(​ສ​ພ​ຊ) ວັນທີ 23 ພະຈິກ 2021 ທີ່ສະພາແຫ່ງຊາດ (ສ​ພ​ຊ) ນະ​ຄອນ​ຫລ​ວງວຽງ​ຈັນ, ທ່ານ ສັນຍາ ປຣະເສີດ ປະທານກຳມາທິການການຕ່າງປະເທດ ແລະ ທ່ານ ທັນຕາ ກອງຜາລີ ຮອງປະທານກຳມາທິການແຜນການ, ການເງິນ ແລະ ການກວດສອບ ພ້ອມດ້ວຍພະນັກງານ ແລະ ວິຊາການທີ່ກ່ຽວຂ້ອງ ໄດ້ເຂົ້າຮ່ວມກອງປະຊຸມປິ່ນອ້ອມຂອງກອງປະຊຸມໃຫຍ່ສະຫະພັນລັດຖະສະພາສາກົນ (IPU) ຄັ້ງທີ 143 ຄື: ກອງປະຊຸມອາຊຽນ+3 ແລະ ກອງປະຊຸມກຸມລັດຖະສະພາພາກພື້ນອາຊີ-ປາຊິຟິກ ໃນຮູບແບບທາງໄກ ໂດຍສອງກອງປະຊຸມດັ່ງກ່າວ, ເປັນກົນໄກໜຶ່ງທີ່ນອນໃນກອບຂອງກອງປະຊຸມໃຫຍ່ສະຫະພັນລັດຖະສະພາສາກົນ (IPU).

           ກອງປະຊຸມອາຊຽນ+3 ຄັ້ງນີ້, ໄດ້ຈັດຂຶ້ນພາຍໃຕ້ການເປັນປະທານຂອງ ສ​ພ​ຊ ແຫ່ງ ສສ.ຫວຽດນາມ ​ເຊິ່ງມີຄະນະຜູ້ແທນເຂົ້າຮ່ວມຈາກສະມາຊິກອາຊຽນ 7 ປະເທດ ແລະສປ.ຈີນ, ຍີປຸ່ນ ແລະ ​ສ.ເກົາຫ​ລີ ລວມທັງໝົດ 10 ປະເທດ.

ໃນ​ວາ​ລະກອງປະຊຸມ, ໄດ້ຮັບຮອງເອົາບົດບັນທຶກກອງປະຊຸມອາຊຽນ+3 ທີ່ໄດ້ຈັດຂຶ້ນໃນວັນທີ 20 ເມສາ 2021 ໃນຮູບແບບທາງໄກ ແລະ ໄດ້ພິຈາລະນາຮັບຮອງເອົາຜູ້ສະໝັກເຂົ້າຮັບຕຳແໜ່ງວ່າງໃນກຳມາທິການຕ່າງໆຂອງ IPU ຄັ້ງທີ 143 ໂດຍກອງປະຊຸມໄດ້ຕົກລົງເຫັນດີ ສະເໜີສະມາຊິກລັດຖະສະພາຈາກລາຊະອານາຈັກໄທ ແລະ ອິນໂດເນເຊຍ ຕາງໜ້າໃຫ້ແກ່ກຸ່ມອາຊຽນ+3 ເພື່ອສະເໜີຕໍ່ກອງປະຊຸມໃຫຍ່ IPU ຄັ້ງທີ 143 ທີ່ຈະຈັດຂຶ້ນໃນລະຫວ່າງວັນທີ 26-30 ພະຈິກ 2021 ທີ່ ມາດຣິດ ປະເທດສະເປນ ເປັນຜູ້ພິຈາລະນາຮັບຮອງເອົາ. ພ້ອມນີ້, ໃນຕອນທ້າຍຂອງກອງປະຊຸມໄດ້ຕົກລົງເຫັນດີໃຫ້ລັດຖະສະພາແຫ່ງລາຊະອານາຈັກກຳປູເຈຍ ເປັນເຈົ້າພາບກອງປະຊຸມອາຊຽນ+3 ໃນຄັ້ງຕໍ່ໄປ.

            ໃນມື້ດຽວກັນ, ຄະນະຜູ້ແທນ ສ​ພ​ຊ ລາວ ຍັງໄດ້ສືບຕໍ່ເຂົ້າຮ່ວມກອງປະຊຸມກຸ່ມລັດຖະສະພາພາກພື້ນອາຊີ-ປາຊີຟິກ ເຊິ່ງຈັດຂຶ້ນພາຍໃຕ້ການເປັນປະທານຂອງ ສ.ເກົາຫ​ລີ.

             ກອງປະຊຸມໄດ້ພິຈາລະນາຮັບຮອງເອົາບົດບັນທຶກຂອງກອງປະຊຸມກຸ່ມພາກພື້ນອາຊີ-ປາຊີຟິກ ຄັ້ງຜ່ານມາ ທີ່ໄດ້ຈັດຂຶ້ນໃນວັນທີ 7 ພຶດສະພາ 2021, ຮັບຟັງບົດລາຍງານຂອງຄະນະບໍລິຫານງານ IPU, ບົດລາຍງານຂອງກອງປະຊຸມອາຊຽນ+3, ການສະເໜີຕໍາແໜ່ງງານທີ່ວ່າງ ເພື່ອຈະບັນຈຸເຂົ້າໃນກອງປະຊຸມໃຫຍ່ IPU ຄັ້ງທີ 143, ພ້ອມທັງການພິຈາລະນາບັນຫາຮີບດ່ວນ ແລະ ຄະນະກຳມະການຮ່າງເນື້ອໃນຕ່າງໆເຂົ້າໃນວາລະກອງປະຊຸມດັ່ງກ່າວ.

(ພາບ ແລະ ຂ່າວ: ປາກາລັກ ພົມມີໄຊ)