(ສພຊ) ເພື່ອຮັດແໜ້ນຄວາມສາມັກຄີລະຫວ່າງ ສະຫະພັນກຳມະບານສະພາແຫ່ງຊາດ ແລະ ສະຫະພັນກຳມະບານ ແຂວງບໍລິຄຳໄຊ ແລະ ເປັນການແລກປ່ຽນຖອດຖອນບົດຮຽນກ່ຽວກັບການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ທີ່ສູນກາງກຳມະບານວາງອອກ ໃຫ້ປະສົບຜົນສຳເລັດຈົບງາມ. ໃນວັນທີ 7 ກຸມພາ 2023 ສະຫະພັນກຳມະບານສະພາແຫ່ງຊາດ ນຳໂດຍສະຫາຍ ອໍາໄພ ຈິດມານົນ ປະທານຄະນະບໍລິຫານງານສະຫະພັນກໍາມະບານສະພາແຫ່ງຊາດ, ກໍາມະການຄະນະພັກສະພາແຫ່ງຊາດ ທັງເປັນຮອງປະທານກໍາມາທິການກົດໝາຍ, ພ້ອມດ້ວຍຄະນະ ໄດ້ເຂົ້າພົບການນຳຂອງແຂວງ ໂດຍການຕ້ອນຮັບຂອງທ່ານ ເລື່ອນວິໄລ ຈັນທະລາພັນ ຄະນະປະຈຳພັກແຂວງ ຮອງປະທານສະພາປະຊາຊົນແຂວງບໍລິຄໍາໄຊ ແລະ ຄະນະ ໄດ້ເຂົ້າຮ່ວມກອງປະຊຸມແລກປ່ຽນບົດຮຽນກ່ຽວກັບການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ກັບ ສະຫະພັນກຳມະບານແຂວງບໍລິຄໍາໄຊ ຢູ່ຫ້ອງການສະພາປະຊາຊົນແຂວງບໍລິຄຳໄຊ ໂດຍການເຂົ້າຮ່ວມເປັນປະທານຂອງທ່ານ ດຳລົງ ທັບລາດ ປະທານສະຫະພັນກຳມະບານແຂວງ ພ້ອມດ້ວຍ 3 ອົງການຈັດຕັ້ງມະຫາຊົນຂອງແຂວງເຂົ້າຮ່ວມຢ່າງພ້ອມພຽງ ເຊິ່ງມີຜູ້ເຂົ້າຮ່ວມທັງໝົດ 68 ທ່ານ ຍິງ 23 ທ່ານ.
ຈຸດປະສົງຂອງກອງປະຊຸມ ເພື່ອແລກປ່ຽນບົດຮຽນ ກ່ຽວກັບການເຄື່ອນໄຫວວຽກງານ ແລະ ການປະຕິບັດພາລະບົດບາດຂອງສະຫະພັນກໍາມະບານສະພາແຫ່ງຊາດ ແລະ ສະຫະພັນກໍາມະບານແຂວງບໍລິຄໍາໄຊ; ການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ; ການສ້າງຕັ້ງ ແລະ ການຄຸ້ມຄອງກອງທຶນຊ່ວຍເຫຼືອເຊິ່ງກັນ ແລະ ກັນຂອງສະຫະພັນກໍາມະບານແຂວງ; ການຄຸ້ມຄອງ ແລະ ປົກປ້ອງສະມາຊິກກໍາມະບານທີ່ຂຶ້ນກັບ ແລະ ຈັດກິດຈະກໍາຮ່ວມກັນ.
ໃນໄລຍະດຳເນີນກອງປະຊຸມ ແມ່ນຕາງໜ້າຄະນະບໍລິຫານງານສະຫະພັນກຳມະບານ, ແມ່ຍິງ ແລະ ຊາວໜຸ່ມ ທັງສອງຝ່າຍ ໄດ້ລາຍງານກ່ຽວກັບການເຄື່ອນໄຫວວຽກງານໃນໄລຍະຜ່ານມາ ຕໍ່ກອງປະຊຸມໂດຍສັງເຂບ ແລະ ໄດ້ຜັດປ່ຽນກັນປະກອບຄໍາເຫັນແລກປ່ຽນບົດຮຽນ ແລະ ຂໍ້ສະເໜີ ເຊິ່ງກັນ ແລະ ກັນ ກ່ຽວກັບການປະຕິບັດເນື້ອໃນ 5 ເປັນເຈົ້າ, ເນື້ອໃນ 3 ດີ ຂອງແມ່ຍິງ ແລະ 4 ບຸກຂອງຊາວໜຸ່ມ ແລະ ກອງປະຊຸມໄດ້ລົງເລິກວຽກງານກຳມະບານທີ່ມີເນື້້ອໃນສຳຄັນເຊັ່ນ: ການສຶກສາອົບຮົມ, ປຸກລະດົມ, ເຕົ້າໂຮມຄວາມສາມັກຄີສະມາຊິກກຳມະບານ, ກຳມະກອນ ແລະ ຊາວຜູ້ອອກແຮງງານອື່ນໆ, ການມີຄວາມຕື່ນຕົວທາງດ້ານການເມືອງ; ເປັນຕົວແທນແຫ່ງການປົກປ້ອງສິດ ແລະ ຜົນປະໂຫຍດອັນຊອບທຳຂອງສະມາຊິກກຳມະບານ, ກຳມະກອນ ແລະ ຊາວຜູ້ອອກແຮງງານ ແລະ ການຕິດຕາມ, ກວດກາການຄຸ້ມຄອງລັດ, ຄຸ້ມຄອງເສດຖະກິດ, ວັດທະນະທຳ-ສັງຄົມຂອງອົງການລັດ ແລະ ຫົວໜ່ວຍແຮງງານ; ເຂົ້າຮ່ວມຕິດຕາມ, ກວດກາການເຄື່ອນໄຫວຂອງສະພາແຫ່ງຊາດ, ສະພາປະຊາຊົນຂັ້ນແຂວງ ແລະ ສະມາຊິກສະພາແຫ່ງຊາດ.
ພ້ອມກັນນັ້ນ, ສະຫະພັນກຳມະບານແຂວງບໍລິຄໍາໄຊ ຍັງໄດ້ສະເໜີໃຫ້ ສະຫະພັນກຳມະບານສະພາແຫ່ງຊາດ ຊ່ວຍຊຸກຍູ້, ຕິດຕາມ, ກວດກາການຈັດຕັ້ງປະຕິບັດນິຕິກຳທີ່ຕິດພັນກັບສາຍພົວພັນແຮງງານເປັນຕົ້ນ ກົດໝາຍວ່າດ້ວຍແຮງງານ, ກົດໝາຍວ່າດ້ວຍການລົງທຶນ ເພາະເຫັນວ່າຜ່ານການຈັດຕັ້ງປະຕິບັດຜ່ານມາ ຢູ່ບາງຫົວໜ່ວຍແຮງງານການຂະຫຍາຍການຈັດຕັ້ງ ແລະ ສະມາຊິກກຳມະບານ ແມ່ນຍັງພົບຄວາມຫຍຸ້ງຍາກ ຫົວໜ່ວຍແຮງງານບໍ່ໃຫ້ການຮ່ວມມືໃນການປະຕິບັດຕໍ່ຜູ້ອອກແຮງງານເທົ່າທີ່ຄວນ ແລະ ຕອນບ່າຍຂອງວັນດຽວກັນ, ທັງສອງຝ່າຍ ຍັງໄດ້ສ້າງຂະບວນການກິດຈະກຳ ກິລາບານເຕະ ແລະ ດຶງເຊືອກຮ່ວມກັນ ເພື່ອຮັດແໜ້ນຄວາມສາມັກຄີ ແລະ ສ້າງຄວາມມ່ວນຊື່ນໃຫ້ສະມາຊິກທັງສອງຝ່າຍ.
