ຕອນເຊົ້າຂອງວັນທີ 15 ກໍລະກົດ 2022 ນີ້, ຢູ່ສະໂມສອນຂອງແຂວງ ພິທີໂຮມຊຸມນຸມສະເຫຼີມສະຫຼອງວັນສ້າງຕັ້ງແຂວງອຸດົມໄຊ ຄົບຮອບ 60 ປີ ແລະ ວັນສ້າງຕັ້ງກຳລັງປ້ອງກັນຄວາມສະຫງົບແຂວງຄົບຮອບ 60 ປີ, ໄດ້ຈັດຂຶ້ນຢ່າງເປັນທາງການ ໂດຍເປັນກຽດເຂົ້າຮ່ວມຂອງທ່ານ ບຸນທອງ ຈິດມະນີ ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປລາວ, ທ່ານ ບຸນຄົງ ຫລ້າຈຽມພອນ ກຳມະການສຳຮອງສູນກາງພັກ, ເລຂາພັກແຂວງ, ເຈົ້າແຂວງອຸດົມໄຊ, ມີບັນດາທ່ານອະດິດເລຂາພັກແຂວງ, ເຈົ້າແຂວງອຸດົມໄຊ, ບັນດາການນຳ, ອາດີດການນໍາແຂວງ, ການນໍາແຂວງໃກ້ຄຽງ, ຄະນະປະຈໍາສະພາປະຊາຊົນແຂວງ, ອາດີດ ສສຊ-ສສຂ, ບັນດາຫົວໜ້າພະແນກການ, ສອງກອງບັນຊາການ ປກຊ-ປກສ, ບັນດາຂະ ແໜງການ, ລັດວິສາຫະກິດ, ນັກທຸລະກິດ, ພະນັກຫຼງານຫຼັກແຫຼ່ງ, ຊາວໜຸ່ມເຍົາວະຊົນ ແລະ ຕະຫຼອດຮອດອົງການປົກຄອງບ້ານໃນເທດສະບານເຂົ້າຮ່ວມຢ່າງພ້ອມພຽງ.

ພິທີທ່ານ ບຸນຄົງ ຫລ້າຈຽມພອນ ກຳມະການສຳຮອງສູນກາງພັກ, ເລຂາພັກແຂວງ, ເຈົ້າແຂວງອຸດົມໄຊ ຂື້ນກ່າວປາໃສຕໍ່ງານໂຮມຊຸມນຸມວ່າ: ແຂວງອຸດົມໄຊ ໃນເມື່ອກ່ອນເປັນກິ່ງແຂວງໄຊຍະພູມ ຂຶ້ນກັບແຂວງຫຼວງພະບາງຊຶ່ງປະກອບມີ 3 ເມືອງຄື: ເມືອງໄຊ, ເມືອງຮຸນ ແລະ ເມືອງປາກທາ ຊຶ່ງມີສໍານັກງານຕັ້ງຢູ່ເມືອງໄຊ. ເປັນດິນແດນທີ່ມີມູນເຊື້ອປະຕິວັດອັນອົງອາດກ້າຫານ, ເດັດດ່ຽວຫນຽວແຫນ້ນ, ມີຂະບວນການປະຕິວັດຕໍ່ສູ້ປົດປ່ອຍຊາດພາຍໃຕ້ການນໍາພາຂອງພັກກອມມູນິດອິນດູຈີນມາແຕ່ກ່ອນຊຸມປີ 1945, ຕໍ່ມາກໍໄດ້ກາຍເປັນເຂດທີ່ຫມັ້ນອັນແຂງແກ່ນຂອງການປະຕິວັດລາວ, ພາຍຫຼັງເມືອງໄຊໄດ້ຮັບການປົດປ່ອຍໃນນທີ 15 ເມສາ ປີ 1961, ສູນກາງພັກໄດ້ຕົກລົງເອົາກິ່ງແຂວງໄຊຍະພູມສ້າງຕັ້ງເປັນແຂວງຢ່າງເປັນທາງການໃນວັນທີ 15 ກໍລະກົດ ປີ 1962 ຊຶ່ງເອີ້ນວ່າ: “ແຂວງລ້ານຊ້າງ” ຮອດປີ 1965 ແຂວງລ້ານຊ້າງ ໄດ້ປ່ຽນຊື່ມາເປັນ “ ແຂວງເມືອງໄຊ ” ແລະ ມາຮອດປີ 1967 ແຂວງເມືອງໄຊໄດ້ປ່ຽນຊື່ມາເປັນ “ ແຂວງອຸດົມໄຊ ” ຈົນເຖິງປັດຈຸບັນ.

ໄປຄຽງຄູ່ກັບການຫວນຄືນມູນເຊື້ອວັນສ້າງຕັ້ງແຂວງອຸດົມໄຊແລ້ວ ພວກເຮົາຍັງລະນຶກເຖິງມູນເຊື້ອວັນສ້າງຕັ້ງກໍາລັງປ້ອງກັນຄວາມສະຫງົບແຂວງຄົບຮອບ 60 ປີ. ໃນວັນທີ 4 ເມສາ ປີ 1962 ຢູ່ທີ່ສໍານັກງານປິດລັບເຂດບ້ານຈັນວາງ, ຕາແສງນໍ້າພູນ, ເມືອງຮຸນ, ຄະນະພັກແຂວງ ໄດ້ຕົກລົງຈັດຕັ້ງກໍາລັງປ້ອງກັນຂຶ້ນທໍາອິດເອີ້ນວ່າ: “ໜ່ວຍປ້ອງກັນສໍານັກ” ຈາກນັ້ນຜ່ານຂະບວນການໃນແຕ່ລະໄລຍະກໍໄດ້ປ່ຽນຊື່ຂອງກໍາລັງຫຼາຍຄັ້ງເພື່ອໃຫ້ສອດຄ່ອງກັບສະພາບຕົວຈິງ. ຈົນມາຮອດປີ 1986 ກະຊວງປ້ອງກັນຄວາມສະຫງົບໄດ້ປ່ຽນຊື່ມາເປັນ “ກອງບັນຊາການປ້ອງກັນຄວາມສະຫງົບ” ຈົນເຖິງປັດຈຸບັນ ແລະ ມາຮອດວັນທີ 15 ພຶດສະພາ 2016 ກະຊວງປ້ອງກັນຄວາມສະຫງົບໄດ້ຕົກລົງຮັບຮອງເອົາວັນທີ 4 ເມສາ 1962 ເປັນວັນສ້າງຕັ້ງກໍາລັງປ້ອງກັນຄວາມສະຫງົບແຂວງ ອຸດົມໄຊ ຢ່າງເປັນທາງການ.

ການສະເຫຼີມສະຫຼອງວັນສ້າງຕັ້ງແຂວງອຸດົມໄຊ ຄົບຮອບ 60 ປີນີ້ ກໍ່ພໍດີກົງກັບປີແຫ່ງຄວາມສາມັກຄີ, ມິດຕະພາບລາວ – ຫວຽດນາມ, ຫວຽດນາມ – ລາວ ນັ້ນກໍ່ຄືວັນ ວັນເຊັນສົນທິສັນຍາມິດຕະພາບ ແລະ ການຮ່ວມມືຄົບຮອບ 45 ປີ ແລະ ວັນສ້າງຕັ້ງສາຍພົວພັນທາງການທູດ ຄົບຮອບ 60 ປີ. ຊຶ່ງຕະຫຼອດໄລຍະຜ່ານມາ ແຂວງ ອຸດົມໄຊ ໄດ້ມີການພົວພັນມິດຕະພາບ ແລະ ການຮ່ວມມືຮອບດ້ານກັບ 8 ແຂວງ, 1 ນະຄອນ ແລະ 1 ກອງບັນຊາການທະຫານເຂດ II ຂອງ ສສ.ຫວຽດນາມ.

ໃນພິທີທີ່ມີຄວາມຫມາຍຄວາມສໍາຄັນໃນຄັ້ງນີ້ຍັງໄດ້ຈັດພິທີປະດັບຫລຽນໄຊອິດສະຫລະຊັ້ນ 3 ຂອງປະທານປະເທດ ເເລະ ໃບຢັ້ງຢືນໃຫ້ເເຂວງອຸດົມໄຊ, ເພື່ອເປັນສີ່ງຢັ້ງຢືນເຖີງຜົນງານຂອງເເຂວງທີ່ໄດ້ປະກອບສ່ວນສໍາຄັນເຂົ້າໃນພາລະກິດຕໍ່ສູ້ກູ້ຊາດໃນເມື່ອກ່ອນ ກໍ່ຄືພາລະກິດປົກປັກຮັກ ເເລະ ສ້າງສາພັດທະນາປະເທດຊາດໃນປັດຈຸບັນ ເປັນກຽດປະດັບຫລຽນໄຊອິດສະຫລະຊັ້ນ 3 ໂດຍ ທ່ານ ບຸນທອງ ຈິດມະນີ ກໍາມະການກົມເມືອງສູນກາງພັກ, ຮອງປະທານປະເທດ ເເລະ ຕາງຫນ້າຄະນະພັກຄະນະນໍາຂອງເເຂວງຂື້ນຮັບຫລຽນໄຊອິດສະຫລະຊັ້ນ 3ໃນຄັ້ງນີ້ໂດຍທ່ານ ບຸນຄົງ ຫລ້າຈຽມພອນ ກໍາມະການສໍາຮອງສູນກາງພັກ ເລຂາຄະນະບໍລິຫານງານພັກເເຂວງ ເຈົ້າເເຂວງອຸດົມໄຊ ແລະ ໃນພິທີຍັງໄດ້ມອບຂອງທີ່ລະນຶກໃຫ້ແກ່ຄອບຄົວອາດີດເຈົ້າແຂວງອຸດົມໄຊແຕ່ລະສະໄໝຕື່ມອີກ.  ພາບ/ຂ່າວ: ແສງພອນ ອິິນນະລົງ