​(ສພຊ) ວັນທີ 3 ກຸມພາ 2022 ທ່ານ ພົທ. ສຸວອນ ເລືອງບຸນມີ ຮອງປະທານສະພາແຫ່ງຊາດ ທັງເປັນຜູ້ຊີ້ນໍາວຽກງານກໍາມາທິການບັນດາເຜົ່າ ແລະ ກໍາມາທິການປ້ອງກັນຊາດ-ປ້ອງກັນຄວາມສະຫງົບ ພ້ອມດ້ວຍຄະນະ ຮ່ວມກັບສະພາປະຊາຊົນແຂວງຊຽງຂວາງ ໄດ້ເຄື່ອນໄຫວເຮັດວຽກຢູ່ສະໂມສອນເມືອງໝອກ ແຂວງຊຽງຂວາງ ເພື່ອຕິດຕາມກວດກາການຈັດຕັ້ງປະຕິບັດດໍາລັດວ່າດ້ວຍການຄຸ້ມຄອງ ແລະ ປົກປ້ອງການເຄື່ອນໄຫວສາສະໜາ ຢູ່ ສປປລາວ ຂອງພາກສ່ວນກ່ຽວຂ້ອງ; ການຈັດຕັ້ງປະຕິບັດວຽກງານຊົນເຜົ່າ, ພັດທະນາຊົນນະບົດ ແລະ ແກ້ໄຂຄວາມທຸກຍາກ, ການຈັດສັນພູມລໍາເນົາ ແລະ ອາຊີບຄົງທີ່, ການປົກຄອງທ້ອງຖິ່ນ ຕິດພັນກັບວຽກງານສາມສ້າງ, ວຽກງານແນວໂຮມ ແລະ ອົງການຈັດຕັ້ງມະຫາຊົນ ທັງເພື່ອເປັນການເກັບກໍາຂໍ້ມູນຕົວຈິງ.

​ໂອກາດດັ່ງກ່າວ, ໄດ້ຮັບຟັງລາຍງານຫຍໍ້ກ່ຽວກັບການພັດທະນາເສດຖະກິດ-ສັງ ຄົມຂອງເມືອງ ຈາກທ່ານເຈົ້າເມືອງໆໝອກ; ວຽກງານຂົງເຂດກະສິກໍາພາຍໃນເມືອງ; ວຽກງານເຜົ່າ ແລະ ສາສະໜາ ຈາກພະແນກພາຍໃນແຂວງ; ວຽກງານຄວາມສາມັກຄີຂອງບັນດາເຜົ່າ ແລະ ສາສະໜາ ຈາກແນວລາວສ້າງຊາດແຂວງ; ວຽກງານປ້ອງກັນຄວາມສະຫງົບແຂວງ; ຈາກນັ້ນ, ຄະນະກໍໄດ້ມອບເຄື່ອງຊ່ວຍເຫລືອຈໍານວນໜຶ່ງໃຫ້ແກ່ອໍານາດການປົກຄອງບ້ານຈະເລີນໃໝ່, ບ້ານນໍ້າຕາກ ແລະ ບ້ານທົ່ງເປີ ແຂວງຊຽງຂວາງ ເພື່ອນໍາໄປແຈກຢາຍໃຫ້ປະຊາຊົນພາຍໃນບ້ານຂອງຕົນ.

(ພາບ ແລະ ຂ່າວ: ສອນສັກ ວັນວິໄຊ)