(ສພຊ) ເພື່ອສ້າງຄວາມເຂັ້ມແຂງໃຫ້ບຸກຄະລາກອນພາຍໃນກົມສື່ມວນຊົນ ທາງດ້ານເຕັກນິກ ແລະ ເນື້ອໃນວຽກງານສື່ມວນຊົນ ເປັນຕົ້ນແມ່ນການຂີດຂຽນຂ່າວ, ບົດ ແລະ ການຕັດຕໍ່ວິດີໂອ; ເພື່ອຍົກລະດັບຄວາມຮູ້, ຄວາມສາມາດ, ປະສົບການ, ຄວາມເຂົ້າໃຈດ້ານວຽກງານສື່ມວນຊົນ ແລະ ເພື່ອຮັບປະກັນຄຸນນະພາບທາງດ້ານຂໍ້ມູນ-ຂ່າວສານຂອງສະພາແຫ່ງຊາດ ໃຫ້ມີປະສິດທິພາບ ແລະ ປະສິດທິຜົນ ສາມາດຕອບສະໜອງໄດ້ໜ້າທີ່ວຽກງານຂອງສະພາແຫ່ງຊາດ; ເພື່ອເປັນການສຳມະນາບົດຮຽນດ້ານເຕັກນິກ, ແລກປ່ຽນທາງດ້ານວຽກງານການຂຽນຂ່າວ-ບົດ ແລະ ວິທີການແກ້ໄຂບັນຫາຕ່າງໆ ໃນການປະຕິບັດວຽກງານສື່ມວນຊົນຕົວຈິງໃນໄລຍະຜ່ານມາ. ລະຫວ່າງວັນທີ 5-6 ພະຈິກ 2022 ທີ່ເມືອງວັງວຽງ ແຂວງວຽງຈັນ ໄດ້ຈັດກອງປະຊຸມສຳມະນາສ້າງຄວາມເຂັ້ມແຂງໃຫ້ລັດຖະກອນພາຍໃນກົມສື່ມວນຊົນ ຄະນະເລຂາທິການສະພາແຫ່ງຊາດ ໂດຍການເປັນປະທານຂອງທ່ານ ນາງ ປິ່ງຄຳ ລາຊະສິມມາ ເລຂາທິການສະພາແຫ່ງຊາດ, ມີທ່ານຮອງເລຂາທິການສະພາແຫ່ງຊາດ, ຜູ້ຊີ້ນໍາວຽກງານສື່ມວນຊົນ; ຄະນະຊ່ຽວຊານທີ່ປຶກສາວຽກງານສື່ມວນຊົນຂອງສະພາແຫ່ງຊາດ, ຄະນະກົມ, ຄະນະພະແນກ, ວິທະຍາກອນ ແລະ ພະນັກງານ-ລັດຖະກອນ ພາຍໃນກົມສື່ມວນຊົນເຂົ້າຮ່ວມ.

ໃນກອງປະຊຸມ ບັນດາຜູ້ເຂົ້າຮ່ວມ ໄດ້ຮຽນຮູ້ກ່ຽວກັບເຕັກນິກການຕັດຕໍ່ວິດີໂອ; ຫຼັກການຂຽນຂ່າວ-ບົດ, ການເປັນໂຄສົກຂ່າວ; ບົດຮຽນດ້ານເຕັກນິກ ແລະ ຕັດຕໍ່ສຽງລາຍການວິທະຍຸ; ຈາກນັ້ນ, ກອງປະຊຸມ ຍັງໄດ້ຈັດແບ່ງເປັນກຸ່ມ ເພື່ອຕັດຕໍ່ພາບ-ສຽງຕົວຈິງ ແລະ ແລກປ່ຽນສົນທະນາຖາມ-ຕອບຢ່າງສ້າງສັນ ແລະ ກົງໄປກົງມາ.

(ພາບ ແລະ ຂ່າວ: ນາງ ກຸກກິກ ບຸດດາໄຊ)