– ສົມເດັດ ມະຫາ ຣັດສະເພຍທິກາ ທິພະໄດ ຄູນ ສຸດາຣີ, ປະທານສະພາແຫ່ງຊາດ ແຫ່ງ ລາຊະອານາຈັກ ກຳປູເຈຍ ທີ່ນັບຖື!
– ພະນະທ່ານ ເວື່ອງ ດິ່ງ ເຫວະ, ປະທານສະພາແຫ່ງຊາດ ແຫ່ງ ສສ.ຫວຽດນາມ ທີ່ນັບຖື!
– ພະນະທ່ານ ໄຊສົມພອນ ພົມວິຫານ ປະທານສະພາແຫ່ງຊາດແຫ່ງ ສປປ ລາວ ທີ່ນັບຖື!
– ບັນດາທ່ານຜູ້ແທນ, ແຂກຜູ້ມີກຽດ ທ່ານຍິງ ແລະ ທ່ານຊາຍ ທີ່ຮັກແພງທັງຫຼາຍ.
ມື້ນີ້, ຂ້າພະເຈົ້າຮູ້ສຶກພາກພູມໃຈ ແລະ ມີຄວາມປິຕິຍິນດີເປັນຢ່າງຍິ່ງ ທີ່ໄດ້ເຂົ້າຮ່ວມພິທີເປີດກອງປະຊຸມສຸດຍອດລັດຖະສະພາ ກຳປູເຈຍ-ລາວ-ຫວຽດນາມ (CLV) ຄັ້ງທີ 1, ເຊິ່ງເປັນກອງປະຊຸມຄັ້ງປະຫວັດສາດຂອງອົງການນິຕິບັນຍັດສາມປະເທດພວກເຮົາ ທີ່ໄດ້ຈັດຂຶ້ນພາຍໃຕ້ຫົວຂໍ້: “ເພີ່ມທະວີບົດບາດຂອງລັດຖະສະພາ ໃນການສົ່ງເສີມການຮ່ວມມືຮອບດ້ານ ລະຫວ່າງ ກໍາປູເຈຍ-ລາວ-ຫວຽດນາມ’’.
ໃນນາມປະທານປະເທດແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ກໍຄືຕາງໜ້າໃຫ້ປະຊາຊົນລາວບັນດາເຜົ່າໃນທົ່ວປະເທດ, ຂ້າພະເຈົ້າຂໍສະແດງຄວາມຊົມເຊີຍ ຕໍ່ສາມອົງການນິຕິບັນຍັດ ຂອງ 3 ປະເທດ ທີ່ໄດ້ຍົກລະດັບກົນໄກການປະຊຸມຈາກລະດັບຫົວໜ້າກໍາມາທິການຂຶ້ນເປັນລະດັບປະທານສະພາ ແລະ ໄດ້ເລືອກຫົວຂໍ້ກອງປະຊຸມທີ່ມີຄວາມໝາຍສຳຄັນ, ສອດຄ່ອງກັບສະພາບຄວາມເປັນຈິງຂອງ 3 ປະເທດແລະ ທັງຕອບສະໜອງຄວາມຮຽກຮ້ອງຕ້ອງການຂອງການພັດທະນາດ້ານພື້ນຖານໂຄງລ່າງ ແລະ ການພັດທະນາເສດຖະກິດ-ສັງຄົມຢູ່ເຂດສາມຫຼ່ຽມພັດທະນາໃນປັດຈຸບັນ. ຂ້າພະເຈົ້າ ສະໜັບສະໜູນຕໍ່ອົງການນິຕິບັນຍັດຂອງສາມປະເທດ ໃນການຍົກສູງບົດບາດຂອງຕົນຂຶ້ນ ເພື່ອປະກອບສ່ວນເຂົ້າໃນການຊຸກຍູ້, ສົ່ງເສີມ ແລະ ຕິດຕາມກວດກາ ການຈັດຕັ້ງປະຕິບັດບັນດາແຜນງານ ແລະ ໂຄງການຮ່ວມມືຕ່າງໆໃຫ້ມີປະສິດທິພາບ ແລະ ປະສິດທິຜົນ.
ບັນດາທ່ານຜູ້ແທນ ທ່ານຍິງ ແລະ ທ່ານຊາຍ ທີ່ນັບຖື, ຄືດັ່ງພວກເຮົາຮັບຮູ້ນໍາກັນແລ້ວວ່າ ສາມປະເທດຂອງພວກເຮົາໄດ້ມີປະຫວັດສາດ ແລະ ມູນເຊື້ອຮ່ວມສໍາພັນສູ້ຮົບອັນຍາວນານໃນການຕໍ່ສູ້ຕ້ານສັດຕູໂຕດຽວກັນ ເພື່ອເອກະລາດແຫ່ງຊາດໃນເມື່ອກ່ອນ ຈົນສາມາດຍາດໄດ້ໄຊຊະນະ ແລະ ພ້ອມກັນສ້າງສາພັດທະນາປະເທດຊາດຂອງຕົນ ເປັນກ້າວໆມາ ແລະ ສືບຕໍ່ຄຽງບ່າຄຽງໄຫຼ່, ຮ່ວມມື, ຊ່ວຍເຫຼືອເຊິ່ງກັນ ແລະ ກັນ ໃນພາລະກິດປົກປັກຮັກສາ ແລະ ສ້າງສາປະເທດຊາດໃນປັດຈຸບັນ.
ກອງປະຊຸມຄັ້ງນີ້ ໄດ້ຈັດຂຶ້ນໃນທ່າມກາງສະພາບການຂອງພາກພື້ນ ແລະ ສາກົນ ສືບຕໍ່ມີການຜັນແປໄປຢ່າງວ່ອງໄວ, ສັບສົນ ແລະ ຄາດຄະເນໄດ້ຍາກ, ຄຽງຄູ່ກັນນັ້ນ, ບັນຫາໄພພິບັດທາງທໍາມະຊາດ, ການປ່ຽນແປງຂອງດິນຟ້າອາກາດ ແລະ ຜົນກະທົບເສດຖະກິດ ຫຼັງໂຄວິດ-19 ຍັງເປັນສິ່ງທ້າທາຍທົດສອບ ຕໍ່ການພັດທະນາຂອງບັນດາປະເທດຕ່າງໆ ໃນໂລກ, ລວມທັງສາມປະເທດຂອງພວກເຮົາ.
ຂ້າພະເຈົ້າ ຕີລາຄາສູງຕໍ່ຂໍ້ລິເລີ່ມ ຂອງການຈັດກອງປະຊຸມສຸດຍອດລັດຖະສະພາ (CLV) ຄັ້ງທີ 1 ເຊິ່ງເປັນຄັ້ງທໍາອິດທີ່ຜູ້ນໍາຂັ້ນສູງຂອງສະພາແຫ່ງຊາດ ສາມປະເທດ ຈະໄດ້ຮ່ວມກັນປຶກສາຫາລື ກ່ຽວກັບການຮ່ວມມືຮອບດ້ານ ຕາມບົດບາດຂອງຕົນ ເພື່ອຊຸກຍູ້ ແລະ ກວດກາ ການປະຕິບັດບັນດາແຜນງານ, ກິດຈະກໍາຕ່າງໆຂອງບັນດາກະຊວງ, ຂະແໜງການທີ່ກ່ຽວຂ້ອງຂອງສາມປະເທດ ໂດຍສະເພາະແມ່ນ ການດຳເນີນໂຄງການຮ່ວມມື ແລະ ການລົງທຶນຂອງລັດຖະບານສາມປະເທດ ກໍຄືໂຄງການຊ່ວຍເຫຼືອສາກົນຢູ່ໃນເຂດສາມຫຼ່ຽມພັດທະນາ (CLV) ເພື່ອແນໃສ່ ເພີ່ມທະວີຄວາມສາມັກຄີ, ມິດຕະພາບ ແລະ ການຮ່ວມມືເພື່ອການພັດທະນາຢູ່ໃນເຂດດັ່ງກ່າວ ໃຫ້ມີປະສິດທິພາບ ແລະ ປະສິດທິຜົນ ເພື່ອຍົກລະດັບຊີວິດການເປັນຢູ່ຂອງປະຊາຊົນໃຫ້ດີຂຶ້ນເທື່ອລະກ້າວ.
ບັນດາທ່ານທີ່ນັບຖື ແລະ ຮັກແພງ,
ໄລຍະຜ່ານມາ, ເຂດສາມຫຼ່ຽມພັດທະນາ ໄດ້ປະເຊີນໜ້າກັບສິ່ງທ້າທາຍຫຼາຍຢ່າງ ເປັນຕົ້ນແມ່ນບັນຫາໄພພິບັດທາງທຳມະຊາດ, ການແຜ່ລະບາດຂອງ ໂຄວິດ-19, ບັນຫາພື້ນຖານໂຄງລ່າງຊຸດໂຊມ, ບໍ່ທັນສະດວກ ແລະ ອື່ນໆ ເຊິ່ງໄດ້ສົ່ງຜົນກະທົບຫຼາຍສົມຄວນຕໍ່ການພັດທະນາເສດຖະກິດ-ສັງຄົມ ແລະ ຊີວິດການເປັນຢູ່ຂອງປະຊາຊົນ. ຂ້າພະເຈົ້າ ຕີລາຄາສູງຕໍ່ໝາກຜົນຂອງການຮ່ວມມື, ການຊ່ວຍເຫຼືອເຊິ່ງກັນ
ແລະ ກັນ ໃນການຮັບມືກັບການແຜ່ລະບາດຂອງໂຄວິດ-19, ເຮັດໃຫ້ເຂດສາມຫຼ່ຽມພັດທະນາ CLV ໄດ້ມີການຟື້ນຟູເສດຖະກິດ ພາຍຫຼັງທີ່ການລະບາດຂອງພະຍາດດັ່ງກ່າວຜ່ອນຄາຍລົງ.
ຂ້າພະເຈົ້າເຫັນວ່າ ການຮ່ວມມືຢູ່ໃນເຂດສາມຫຼ່ຽມພັດທະນາ CLV ມີການເຕີບໃຫຍ່ຂະຫຍາຍຕົວຂຶ້ນເທື່ອລະກ້າວ ບົນພື້ນຖານສາຍພົວພັນມິດຕະພາບ, ຄວາມສາມັກຄີຖານເພື່ອນບ້ານໃກ້ຄຽງທີ່ດີ, ມີຄວາມເຂົ້າອົກເຂົ້າໃຈກັນ, ມີຄວາມໄວ້ເນື້ອເຊື່ອໃຈກັນ ແລະ ມີການຮ່ວມມືຮອບດ້ານນໍາກັນ ຊຶ່ງເປັນການປະກອບສ່ວນສໍາຄັນເຂົ້າໃນການສົ່ງເສີມການພັດທະນາເສດຖະກິດ-ສັງຄົມ, ຫຼຸດຜ່ອນຄວາມທຸກຍາກຂອງປະຊາຊົນ ແລະ ສົ່ງເສີມການເຊື່ອມໂຍງເຊື່ອມຈອດກັບພາກພື້ນ ໂດຍມີການແລກປ່ຽນການຢ້ຽມຢາມຂອງການນໍາຂັ້ນຕ່າງໆ ທັງຢູ່ສູນກາງ ແລະ ທ້ອງຖິ່ນຂອງ 3 ປະເທດ ເຮັດໃຫ້ເຂດສາມຫຼ່ຽມພັດທະນາ ກາຍເປັນເຂດແຫ່ງ ສັນຕິພາບ, ມິດຕະພາບ ແລະ ການຮ່ວມມື ເພື່ອການພັດທະນາແບບຍືນຍົງ.
ຂ້າພະເຈົ້າ ເຊື່ອໝັ້ນວ່າ ກອງປະຊຸມສຸດຍອດລັດຖະສະພາ ກຳປູເຈຍ-ລາວ-ຫວຽດນາມ (CLV) ຄັ້ງປະຖົມມະເລີກນີ້ ຈະເປັນໂອກາດດີ ໃຫ້ແກ່ຄະນະຜູ້ແທນສະພາແຫ່ງຊາດທັງສາມປະເທດ ໄດ້ສະແດງຄວາມຄິດຄວາມເຫັນ ແລະ ຈະໄດ້ແລກປ່ຽນທັດສະນະຮ່ວມກັນຢ່າງກົງໄປກົງມາ ຕໍ່ບັນຫາຕ່າງໆທີ່ມີຄວາມສົນໃຈ ແລະ ມີຜົນປະໂຫຍດຮ່ວມກັນ ບົນຈິດໃຈຮັດແໜ້ນຄວາມສາມັກຄີ, ມິດຕະພາບ ແລະ ການຮ່ວມມືຮອບດ້ານລະຫວ່າງ ສາມສະພາແຫ່ງຊາດ ກຳປູເຈຍ, ລາວ ແລະ ຫວຽດນາມ ໂດຍສະເພາະ ບັນດາແຂວງໃນເຂດສາມຫຼ່ຽມພັດທະນາ ພ້ອມກັນຊ່ວຍເຫຼືອ ສະໜັບສະໜູນເຊິ່ງກັນ ແລະ ກັນ ໃນການພັດທະນາເສດຖະກິດ-ສັງຄົມ ໃຫ້ນັບມື້ນັບມີໝາກຜົນຕົວຈິງແລະ ຫວັງຢ່າງຍິ່ງວ່າກອງປະຊຸມຄັ້ງນີ້ ຈະສາມາດພິຈາລະນາຮັບຮອງເອົາຖະແຫຼງການຮ່ວມຂອງກອງປະຊຸມຕາມຈຸດປະສົງທີ່ວາງໄວ້.
ສຸດທ້າຍນີ້, ຂ້າພະເຈົ້າ ຂໍອວຍພອນອັນປະເສີດ ມາຍັງ ສົມເດັດ ມະຫາ ຣັດສະເພຍທິກາ ທິພະໄດ ຄູນ ສຸດາຣີ ປະທານສະພາແຫ່ງຊາດແຫ່ງລາຊະອານາຈັກກຳປູເຈຍ, ພະນະທ່ານ ເວື່ອງ ດິ່ງເຫວະ ປະທານສະພາແຫ່ງຊາດແຫ່ງ ສສ. ຫວຽດນາມ, ພະນະທ່ານ ໄຊສົມພອນພົມວິຫານ ປະທານສະພາແຫ່ງຊາດແຫ່ງ ສປປ ລາວ ແລະ ຄະນະຜູ້ແທນກອງປະຊຸມທຸກທ່ານ ຈົ່ງມີສຸຂະພາບເຂັ້ມແຂງ, ມີຄວາມຜາສຸກ ແລະ ປະສົບຜົນສຳເລັດໃນໜ້າທີ່ວຽກງານອັນສູງສົ່ງຂອງບັນດາທ່ານ.
ອວຍພອນໃຫ້ກອງປະຊຸມສຸດຍອດລັດຖະສະພາ ກຳປູເຈຍ-ລາວ-ຫວຽດນາມ (CLV) ຄັ້ງທີ 1 ນີ້ ຈົ່ງປະສົບຜົນສຳເລັດຢ່າງຈົບງາມ.