(ສພຊ) – ໃນວາລະດຳເນີນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ເມື່ອວັນທີ 20 ພະຈິກຜ່ານມາ, ທ່ານ ເພັງນິລັນ ຄໍາພັນເພັງ ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 7 ແຂວງໄຊຍະບູລີ ໄດ້ປະກອບຄໍາຄິດຄໍາເຫັນ ໂດຍລົງເລິກຂົງເຂດວຽກງານການເງິນ ແລະ ມາດຕະການຈັດຕັ້ງປະຕິບັດໂຄງການຈໍານວນໜຶ່ງ ດັ່ງນີ້:

1. ສະເໜີລັດຖະບານສືບຕໍ່ຈັດຕັ້ງການແບ່ງຂັ້ນຄຸ້ມຄອງລາຍຮັບຂອງສູນກາງ ແລະ ທ້ອງຖິ່ນ ເປັນຕົ້ນຢູ່ດ່ານ, ໃຫ້ທ້ອງຖິ່ນໄດ້ສືບຕໍ່ຄຸ້ມຄອງການພັດທະນາດ້ານນີ້ຕື່ມ, ເນື່ອງຈາກວ່າທີ່ຜ່ານມາກໍໄດ້ບິແບ່ງແລ້ວ ກ່ອນໜ້ານີ້ 10 ປີ ແບ່ງ 10% ໃຫ້ແຕ່ລະແຂວງທີ່ມີດ່ານສາກົນ ເພື່ອນໍາໃຊ້ເງິນດັ່ງກ່າວເຂົ້າໃນການຄຸ້ມຄອງບໍລິຫານດ່ານ ແລະ ພັດທະນາໂຄງລ່າງດ້ານຕ່າງໆເປັນຕົ້ນ: ເສັ້ນທາງ, ອາຄານສະຖານທີ່ຢູ່ພາຍໃນດ່ານນັ້ນໆ ເພື່ອໃຫ້ດ່ານໄດ້ຮັບການບໍລິການນັບມື້ນັບດີຂຶ້ນ ເຊິ່ງເປັນໃບໜ້າຂອງປະເທດຊາດ; ຜ່ານມາກໍໄດ້ຈັດແບ່ງຈໍານວນໜຶ່ງໃຫ້ແຕ່ລະດ່ານ ກໍຖືວ່າບໍລິຫານດ່ານຈໍາກັດ, ດ່ານໜຶ່ງປະມານ 2-3 ຮ້ອຍລ້ານ ໃຊ້ໜີ້ເກົ່າກໍບໍ່ພໍ, ບໍ່ທັນເວົ້າເຖິງວ່າຈະພັດທະນາໂຄງລ່າງດ້ານອື່ນໆ.

2. ຕໍ່ກັບການຄຸ້ມຄອງ ແລະ ການຈັດຕັ້ງປະຕິບັດໂຄງການ ໂດຍສະເພາະແມ່ນເສັ້ນທາງ ແລະ ກັນເຈື່ອນຢູ່ຕາມບໍລິເວນຊາຍແດນນັ້ນ, ສະເໜີລັດຖະບານ ກໍຄືຂັ້ນເທິງ ຈັດຕັ້ງຄະນະກຳມະການລະດັບຊາດ ລົງໄປຕິດຕາມກວດກາເບິ່ງຕື່ມວ່າ ປັດຈຸບັນໄດ້ເຊາະເຈື່ອນໃນລະດັບໃດ? ຈາກນັ້ນມາສືບຕໍ່ວາງແຜນຮ່ວມກັນວ່າອັນໃດຈະເຮັດກ່ອນອັນໃດຈະເຮັດນຳຫຼັງ ແລ້ວແບ່ງຄວາມຮັບຜິດຊອບກັນລະຫວ່າງກະຊວງໂຍທາທິການ ແລະ ຂົນສົ່ງ ກັບກະຊວງປ້ອງກັນປະເທດ; ໃນໄລຍະຜ່ານມາ ມີພຽງແຕ່ທ້ອງຖິ່ນ ຫຼື ສະມາຊິກສະພາແຫ່ງຊາດປະຈຳເຂດເລືອກຕັ້ງ ສະເໜີ, ຄິດວ່າມີຄວາມຫຍຸ້ງຍາກ ຈຶ່ງຢາກໃຫ້ເບິ່ງຕົວຈິງຕື່ມ.

3. ເພື່ອຄຸ້ມຄອງລະບົບເສັ້ນທາງໃຫ້ໄດ້ຮັບຜົນດີ, ຜ່ານມາລັດຖະບານກໍໄດ້ມີຄວາມພະຍາຍາມຫຼາຍ ແລະ ມີຫຼາຍມາດຕະການ. ນອກຈາກການກໍ່ສ້າງ, ສ້ອມແປງ ຢາກສະເໜີໃນບາງຊ່ວງເສັ້ນທາງ ຕາມທີ່ໄດ້ຕິດຕາມກວດກາ ລະຫວ່າງວຽງຈັນຫາໄຊຍະບູລີ ອອກຫາຫຼວງພະບາງ ເປັນເສັ້ນທາງທີ່ຍາວ, ແຕ່ຍັງບໍ່ທັນມີຈຸດຊັ່ງນໍ້າໜັກ ເຮັດໃຫ້ການຄຸ້ມຄອງເສັ້ນທາງບາງຊ່ວງພົບຄວາມຫຍຸ້ງຍາກ; ຖ້າວ່າບໍ່ມີຈຸດຊັ່ງນໍ້າໜັກຖາວອນ ກໍຂໍໃຫ້ມີຈຸດຊົ່ວຄາວ, ຈຸດເຄື່ອນທີ່ ແລະ ໃຫ້ມີການຜັດປ່ຽນກັນໃນແຕ່ລະໄລຍະ, ດ້ານຫຼັກການ 100-200 ກິໂລແມັດ ກໍອາດຈະມີຈຸດໜຶ່ງ.

4. ສະເໜີໃຫ້ສູນກາງ ຫຼື ລັດຖະບານ ພິຈາລະນາງົບປະມານຈັດລຽງຄືນ ເພື່ອສືບຕໍ່ຟື້ນຟູເສັ້ນທາງຈາກຊາຍແດນ ໂດຍສະເພາະແມ່ນດ່ານສາກົນຂົວມິດຕະພາບນໍ້າເຫືອງ ລາວ-ໄທ ເຂົ້າສູ່ເມືອງມໍລະດົກໂລກ ແລະ ເສັ້ນທາງທີ່ເຊື່ອມລະຫວ່າງໄຊຍະບູລີ ຫາ ຫົງສາ ແລະ ບັນດາແຂວງພາກເໜືອ, ຜ່ານມາເຄີຍສະເໜີແລ້ວ ແຕ່ບໍ່ຮູ້ວ່າປັດຈຸບັນນີ້ມີຄວາມຄືບໜ້າສໍ່າໃດ.

5. ກ່ຽວກັບງົບປະມານເກີນແຜນ ຖ້າເປັນໄປໄດ້ຢາກໃຫ້ລັດຖະບານແບ່ງໄປພັດທະນາເສັ້ນທາງລະຫວ່າງທາງໃຫຍ່ຫາດ່ານສາກົນ ໂດຍສະເພາະແມ່ນຢູ່ເມືອງແກ່ນທ້າວ ນັບແຕ່ການເປີດຂົວມິດຕະພາບນໍ້າເຫືອງ ລາວ-ໄທ ມາຮອດປັດຈຸບັນນີ້ ເສັ້ນທາງດັ່ງກ່າວກໍຍັງບໍ່ທັນໄດ້ຮັບການຟື້ນຟູ; ຜຸ້ແທນລົງໄປເຄື່ອນໄຫວແຕ່ລະເທື່ອ ກໍມີປະຊາຊົນສະເໜີ, ເມືອງກໍສະເໜີ ບໍ່ໄດ້ຮັບການພິຈາລະນາ, ຂໍໃຫ້ລັດຖະບານສືບຕໍ່ພິຈາລະນາຕື່ມ.

6. ດັດແກ້ 2 ໂຄງການທີ່ໄດ້ສະເໜີ ເສັ້ນທາງອອກສູ່ຊາຍແດນລະຫວ່າງທົ່ງຕາບຫ້ວຍຕອງ ກັບເສັ້ນທາງເມືອງບໍ່ແຕນຫາຫ້ວຍແຕ ເປັນເສັ້ນທາງອອກສູ່ຊາຍແດນລະຫວ່າງຊາດ ເພື່ອໃຫ້ໄດ້ຮັບປະກັນໃນການຈັດຕັ້ງປະຕິບັດ ແລະ ມີຄວາມຄືບໜ້າຂຶ້ນ.