ໃນຕອນເຊົ້າວັນທີ 18 ພຶດສະພາ 2022 ສະຫະພັນແມ່ຍິງແຂວງສະຫວັນນະເຂດ ໄດ້ລົງເຄື່ອນໄຫວເຜີຍແຜ່ເອກະສານ ຢູ່ຫ້ອງປະຊຸມສະພາປະຊາຊົນແຂວງໆສະຫວັນນະເຂດ ໃຫ້ກຽດເຜີຍແຜ່ເອກະສານໂດຍ ສະຫາຍນາງ ແກ້ວພອນ ເກດຕະວົງ ຮອງປະທານສະຫະພັນແມ່ຍິງແຂວງ, ເຂົ້າຮ່ວມຮັບຟັງໃນຄັ້ງນີ້ມີ ສະຫາຍນາງ ພູທອນ ແກ້ວພູວົງ ຮອງປະທານຄະນະປະຈຳສະພາປະຊາຊົນແຂວງ ຮອງປະທານສະພາປະຊາຊົນແຂວງ ທັງເປັນຜູ້ຊີ້ນໍາວຽກງານອົງການຈັດມະຫາຊົນ,ມີບັນດາສະຫາຍປະທານ-ຮອງປະທານສະຫະພັນແມ່ຍິງຮາກຖານສະພາປະຊາຊົນແຂວງ ພ້ອມດ້ວຍສະມາຊິກສະຫະພັນແມ່ຍິງຮາກຖານສະພາປະຊາຊົນແຂວງເຂົ້າຮ່ວມຢ່າງພ້ອມພຽງ.

ໃນພິທີ ສະຫາຍນາງ ແກ້ວພອນ ເກດຕະວົງ ຮອງປະທານສະຫະພັນແມ່ຍິງແຂວງ ໄດ້ນຳເອົາເນື້ອໃນ 04 ເອກະສານມາເຜີຍແຜ່ ຄື: ມະຕິກອງປະຊຸມວິສາມັນຄົບຄະນະບໍລິຫານງານສູນກາງສະຫະພັນແມ່ຍິງລາວ ສະໄໝທີ VIII ຄັ້ງວັນທີ 11 ມັງກອນ 2022, ມະຕິກອງປະຊຸມໃຫຍ່ຜູ້ແທນແມ່ຍິງແຂວງສະຫວັນະເຂດ ຄັ້ງທີ X, ມະຕິກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດ ຄັ້ງທີ VIII ຄັ້ງວັນທີ 19 ພະຈິກ 2021 ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ ແລະ ບົດໂອ້ລົມຂອງ ສະຫາຍ ທອງລຸນ ສີສຸລິດ ເລຂາທິການໃຫຍ່ ປະທານປະເທດ ຕໍ່ກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດ ຄັ້ງທີ VIII ຄັ້ງວັນທີ 19 ພະຈິກ 2021 ທີ່ຫໍປະຊຸມແຫ່ງຊາດ.  ພ້ອມດຽວກັນນີ້ກໍ່ຍັງຮຽກຮ້ອງໃຫ້ສະມາຊິກເອື້ອຍນ້ອງແມ່ຍິງໃຫ້ສ້າງຕົນເອງໃຫ້ມີຄວາມເຂັ້ມແຂງ, ພ້ອມກັນປູກຈິດສຳນຶກ, ອົບຮົມບົ່ມສອນລູກຫຼານ, ເຕົ້າໂຮມຄວາມສາມັກຄີ, ອະນຸລັກຮັກສາຮີດຄອງປະເພນີ, ພ້ອມກັນຊີ້ນຳໆພາວຽກງານພາຍໃນຂົງເຂດທີ່ຕົນຮັບຜິດຊອບໃຫ້ປະສົບຜົນສຳເລັດຕາມຄາດໝາຍທີ່ວາງໄວ້.