ຂ່າວ: ສະຫະພັນແມ່ຍິງຮາກຖານສະພາປະຊາຊົນແຂວງຜົ້ງສາລີເລົ່າຄືນມູນເຊື້ອວັນສ້າງຕັ້ງແມ່ຍິງລາວ.
ຕອນບ່າຍວັນທີ 19 ກໍລະກົດ 2022 ທີ່ຫ້ອງປະຊຸມສະພາປະຊາຊົນແຂວງ ຈັດພິທິປາຖະກະຖາ ວັນສ້າງຕັ້ງແມ່ຍິງລາວ ຄົບຮອບ 67 ປີ (20 ກໍລະກົດ 1955-20 ກໍລະກົດ 2022) ໂດຍການເປັນປະທານຂອງສະຫາຍ ນາງ ບົວວອນ ຈັນທະລັງ ປະທານສະຫະພັນແມ່ຍິງຮາກຖານ ສພຂ, ເປັນກຽດເຂົ້າໂດຍ ສະຫາຍ ພັທ ຄໍາດາ ໂສລະພົມ ຮອງເລຂາໜ່ວຍພັກ ສພຂ, ຜູ້ຊີ້ນໍາອົງການຈັດຕັ້ງມະຫາຊົນ; ມີບັນດາສະມາຊິກສະຫະພັນແມ່ຍິງຮາກຖານ ສພຂ ເຂົ້າຮ່ວມ.
ໃນພິທີຮັບຟັງສະຫາຍ ນາງ ບົວວອນ ຈັນທະລັງ ເລົ່າຄືນມູນເຊື້ອການກຳເນີດ, ເຕີບໃຫຍ່ຂະຫຍາຍຕົວ ແລະ ຜົນງານການເຄື່ອນໄຫວຂອງອົງການຈັດຕັ້ງສະພັນແມ່ຍິງລາວ ແລະ ແມ່ຍິງລາວບັນດາເຜົ່າ ທີ່ໄດ້ອຸທິດຕົນເພື່ອພາລະກິດຕໍ່ສູ້ປົດປ່ອຍຊາດ ແລະ ປົກປັກຮັກສາພັດທະນາປະເທດຊາດ ກໍຄືພາລະກິດພັດທະນາແມ່ຍິງ ຕະຫຼອດໄລຍະ 67 ປີ ທີ່ຜ່ານມາ. ເຊິ່ງມີບາງຕອນສະຫາຍໄດ້ກ່າວວ່າ: “ພາຍໃຕ້ການນຳພາຂອງພັກ ແລະ ໄດ້ຮັບຜົນສະທ້ອນຈາກຂະບວນການຕໍ່ສູ້ປະຕິວັດຂອງແມ່ຍິງໃນໂລກ ທີ່ເລັ່ງທວງໃຫ້ປະຕິບັດສິດເສລີພາບ, ຄວາມສະເໜີພາບລະຫວ່າງຍິງ-ຊາຍ ທາງດ້ານການເມືອງ-ເສດຖະກິດ, ວັດທະນະທໍາ-ສັງຄົມ ເທື່ອລະກ້າວ. ອົງການຈັດຕັ້ງແມ່ຍິງຂັ້ນຮາກຖານຈຶ່ງໄດ້ເກີດຂຶ້ນ ໂດຍເລີ່ມຈາກການຈັດຕັ້ງໜ່ວຍແມ່ຍິງນັກຮົບ ຢູ່ຊົນນະບົດ, ໜ່ວຍສຸວັນນາລີ ຢູ່ຕາມຕົວເມືອງ, ການຈັດຕັ້ງດັ່ງກ່າວໄດ້ເຄື່ອນໄຫວ ແລະ ເຕິບໃຫຍ່ຂະຫຍາຍຕົວນັບມື້ນັບກວ້າງຂວາງ ແລະ ມາໃນວັນທີ 20 ກໍລະກົດ 1955 ພັກໄດ້ຈັດຕັ້ງໜ່ວຍຄົ້ນຄວ້າວຽກງານແມ່ຍິງຂຶ້ນຢ່າງເປັນທາງການ (ເຊິ່ງເປັນຕົ້ນກຳເນີດຂອງອົງການຈັດຕັ້ງສະຫະພັນແມ່ຍິງລາວໃນປະຈຸບັນ ) ແຕ່ງຕັ້ງຄະນະໜ່ວຍເຊິ່ງປະກອບມີ 03 ທ່ານຄື: ທ່ານ ນາງ ຄໍາຫຼ້າ ວົງສັກ ເປັນຫົວໜ້າ; ທ່ານ ນາງ ຄຳສຸກ ວົງວີຈິດ ເປັນຮອງ; ທ່ານ ນາງ ຄຳແພງ ບຸບຜາ ເປັນກຳມະການ; ເພື່ອສືບຕໍ່ນໍາພາອົງການຈັດຕັ້ງແມ່ຍິງ ແລະ ຂົນຂວາຍ ຂະບວນການແມ່ຍິງທົ່ວປະເທດ”.
ໃນໂອກາດດຽວກັນນີ້ ສະຫາຍ ພັທ ຄໍາດາ ໂສລະພົມ ຍັງໄດ້ໃຫ້ກຽດໂອລົມຕໍ່ສະຫະພັນແມ່ຍິງຮາກຖານ ສພຂ ເຊິ່ງກ່ອນອື່ນສະຫາຍກໍໄດ້ກ່າວສະແດງຄວາມຮູ້ບຸນຕໍ່ສະຫະພັນແມ່ຍິງລາວໃນອະດິດ ທີ່ໄດ້ອຸທິດຕົນເພື່ອພາລະກິດຕໍ່ສູ້ປົດປ່ອຍຊາດ ແລະ ປົກປັກຮັກສາພັດທະນາປະເທດຊາດ ຄຽງບ້າຄຽງໄຫຼ່ຮ່ວມກັບເພດຊາຍໂດຍຕະຫຼອດມາ. ພ້ອມກັນນັ້ນ, ສະຫາຍຍັງໄດ້ຮຽກຮ້ອງໃຫ້ສະຫະພັນແມ່ຍິງຮາກຖານ ສພຂ ສືບຕໍ່ພາລະກິດດັ່ງກ່າວ ແລະ ເອົາໃຈໃສ່ຄົ້ນຄວ້າຮໍ່າຮຽນເອົາບົດຮຽນອັນດີງານຂອງແມ່ຍິງລາວ ໂດຍສະເພາະ ຄວາມດຸໝັັ່ນຂະຫຍັນພຽນໃນການອອກແຮງງານ, ນໍ້າໃຈເສຍສະຫຼະ, ຄວາມເອື້ອເຟືື້ອເພື່ອແຜ່, ຄວາມຮັກແພງຊ່ວຍເຫຼືອເຊິ່ງກັນ ແລະ ກັນ, ຄວາມສາມັກຄີເປັນຈິດໜຶ່ງໃຈດຽວກັນ, ກິລິຍາມາລະຍາດ, ການຮັກສາມູນມໍລະດົກ ແລະ ອະນຸລັກຮັກສາວັດທະນະທໍາອັນດີງາມ ຂອງຊາດ ເປັນຕົ້ນແມ່ນການນຸ່ງຖື, ການແຕ່ງກາຍ, ການພົວພັນໃນຄອບຄົວ-ສັງຄົມ ແລະ ອື່ນໆ.
ພາບ-ຂ່າວ: ນາງ ສຸກສົມພອນ ແກ້ວແສງພະຈັນ