(ສພຊ) ວັນທີ 18 ພະຈິກ ຜ່ານມາ, ທີ່ສະພາແຫ່ງຊາດ ສະຫາຍ ນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ, ປະທານສະພາແຫ່ງຊາດ (ສພຊ) ໄດ້ຕ້ອນຮັບການເຂົ້າຢ້ຽມພົບປະຂອງ ຄະນະຜູ້ແທນຂັ້ນ ສູງສະພາທີ່ປຶກສາການເມືອງທົ່ວປະເທດຈີນ ນຳໂດຍສະຫາຍ ຫວາງ ຢາງ ກຳມະການປະຈຳກົມການເມືອງສູນກາງພັກກອມມູນິດຈີນ, ປະທານສະພາທີ່ປຶກສາການເມືອງທົ່ວປະເທດຈີນ ພ້ອມດ້ວຍຄະນະ ໃນໂອກາດທີ່ມາຢ້ຽມ ຢາມ ແລະ ເຮັດວຽກຢູ່ ສປປລາວ ຢ່າງເປັນທາງການ ລະຫວ່າງວັນທີ 16-19 ພະຈິກ 2019.

ການພົບປະຄັ້ງນີ້, ທັງສອງຝ່າຍໄດ້ລາຍງານສະພາບການຈັດຕັ້ງປະຕິບັດວຽກງານ ແລະ ການເຄື່ອນໄຫວ ໃຫ້ກັນ ແລະ ກັນຊາບ ພິເສດແມ່ນຊົມເຊີຍຕໍ່ຜົນສຳເລັດການສະເຫລີມສະຫລອງ 70 ປີ ແຫ່ງການສ້າງຕັ້ງ ສປຈີນ, ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດລາວ ຊຸດທີ VIII ທີ່ພວມດຳເນີນຢູ່ ແລະ ການຮ່ວມມືຊ່ວຍເຫລືອຕ່າງໆ ທີ່ໄດ້ສ້າງເງື່ອນໄຂອຳນວຍຄວາມສະດວກໃຫ້ແກ່ການຄ້າ, ການລົງທຶນ ລະຫວ່າງສອງປະເທດໃນໄລຍະໃໝ່ ທີ່ມີການຂະຫຍາຍຕົວຢ່າງໄວວາ ໃນນັ້ນ, ລວມທັງອຳນວຍຄວາມສະດວກໃຫ້ແກ່ການຄ້າຊາຍແດນ, ການເປີດດ່ານສາກົນລະຫວ່າງ ລາວ-ຈີນ, ຈີນ-ລາວ ໃນຫລາຍຈຸດ, ການໃຫ້ໂກຕາຮັບຊື້ສິນຄ້າກະສິກຳຈາກ ສປປລາວ ໄປ ສປຈີນ ແລະ ອື່ນໆ ເຊິ່ງເປັນສ່ວນຊ່ວຍໃຫ້ແກ່ການພັດທະນາເສດຖະກິດຂອງ ສປປລາວ; ພ້ອມນັ້ນ, ສະຫາຍ ຫວາງ ຢາງ ຍັງໄດ້ລາຍງານການມາເຄື່ອນໄຫວ ແລະ ເຮັດວຽກໃນຄັ້ງນີ້ຕື່ມອີກ.

ໂອກາດດັ່ງກ່າວ, ສະຫາຍ ນາງ ປານີ ຢາທໍ່ຕູ້ ໄດ້ຕີລາຄາສູງຕໍ່ການມາຢ້ຽມຢາມ ແລະ ເຮັດວຽກຂອງຄະນະຜູ້ແທນໃນຄັ້ງນີ້ ເຊິ່ງເປັນສ່ວນສຳຄັນໃນການເສີມຂະຫຍາຍມູນເຊື້ອການພົວພັນຮ່ວມມືອັນດີງາມທີ່ມີມາແຕ່ດົນນານ ບົນຈິດໃຈຄູ່ຮ່ວມຍຸດທະສາດຮອບດ້ານຕາມ 4 ທິດ ລະຫວ່າງ ສປປລາວ ແລະ ສປຈີນ ກໍຄືການຈັດຕັ້ງຜັນຂະຫຍາຍແຜນແມ່ບົດວ່າດ້ວຍການສ້າງຄູ່ຮ່ວມຊະຕາກຳລາວ-ຈີນ ທີ່ສອງເລຂາທິການໃຫຍ່ຂອງສອງພັກ ໄດ້ລົງນາມຮ່ວມກັນ ໃນເດືອນເມສາຜ່ານມາ; ພ້ອມທັງຢືນຢັນຄືນເຖິງທັດສະນະສະເໝີຕົ້ນສະເໝີປາຍໃນການເສີມຂະຫຍາຍມິດຕະພາບອັນເປັນມູນເຊື້ອລາວ-ຈີນ ຮ່ວມມືແບບຄູ່ຮ່ວມມືຍຸດທະສາດຮອບດ້ານຕາມທິດ 4 ດີ ທີ່ພວມນຳເອົາຜົນປະໂຫຍດມາໃຫ້ແກ່ປະຊາຊົນທັງສອງປະເທດ ແລະ ສະແດງຄວາມເປັນເອກະພາບຕໍ່ການຮ່ວມມືໃນຂະແໜງການຕ່າງໆ ເພື່ອພ້ອມກັນຈັດຕັ້ງປະຕິບັດເນື້ອໃນຈິດໃຈແຫ່ງການເປັນຄູ່ຮ່ວມຊະຕາກຳ ລາວ-ຈີນ ໃຫ້ເປັນຮູບປະທຳ; ພ້ອມທັງແຈ້ງໃຫ້ຊາບວ່າ ໃນທ້າຍເດືອນ 12 ທີ່ຈະມາເຖິງນີ້ ສະຫາຍ ພ້ອມດ້ວຍຄະນະ ຈະເດີນທາງໄປຢ້ຽມຢາມ ແລະ ເຮັດວຽກຢູ່ ສປຈີນ ຕາມການເຊື້ອເຊີນຂອງສະຫາຍ ລີ່ ຈ້ານ ຊູ ຄະນະກຳມະການກົມການເມືອງສູນກາງພັກກອມມູນິດຈີນ, ປະທານສະພາຜູ້ແທນທົ່ວປະເທດຈີນ.

(ນາງ ອາລິນ ສຸພິມມະປະດິດ)