃຊ້ທີ່ດິນກະສິກໍາໃຫ້ເກີດປະໂຫຍດສູງສຸດ; ເອົາໃຈໃສ່ສ້າງ ແລະ ບໍາລຸງຍົກລະດັບພະນັກງານ, ວິຊາການ ໃຫ້ມີຄວາມຊໍານານງານກ່ຽວກັບການຄົ້ນຄວ້າວິໄຈດິນ, ພັນພືດ-ພັນສັດ ປະກອບສ່ວນໃຫ້ແກ່ການພັດທະນາທ້ອງຖິ່ນ ກໍຄືການພັດທະນາເສດຖະກິດ-ສັງຄົມຂອງຊາດ.

7. ກອງປະຊຸມໄດ້ພິຈາລະນາ ແລະ ຮັບຮອງເອົາບົດລາຍງານຂອງອົງການກວດສອບແຫ່ງລັດ ກ່ຽວກັບການ ຈັດຕັ້ງປະຕິບັດແຜນການເຄື່ອນໄຫວວຽກງານປະຈໍາປີ 2024 ແລະ ແຜນການປະຈໍາປີ 2025; ບົດລາຍງານຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດປະຈໍາປີ 2023; ບົດລາຍງານຂອງອົງການກວດກາແຫ່ງລັດ ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານປະຈໍາປີ 2024 ແລະ ແຜນການປະຈໍາປີ 2025; ບົດລາຍງານຜົນການກວດກາຕາມຜົນການກວດສອບປີ 2022.

ກອງປະຊຸມສະເໜີໃຫ້ອົງການກວດກາແຫ່ງລັດ ແລະ ອົງການກວດສອບແຫ່ງລັດ ເອົາໃຈໃສ່ສົມທົບກັບພາກ ສ່ວນທີ່ກ່ຽວຂ້ອງສືບຕໍ່ແກ້ໄຂຜົນການກວດສອບ ແລະ ກວດກາ ໃຫ້ມີຄວາມເຂັ້ມງວດຕາມກົດໝາຍ ເພື່ອເຮັດໃຫ້ ການນໍາໃຊ້ຊັບສິນຂອງລັດ, ງົບປະມານຂອງລັດ ມີປະສິດທິຜົນ ເພື່ອເປັນກໍາລັງແຮງໃຫ້ແກ່ການພັດທະນາເສດຖະກິດ-ສັງຄົມ, ເຮັດໃຫ້ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມດ້ວຍກົດໝາຍ ເປັນຮູບປະທໍາຫຼາຍຂຶ້ນ, ບໍ່ປ່ອຍປະໃຫ້ມີຜູ້ກະທໍາຜິດກົດໝາຍ ບໍ່ຖືກລົງໂທດ ແລະ ສ້າງຄວາມເສຍຫາຍຕໍ່ເສດຖະກິດ-ການເງິນຂອງປະເທດຊາດ ເພີ່ມທະວີໃນການຕ້ານ ແລະ ສະກັດກັ້ນການສໍ້ລາດບັງຫຼວງ, ການສວຍໃຊ້ໜ້າທີ່ຕໍາແໜ່ງໃນທຸກຮູບແບບ ເພື່ອສ້າງຄວາມເຊື່ອໝັ້ນ, ຄວາມສັດທາຂອງປະຊາຊົນ ຕໍ່ການຄຸ້ມຄອງບໍລິຫານລັດຂອງພວກເຮົາ.

8. ກອງປະຊຸມໄດ້ພິຈາລະນາ ແລະ ຮັບຮອງເອົາບົດລາຍງານຂອງສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານປະຈໍາປີ 2024 ແລະ ແຜນການປະຈໍາປີ 2025. ກອງປະຊຸມຕີລາຄາສູງຕໍ່ສອງອົງການ ທີ່ໄດ້ມີຄວາມພະຍາຍາມປະຕິບັດພາລະບົດບາດ, ສິດ ແລະ ໜ້າທີ່ຂອງຕົນ ໃນການຍົກສູງຄຸນນະພາບການດໍາເນີນຄະດີຕາມຂະບວນຍຸຕິທໍາ ແລະ ມີຄວາມຖືກຕ້ອງຕາມກົດໝາຍ ນັບມື້ດີຂຶ້ນ, ເອົາໃຈໃສ່ຜັນຂະຫຍາຍມະຕິ, ຄໍາສັ່ງຂອງສູນກາງພັກ ເຂົ້າໃນການປັບປຸງຂະບວນການຍຸຕິທໍາ ໃຫ້ມີຄວາມໜັກແໜ້ນເຂັ້ມແຂງ, ຮັບປະກັນຄວາມຍຸຕິທໍາຕາມກົດໝາຍ, ຖືກຕ້ອງຕາມຄວາມຈິງ.

ກອງປະຊຸມສະພາແຫ່ງຊາດ ສະເໜີໃຫ້ສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ ຄົ້ນ ຄວ້າປັບປຸງບັນດາກົດໝາຍທີ່ກ່ຽວຂ້ອງກັບການດໍາເນີນຄະດີ ດ້ວຍການຄົ້ນຄວ້າແບ່ງຂອບເຂດສິດ ແລະ ໜ້າທີ່ໃຫ້ຈະ ແຈ້ງ, ແກ້ໄຂບັນຫາການຊໍ້າຊ້ອນໜ້າທີ່ວຽກງານ; ເອົາໃຈໃສ່ສຶກອົບຮົມບຸກຄະລາກອນຂອງຕົນ ໃຫ້ມີຄວາມໜັກແໜ້ນເຂັ້ມແຂງທາງດ້ານການເມືອງ-ແນວຄິດ, ມີຈັນຍາບັນ, ຈັນຍາທໍາ ໃນການປະຕິບັດໜ້າທີ່ວຽກງານ ເພື່ອສ້າງຄວາມເຊື່ອໝັ້ນຂອງປະຊາຊົນ ຕໍ່ການດໍາເນີນຄະດີຕາມຂະບວນການຍຸຕິທໍາ; ສະເໜີໃຫ້ສອງອົງການ ເອົາໃຈໃສ່ຍົກສູງຄວາມຮັບຜິດຊອບໃນການຮັບໃຊ້ປະຊາຊົນ, ສ້າງເງື່ອນໄຂໃຫ້ປະຊາຊົນ ໄດ້ເຂົ້າຮ່ວມໃນການດໍາເນີນຄະດີ, ນໍາສະເໜີຂໍ້ມູນຫຼັກຖານຕາມກົດໝາຍກໍານົດ ແລະ ສ້າງເງື່ອນໄຂໃຫ້ປະຊາຊົນ ໄດ້ເຂົ້າເຖິງຂະບວນຍຸຕິທໍາຢ່າງທົ່ວເຖິງ ໂດຍສະເພາະ ປະຊາຊົນຢູ່ເຂດຫ່າງໄກສອກຫຼີກ.

ກອງປະຊຸມໄດ້ລົງຄະແນນສຽງຮັບຮອງເອົາການສະເໜີແຕ່ງຕັ້ງສະມາຊິກສະພາຜູ້ພິພາກສາຂອງສານປະ ຊາຊົນສູງສຸດ ຕາມການສະເໜີຂອງທ່ານປະທານສານປະຊາຊົນສູງສຸດ ຈໍານວນ 2 ທ່ານ ເພື່ອຮັບປະກັນການປະຕິ ບັດໜ້າທີ່ວຽກງານໃຫ້ມີຄຸນນະພາບນັບມື້ສູງຂຶ້ນ.

9. ກອງປະຊຸມໄດ້ພິຈາລະນາ ແລະ ຮັບຮອງເອົາບົດລາຍງານກ່ຽວກັບການຈັດຕັ້ງປະຕິບັດແຜນການເຄື່ອນ ໄຫວວຽກງານປະຈໍາປີ 2024 ແລະ ແຜນການປະຈໍາປີ 2025 ຂອງສະພາແຫ່ງຊາດ. ພ້ອມກັນນັ້ນ, ຍັງໄດ້ຮັບຟັງບົດຄໍາເຫັນຂອງທ່ານຮອງປະທານສະພາແຫ່ງຊາດ ກ່ຽວກັບການຫວນຄືນວັນສ້າງຕັ້ງສະພາແຫ່ງຊາດ ຄົບຮອບ 49 ປີ (2 ທັນວາ 1975-2 ທັນວາ 2024) ເຊິ່ງເຫັນໄດ້ວ່າຕະຫຼອດໄລຍະເວລາທີ່ຜ່ານມາ ສະພາແຫ່ງຊາດໄດ້ປະຕິບັດພາລະບົດບາດ, ສິດ ແລະ ໜ້າທີ່ຂອງຕົນ ຕາມທີ່ໄດ້ກໍານົດໄວ້ໃນລັດຖະທໍາມະນູນ ແລະ ກົດໝາຍ ແລະ ມີຜົນສໍາເລັດຫຼາຍດ້ານ. ກອງປະຊຸມໄດ້ຮັບຟັງການປະກອບຄໍາເຫັນຂອງຜູ້ຕາງໜ້າສູນກາງແນວລາວສ້າງຊາດ ເຊິ່ງຕາງໜ້າໃຫ້ສະ ຫະພັນນັກຮົບເກົ່າ ແລະ ອົງການຈັດຕັ້ງມະຫາຊົນຂັ້ນສູນກາງ ຕໍ່ການເຄື່ອນໄຫວວຽກງານຂອງສະພາແຫ່ງຊາດ ໃນຕະຫຼອດປີ 2024.

ກອງປະຊຸມໄດ້ສະເໜີໃຫ້ເອົາໃຈໃສ່ຕໍ່ບາງວຽກງານ ເປັນຕົ້ນການສ້າງ ແລະ ປັບປຸງກົດໝາຍ ໃຫ້ເປັນລະບົບ, ມີຄວາມສອດຄ່ອງເຊິ່ງກັນແລະກັນ, ສູ້ຊົນໃຫ້ການຕົກລົງບັນຫາສໍາຄັນພື້ນຖານຂອງຊາດ ສອດຄ່ອງກັບແນວທາງນະໂຍ ບາຍຂອງພັກ, ລັດຖະທໍາມະນູນ, ກົດໝາຍ, ຜົນປະໂຫຍດລວມຂອງຊາດ ກໍຄືສິດ ແລະ ຜົນປະໂຫຍດຂອງປະຊາຊົນບັນ ດາເຜົ່າ; ເອົາໃຈໃສ່ການຕິດຕາມກວດກາ ແລະ ແກ້ໄຂຜົນການຕິດຕາມກວດກາບັນຫາເຄັ່ງຮ້ອນຂອງສັງຄົມ ເປັນຕົ້ນ ບັນ ຫາຜົນກະທົບຕໍ່ສິ່ງແວດລ້ອມທໍາມະຊາດ ແລະ ສັງຄົມ, ການເໜັງຕີງຂອງລາຄາສິນຄ້າ, ຄ່າຄອງຊີບສູງ, ບັນຫາຢາເສບຕິດ ແລະ ອື່ນໆ; ເອົາໃຈໃສ່ການລົງພົບປະກັບຜູ້ມີສິດເລືອກຕັ້ງ ເພື່ອຮັບຟັງຄວາມຄິດຄວາມເຫັນ, ຄວາມຂັດຂ້ອງໝອງໃຈຂອງປະຊາຊົນ ແລະ ນໍາມາຄົ້ນຄວ້າຮ່ວມກັບບັນດາອົງການອໍານາດລັດພິຈາລະນາແກ້ໄຂ.

10. ກອງປະຊຸມໄດ້ຮັບຟັງການລາຍງານຂອງຄະນະກໍາມະການລະດັບຊາດ ກ່ຽວກັບຄວາມຄືບໜ້າໃນການປັບປຸງລັດຖະທໍາມະນູນ ສະບັບປີ 2015 ເຊິ່ງເຫັນວ່າການປັບປຸງລັດຖະທໍາມະນູນເທື່ອນີ້ ເນື້ອແທ້ແມ່ນການຜັນຂະ ຫຍາຍມະຕິ, ຄໍາສັ່ງຂອງພັກ ໃຫ້ເປັນອັນລະອຽດເຂົ້າໃສ່ເນື້ອໃນຂອງລັດຖະທໍາມະນູນ ເຊິ່ງເປັນກົດໝາຍສໍາຄັນພື້ນ ຖານຂອງຊາດ; ຄະນະກໍາມະການລະດັບຊາດ ໄດ້ນໍາພາອະນຸກໍາມະການແຕ່ລະຂົງເຂດ ຄົ້ນຄວ້າປັບປຸງ, ຈັດຕັ້ງການທາບທາມ, ຮຽບຮຽງເປັນຮ່າງລັດຖະທໍາມະນູນສະບັບປັບປຸງເບື້ອງຕົ້ນ. ກອງປະຊຸມມອບໃຫ້ຄະນະກໍາມະການລະດັບຊາດ ສືບຕໍ່ນໍາເອົາການປະກອບຄໍາເຫັນຂອງກອງປະຊຸມສະພາແຫ່ງຊາດ ໄປຄົ້ນຄວ້າປັບປຸງເຂົ້າໃສ່ເນື້ອໃນຂອງລັດຖະທໍາມະນູນສະບັບປັບປຸງ ໃຫ້ມີຄວາມຄົບຖ້ວນ, ສົມບູນ ເພື່ອນໍາອອກທາບທາມຄວາມເຫັນ ແລະ ນໍາສະເໜີຕໍ່ກອງປະ ຊຸມສະໄໝວິສາມັນເທື່ອທີ 2 ຂອງສະພາແຫ່ງຊາດຊຸດທີ IX ພິຈາລະນາຮັບຮອງເອົາ ໃນຕົ້ນປີ 2025.

11. ກອງປະຊຸມໄດ້ພິຈາລະນາ, ຮັບຮອງເອົາການສ້າງ ແລະ ປັບປຸງກົດໝາຍ ຈໍານວນ 9 ສະບັບ ໃນນີ້, ມີກົດໝາ ຍສ້າງໃໝ່ 2 ສະບັບຄື: ກົດໝາຍວ່າດ້ວຍທີ່ຢູ່ອາໄສ, ກົດໝາຍວ່າດ້ວຍພັດທະນາສີມືແຮງງານ; ກົດໝາຍສະບັບປັບປຸງ 7 ສະບັບຄື: ກົດໝາຍວ່າດ້ວຍການກວດສອບອິດສະຫຼະ, ກົດໝາຍວ່າດ້ວຍທະນາຄານ ແຫ່ງ ສປປລາວ, ກົດໝາຍວ່າດ້ວຍການສຶກສາ, ກົດໝາຍວ່າດ້ວຍການດຳເນີນຄະດີແພ່ງ, ກົດໝາຍວ່າດ້ວຍອົງການໄອຍະການປະຊາຊົນ, ກົດໝາຍວ່າດ້ວຍສະຫະພັນແມ່ຍິງລາວ, ກົດໝາຍວ່າດ້ວຍການພັດທະນາ ແລະ ປົກປ້ອງແມ່ຍິງ ດ້ວຍຄະແນນສຽງແຕ່ 90% ຂຶ້ນໄປ.

ນອກຈາກນັ້ນ, ກອງປະຊຸມໄດ້ພິຈາລະນາຮັບຮອງກົດໝາຍວ່າດ້ວຍການປັບປຸງມາດຕາ 18 ຂອງກົດໝາຍວ່າດ້ວຍການລົງທຶນຂອງລັດ ສະບັບປັບປຸງປີ 2015 ດ້ວຍຄະແນນສຽງສວນຫຼາຍ, ທັງນີ້ ກໍເພື່ອເພີ່ມຄວາມຮັບຜິດ ຊອບໃນການພິຈາລະນາຮັບຮອງງົບປະມານລົງທຶນຂອງລັດ ໃຫ້ແຂວງ ແລະ ນະຄອນຫຼວງ ໃນຕົວເລກຄາດໝາຍທີ່ສູງຂຶ້ນຕື່ມ.

12. ກອງປະຊຸມໄດ້ຮັບຟັງການຊີ້ແຈງຕໍ່ຄໍາຊັກຖາມຂອງທ່ານນາຍົກລັດຖະມົນຕີ, ບັນດາທ່ານໃນຄະນະລັດຖະ ບານ ທັງໝົດ 10 ກວ່າທ່ານ ເຊິ່ງສະພາແຫ່ງຊາດໄດ້ເກັບກໍາ, ສັງລວມເອົາບັນຫາເຄັ່ງຮ້ອນຂອງສັງຄົມ, ຄວາມຄິດຄວາມເຫັນຂອງພໍ່ແມ່ປະຊາຊົນ ມາສະເໜີໃຫ້ກະຊວງ, ອົງການທີ່ກ່ຽວຂ້ອງ ຊີ້ແຈງ, ອະທິບາຍ ໂດຍໄດ້ຖ່າຍທອດສົດທາງວິທະ ຍຸ, ໂທລະພາບ ຢ່າງປົກກະຕິ ເພື່ອໃຫ້ປະຊາຊົນບັນດາເຜົ່າໄດ້ຕິດຕາມການປະຕິບັດໜ້າທີ່ຂອງສະພາແຫ່ງຊາດ ກໍຄື ຄະ ນະລັດຖະບານ, ອົງການກວດກາ ແລະ ກວດສອບ, ສານ ແລະ ອົງການໄອຍະການປະຊາຊົນສູງສຸດ ໄດ້ຮັບຮູ້, ເຂົ້າໃຈ ແລະ ປະກອບສ່ວນເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງຊາດ, ສ້າງຄວາມເຂັ້ມແຂງໃຫ້ລະ ບົບນິຕິທໍາຂອງພວກເຮົາຕື່ມອີກ.

ກອງປະຊຸມໄດ້ຮັບຟັງການລາຍງານຂອງທ່ານຮອງປະທານສະພາແຫ່ງຊາດ ກ່ຽວກັບຜົນການຕົກລົງຂອງກອງປະຊຸມຄະນະປະຈໍາສະພາແຫ່ງຊາດ ໃນການຍົກຍ້າຍ ແລະ ແຕ່ງຕັ້ງສະມາຊິກລັດຖະບານ ຈໍານວນ 4 ທ່ານ ຕາມການສະເໜີຂອງທ່ານນາຍົກລັດຖະມົນຕີ.

ຜົນສໍາເລັດຂອງກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ຄັ້ງນີ້ ເປັນການຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ IX ເຂົ້າສູ່ວຽກງານຕົວຈິງ, ແມ່ນໝາກຜົນລວມສູນສະຕິປັນຍາ, ສິດປະຊາທິປະໄຕ ກໍຄືຜົນຂອງການຍົກສູງຄວາມຮັບຜິດຊອບທາງການເມືອງຂອງບັນດາທ່ານສະມາຊິກສະພາແຫ່ງຊາດ, ການຕັດສິນໃຈສູງຂອງລັດຖະບານ, ອົງການລັດທີ່ກ່ຽວຂ້ອງ ທີ່ມີຄວາມພະຍາ ຍາມ ແລະ ມີມາດຕະການຕົວຈິງໃນການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ໃຫ້ຕົກໄປເທື່ອລະກ້າວ ເພື່ອສ້າງຄວາມເຊື່ອໝັ້ນຂອງປະຊາຊົນຕໍ່ການນໍາພາຂອງພັກ, ລັດຖະບານ ໃນພາລະກິດປົກປັກຮັກສາ ແລະ ພັດທະນາປະເທດຊາດ ໃຫ້ມີຄວາມໜັກແໜ້ນຂຶ້ນເລື້ອຍໆ.

ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ໄດ້ຮັບຜົນສໍາເລັດຢ່າງຈົບງາມ ກໍຍ້ອນມີການຊີ້ນໍາຢ່າງໃກ້ຊິດຈາກກົມການເມືອງສູນກາງພັກ ແລະ ຄະນະເລຂາທິການສູນກາງພັກ, ຍ້ອນຄວາມຮັບຜິດຊອບສູງຂອງລັດຖະບານ, ບັນດາກະຊວງ, ອົງການກວດກາ ແລະ ກວດສອບ, ສານ ແລະ ອົງການໄອຍະການປະຊາຊົນສູງສຸດ ແລະ ຂະແໜງການກ່ຽວຂ້ອງ ທີ່ໃຫ້ການຮ່ວມມື ແລະ ສະໜັບສະໜູນຢ່າງກວ້າງຂວາງ.

ຕາງໜ້າຄະນະປະຈໍາສະພາແຫ່ງຊາດ, ສະມາຊິກສະພາແຫ່ງຊາດ ຂໍສະແດງຄວາມຂອບໃຈເປັນຢ່າງສູງມາຍັງກົມການເມືອງສູນກາງພັກ ແລະ ຄະນະເລຂາທິການສູນກາງພັກ ທີ່ຍາມໃດກໍໄດ້ໃຫ້ການຊີ້ນໍາຢ່າງໃກ້ຊິດຕໍ່ສະພາແຫ່ງຊາດໂດຍຕະຫຼອດມາ, ຂໍສະແດງຄວາມຂອບໃຈເປັນຢ່າງສູງມາຍັງບັນດາການນໍາພັກ-ລັດ, ສູນກາງແນວລາວສ້າງຊາດ, ສະຫະພັນນັກຮົບເກົ່າແຫ່ງຊາດລາວ ແລະ ອົງການຈັດຕັ້ງມະຫາຊົນຂັ້ນສູນກາງ ທີ່ໄດ້ໃຫ້ກຽດເຂົ້າຮ່ວມກອງປະຊຸມ ແລະ ຂອບໃຈມາຍັງປະຊາຊົນລາວບັນດາເຜົ່າຢູ່ພາຍໃນ ແລະ ຊາວລາວທີ່ຢູ່ຕ່າງປະເທດ ທີ່ໄດ້ຕິດຕາມກອງປະຊຸມຂອງພວກເຮົາໃນຄັ້ງນີ້ ຢ່າງຈົດຈໍ່ ແລະ ສົ່ງຄໍາຄິດເຫັນຜ່ານໂທລະສັບສາຍດ່ວນ ມາຍັງກອງປະຊຸມຢ່າງຫຼວງຫຼາຍ.

ຂໍສະແດງຄວາມຂອບໃຈຕໍ່ທຸກພາກສ່ວນກ່ຽວຂ້ອງ ທີ່ໄດ້ມີສ່ວນຮ່ວມໃນຜົນສໍາເລັດຂອງກອງປະຊຸມຄັ້ງນີ້ ເປັນຕົ້ນ ກອງເລຂານຸການກອງປະຊຸມ ທີ່ເອົາໃຈໃສ່ຮັບຜິດຊອບເນື້ອໃນ, ວຽກບໍລິຫານ-ພິທີການຮອບດ້ານ ດ້ວຍຄວາມຫ້າວຫັນ ແລະ ມີຄວາມຮັບຜິດຊອບສູງ; ຂໍຂອບໃຈຕໍ່ກໍາລັງປ້ອງກັນຊາດ-ປ້ອງກັນຄວາມສະຫງົບ ທີ່ໄດ້ປະກອບສ່ວນ ເຮັດໃຫ້ກອງປະຊຸມມີຄວາມປອດໄພທຸກປະການ ແລະ ຂອບໃຈຕໍ່ບັນດາສື່ມວນຊົນ ທີ່ໄດ້ເອົາໃຈໃສ່ເຜີຍແຜ່ການດໍາເນີນກອງປະຊຸມສະພາແຫ່ງຊາດ ໃຫ້ສັງຄົມໄດ້ເຂົ້າເຖິງ ແລະ ຕິດຕາມຢ່າງຕໍ່ເນື່ອງ.

ກອງປະຊຸມສະເໜີໃຫ້ ຄະນະປະຈໍາສະພາແຫ່ງຊາດ, ບັນດາກໍາມາທິການ, ຄະນະເລຂາທິການສະພາແຫ່ງຊາດ, ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ, ສະມາຊິກສະພາແຫ່ງຊາດ, ລັດຖະບານ, ອົງການທີ່ກ່ຽວຂ້ອງ, ອົງການປົກຄອງທ້ອງຖິ່ນ ແລະ ທຸກພາກສ່ວນທີ່ກ່ຽວຂ້ອງ ຈົ່ງໄດ້ຜັນຂະຫຍາຍມະຕິກອງປະຊຸມຄັ້ງນີ້ ເຂົ້າໃນການປະຕິບັດວຽກງານຂອງແຕ່ລະພາກສ່ວນ ໃຫ້ໄດ້ຮັບຜົນສໍາເລັດເປັນຢ່າງດີ.

ສຸດທ້າຍນີ້, ໃນໂອກາດປີໃໝ່ສາກົນຈະໜູນວຽນມານີ້, ຂ້າພະເຈົ້າ ຕາງໜ້າໃຫ້ກອງປະຊຸມສະພາແຫ່ງຊາດ ຂໍອວຍພອນໄຊອັນປະເສີດ ມາຍັງທ່ານເລຂາທິການໃຫຍ່, ປະທານປະເທດ ຈົ່ງມີພາລະນາໄມສົມບູນ, ມີຄວາມຜາສຸກໃນຊີວິດຄອບຄົວ, ມີຜົນສໍາເລັດໃໝ່ໃຫຍ່ຫຼວງກວ່າເກົ່າ ໃນການຊີ້ນໍາ-ນໍາພາປະເທດຊາດກ້າວຂຶ້ນຢ່າງໜັກແໜ້ນ.

ຂໍອວຍພອນໃຫ້ບັນດາຜູ້ນໍາຂັ້ນສູງພັກ-ລັດ, ອະດີດຜູ້ນໍາພັກ-ລັດ, ສະມາຊິກສະພາແຫ່ງຊາດ ຕະຫຼອດຮອດພະນັກງານ, ທະຫານຕຳຫຼວດ ແລະ ປະຊາຊົນລາວບັນດາເຜົ່າໃນທົ່ວປະເທດ ຈົ່ງມີສຸຂະພາບເຂັ້ມແຂງ, ມີຄວາມສຸກໃນຄອບຄົວ ແລະ ປະສົບຜົນສໍາເລັດໃນໜ້າທີ່ວຽກງານອັນມີກຽດຂອງຕົນ.

ໃນໂອກາດອັນສະຫງ່າລາສີນີ້, ຂ້າພະເຈົ້າ ຂໍປະກາດປິດກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ຢ່າງເປັນທາງການນັບແຕ່ເວລານີ້ເປັນຕົ້ນໄປ.