ໃນວັນທີ 2 ມີນາ 2022 ນີ້. ທີ່ຫ້ອງປະຊຸມສະພາປະຊາຊົນແຂວງ (ສພຂ) ອັດຕະປື. ສະຫາຍ ນາງ ມີນາພອນ ໄຊສົມພູ ຮອງເລຂາພັກແຂວງ ປະທານ ສພຂ. ໄດ້ເຂົ້າຮ່ວມ ແລະ ມີຄຳເຫັນໂອ້ລົມຕໍ່ກອງປະຊຸມສະຫຼຸບວຽກງານ ກວດກາທົ່ວແຂວງ 5 ປີ (2016-2020), ປະຈໍາປີ 2021 ແລະ ວາງທິດທາງແຜນການ ປີ 2022 ເຊິ່ງທ່ານໄດ້ກ່າວວ່າ:
ໃນໄລຍະທີ່ຜ່ານມາ ຄະນະພັກ, ອໍານາດການປົກຄອງ ແລະ ຄະນະກວດກາແຕ່ລະຂັ້ນ ໄດ້ເອົາໃຈໃສ່ຢ່າງຕັ້ງໜ້າຫຼາຍກວ່າເກົ່າ ແລະ ເຫັນໄດ້ຜົນສຳເລັດຫລາຍໆດ້ານ,ເພື່ອເປັນທິດທາງ ແລະ ສືບຕໍ່ປະຕິບັດວຽກງານໃນຕໍ່ໜ້າຄວນເອົາໃຈໃສ່ຢູ່ຫລາຍບັນຫາເປັນຕົ້ນ: ພ້ອມກັນສືບຕໍ່ຄົ້ນຄວ້າ, ເຊື່ອມຊຶມ, ກໍາແໜ້ນ ແລະ ຈັດຕັ້ງປະຕິ ບັດເນື້ອໃນມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ XI ຂອງແຂວງ ບັນດາມະຕິ-ຄໍາສັ່ງ, ຂໍ້ກໍານົດຕ່າງໆຂອງພັກ, ກົດໝາຍ, ດໍາລັດ ແລະ ລະບຽບການຂອງລັດ ເວົ້າລວມ, ໂດຍສະເພາະແມ່ນ ມະຕິ – ຄໍາສັ່ງ ແລະ ນິຕິກໍາຕ່າງໆ ກ່ຽວກັບວຽກງານຕິດຕາມ – ກວດກາ, ສະກັດກັ້ນ ແລະ ຕ້ານການສໍ້ລາດບັງຫຼວງ, ຕິດຕາມ-ກວດກາ ການປະຕິບັດກົດລະບຽບຂອງພັກ, ກວດກາການປະຕິບັດບັນດາຄໍາສັ່ງ ແລະ ຂໍ້ກໍານົດຕ່າງໆທີ່ກ່ຽວກັບວຽກງານປັບປຸງກໍ່ສ້າງພັກ, ການປັບປຸງແບບແຜນນໍາພາ ແລະ ວິທີເຮັດວຽກຂອງຄະນະພັກແຕ່ລະຂັ້ນ; ຕິດຕາມ-ກວດກາຄຸນທາດການເມືອງ, ຄຸນສົມບັດສິນທໍາປະຕິວັດຂອງສະມາຊິກພັກ, ຕິດຕາມແບບແຜນການດຳລົງຊີວິດຂອງສະມາຊິກພັກ-ພະນັກງານ, ກໍາສະພາບພະນັກງານການນໍາ ແລະ ສະມາຊິກພັກໃຫ້ແໜ້ນ, ເອົາໃຈໃສ່ດໍາເນີນຊີວິດການເມືອງພາຍໃນພັກ, ການລົງເລິກ ແລະ ແກ້ໄຂສະພາບຫຍໍ້ທໍ້ຕ່າງໆ ໃນຄະນະພັກ ແລະ ສະມາຊິກພັກ; ຕິດຕາມ-ກວດກາການຄຸ້ມຄອງລາຍຈ່າຍ ຂອງພະແນກການ-ອົງການ ແລະ ເມືອງ ລວມທັງການຊ່ວຍເຫຼືອບັນເທົາທຸກໃຫ້ປະຊາຊົນທີ່ປະສົບໄພພິບັດຕ່າງໆ, ກອງທຶນພັດທະນາຊົນນະບົດ ແລະ ລົບລ້າງຄວາມທຸກຍາກ ຂອງປະຊາຊົນ ບໍ່ໃຫ້ມີສະພາບຮົ່ວໄຫຼ ຫຼື ຈ່າຍເກີນແຜນ, ຈ່າຍບໍ່ຖືກເປົ້າໝາຍ ແລະ ບໍ່ແທດຕົວຈິງ, ຮັບປະກັນປະຕິບັດນະໂຍບາຍປະຢັດແຫ່ງຊາດ; ສືບຕໍ່ປະຕິບັດມາດຕະການກວດກາເລີ່ມແຕ່ຫົວທີ ຕໍ່ການປະຕິບັດໂຄງການລົງທຶນຂອງລັດເຊັ່ນ: ໂຄງ ການກໍ່ສ້າງພື້ນຖານໂຄງລ່າງ ປີ 2022 ເລີ່ມແຕ່ການປະມູນ, ການຈັດຊື້-ຈັດຈ້າງ ແລະ ຕະຫຼອດໄລຍະເວລາຂອງການປະຕິບັດໂຄງການ ໃຫ້ດໍາເນີນໄປຖືກຕ້ອງຕາມສັນຍາ ແລະ ລະບຽບກົດໝາຍ; ຕິດຕາມ, ກວດກາການຄຸ້ມຄອງ-ນຳໃຊ້ຊັບພະຍາກອນທຳມະຊາດ ແລະ ທ່າແຮງບົ່ມຊ້ອນຂອງ ແຂວງເຊັ່ນ: ທີ່ດິນ, ປ່າໄມ້, ແຮ່ທາດ, ການບໍລິການ ແລະ ການຈັດຕັ້ງປະຕິບັດ 4 ວາລະໃຫຍ່ຂອງແຂວງຂອງບັນດາພະແນກການກ່ຽວຂ້ອງໃນທົ່ວແຂວງ; ຕິດຕາມ-ກວດກາການສໍາຫຼວດ-ຂຸດຄົ້ນແຮ່ທາດ, ຄຸ້ມຄອງສະພາບແວດລ້ອມ, ການຄຸ້ມຄອງນໍາໃຊ້ທີ່ດິນ, ການໃຫ້ເຊົ່າ ແລະ ການໃຫ້ສໍາປະທານ, ການປະຕິບັດນະໂຍບາຍນໍາໃຊ້ທີ່ດິນຂອງລັດ, ການເກັບພາສີທີ່ດິນ; ການຄຸ້ມຄອງຊື້-ຂາຍ, ໃຫ້ເຊົ່າຊັບສິນຕ່າງໆຂອງລັດ; ເພີ່ມທະວີການນໍາຂອງຄະນະພັກ ແລະ ການນໍາແຕ່ລະຂັ້ນ ຕໍ່ວຽກງານຕິດຕາມ-ກວດກາ, ວຽກງານສະກັດກັ້ນ ແລະ ຕ້ານການສໍ້ລາດບັງຫຼວງ ດ້ວຍຫຼາຍວິທີ ໂດຍຖືເອົາການຕິດຕາມ-ກວດກາ ເປັນປົກກະຕິເລີ່ມແຕ່ຫົວທີ ເປັນວິທີການຕົ້ນຕໍ; ສິ່ງສໍາຄັນ ບັນຫາເກີດຂື້ນຢູ່ບ່ອນໃດ ແມ່ນຄະນະພັກ ແລະ ການນໍາຢູ່ບ່ອນນັ້ນ ຕ້ອງເປັນຜູ້ຮັບຜິດຊອບ, ເມື່ອກວດກາແລ້ວ ຕ້ອງແກ້ໄຂຜົນຂອງການກວດກາຢ່າງຂາດຕົວ ແລະ ທັນເວລາ ຊຶ່ງອັນນີ້ ແມ່ນຄວາມຮັບຜິດຊອບໂດຍກົງ ຂອງຄະນະພັກ ແລະ ອົງການຈັດຕັ້ງຂັ້ນນັ້ນ, ສືບຕໍ່ກວດກາຕາມຜົນການກວດກາສອບທີ່ອົງການກວດສອບສະເໜີ ແລະ ຕາມການຮັບຮອງຂອງສະພາແຫ່ງຊາດ,ສະພາປະຊາຊົນຂັ້ນແຂວງ.
(ພາບ-ຂ່າວ:ວິນັດ ສພຂ)