ໃນລະຫວ່າງວັນທີ 21-23 ມີນາ 2023 ທ່ານ ນາງ ບັງອອນ ໄຊຍະສິດ ຄະນະປະຈໍາພັກແຂວງ ຮອງປະທານສະພາປະຊາຊົນແຂວງຄໍາມ່ວນ ພ້ອມດ້ວຍ ຄະນະສະມາຊິກສະພາປະຊາຊົນແຂວງຄໍາມ່ວນ ປະຈໍາເຂດເລືອກຕັ້ງເມືອງບົວລະພາ ໄດ້ລົງເຄື່ອນໄຫວພົບປະຜູ້ມີສິດເລືອກຕັ້ງທີຕິດພັນກັບການໂຄສະນາເຜີຍແຜ່ເນື້ອໃນຜົນສໍາເລັດຂອງກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ແລະ ຂອງສະພາປະຊາຊົນແຂວງຄໍາມ່ວນ ຊຸດທີ II ຢູ່ 6 ຈຸດ, ຂອງເມືອງບົວລະພາ ຄື: ບ້ານໂພນສ້າງໄຟ, ກະແຕ້, ຊອກ, ກະຈາມໃຫ່ຍ, ນາຕັ້ງໃຈ ແລະ ບ້ານແສນພັນ ໂດຍການຕ້ອນຮັບ ແລະ ເຂົ້າຮ່ວມມີບັນດາ ທ່ານຄະນະພັກເມືອງ, ອໍານາດການປົກຄອງບ້ານ ແລະ ຕະຫຼອດຮອດປະຊາຊົນບັນດາເຜົ່າ ເຂົ້າຮ່ວມທັງໝົດ 810 ເທື່ອຄົນ, ຍິງ 412 ເທື່ອຄົນ.
ວາລະ ແລະ ແຜນຂອງການເຄື່ອນໄຫວຈັດຕັ້ງເຜີຍແຜ່ຜົນສຳເລັດກອງປະຊຸມໃນຄັ້ງນີ້ໄດ້ຮັບຟັງການລາຍງານໂດຍສັງເຂບຈາກຕ່າງໜ້າອຳນາດການປົກຄອງບ້ານເປັນຕົ້ນ: ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ທິດທາງແຜນການໃນຕໍ່ໜ້າ, ຈາກນັ້ນ ທ່ານ ຮອງປະທານສະພາປະຊາຊົນແຂວງຄໍາມ່ວນເຜີຍແຜ່ເນື້ອໃນຜົນສໍາເລັດກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX, ເຊິ່ງໄດ້ພິຈາລະນາຮັບຮອງເອົາຫຼາຍບັນຫາສໍາຄັນທີ່ເປັນພື້ນຖານຂອງຊາດ ເປັນຕົ້ນ: ກອງປະຊຸມໄດ້ຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈຳປີ 2022 ແລະ ແຜນການ ປີ 2023; ບົດລາຍງານຂອງລັດຖະບານກ່ຽວກັບການສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ປະຈຳປີ 2021, ຄາດຄະເນການຈັດຕັ້ງປະຕິບັດແຜນງົບປະມານແຫ່ງລັດ ແລະ ແຜນເງິນຕາ ປະຈຳປີ 2022 ແລະ ທິດທາງແຜນການ ປີ 2023; ບົດສະຫຼຸບການເຄື່ອນໄຫວວຽກງານ ປະຈຳປີ 2022 ແລະ ທິດທາງແຜນການເຄື່ອນໄຫວວຽກງານ ປະຈຳປີ 2023 ຂອງອົງການກວດສອບແຫ່ງລັດ; ບົດລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈຳປີ 2022 ແລະ ທິດທາງແຜນການ ປະຈຳປີ 2023 ຂອງອົງການກວດກາແຫ່ງລັດ; ບົດລາຍງານຂອງອົງການໄອຍະການປະຊາຊົນສູງສຸດ ກ່ຽວກັບການເຄື່ອນໄຫວວຽກງານ ປະຈຳປີ 2022 ແລະ ທິດທາງແຜນການ ປີ 2023; ບົດລາຍງານຂອງສານປະຊາຊົນສູງສຸດ ກ່ຽວກັບການເຄື່ອນໄຫວວຽກງານ ປະຈຳປີ 2022 ແລະ ທິດທາງແຜນການ ປີ 2023; ບົດລາຍງານການເຄື່ອນໄຫວວຽກງານ ປະຈຳປີ 2022 ແລະ ທິດທາງແຜນການ ປີ 2023 ຂອງສະພາແຫ່ງຊາດ ແລະ ມະຕິ ວ່າດ້ວຍການຮັບຮອງເອົາການສ້າງ ແລະ ປັບປຸງກົດໝາຍ ຈໍານວນ 12 ສະບັບ ໃນນີ້ ກົດໝາຍສ້າງໃໝ່ 3 ສະບັບ ແລະ ກົດໝາຍປັບປຸງ 9 ສະບັບ, ພ້ອມນັ້ນ ຄະນະສະມາຊິກສະພາປະຊາຊົນແຂວງຄໍາມ່ວນ ກໍ່ໄດ້ຜັດປ່ຽນກັນຂຶ້ນເຜີຍແຜ່ເນື້ອໃນຜົນສຳເລັດຂອງກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງຄໍາມ່ວນ ຊຸດທີ II.
ການເຄື່ອນໄຫວຄັ້ງນີ້ ຄະນະຜູ້ແທນ ກໍ່ໄດ້ຮັບຟັງຄໍາຄິດເຫັນ, ຄໍາສະເໜີຂອງພໍ່ແມ່ປະຊາຊົນໂດຍສ່ວນຫລາຍແມ່ນກ່ຽວກັບການສ້າງສາພັດທະນາພື້ນຖານໂຄງລ່າງຕົ້ນເປັນ: ເສັ້ນທາງ, ການຂະຫຍາຍຕາຂ່າຍໄຟຟ້າ, ຊົນລະປະທານ, ສ້າງໂຮງຮຽນ, ສຸກສາລາ ຕໍ່ກັບຄໍາສະເໜີດັ່ງກ່າວກໍ່ໄດ້ອະທິບາຍຊີ້ແຈງ ແລະ ບາງຄໍາສະເໜີທີ່ຕິດກັບຫລາຍພາກສ່ວນກໍ່ຈະໄດ້ນຳເອົາໄປຄົ້ນຄວ້າສັງລວມມອບໃຫ້ຄະນະກໍາມະການທີ່ກ່ຽວຂ້ອງປະສານສົມທົບກັບພາກສ່ວນຕ່າງໆ ຂອງອົງການປົກຄອງແຂວງ ຄົ້ນຄວ້າແກ້ໄຂ ໃຫ້ຖືກຕ້ອງສອດຄ່ອງຕາມກົດໝາຍ ແລະ ລະບຽບການ.
ພ້ອມນັ້ນ, ທ່ານຮອງປະທານສະພາປະຊາຊົນແຂວງຄໍາມ່ວນ ພ້ອມຄະນະ ຍັງໄດ້ນໍາເອົາເຄື່ອງອຸປະໂພ-ບໍລິໂພກ ມອບໃຫ້ຄອບຄົວທີ່ຂາດເຂີນຈໍານວນ 8 ຄອບຄົວ.
ໂດຍ: ເອື້ອ ມະໂນສິງ