(ສພຊ) ເພື່ອເປັນການທົບທວນຄືນຜົນງານທີ່ຜ່ານມາຂອງລັດຖະສະພາສະມາຊິກໄອພີຢູ ໃນການປະຕິບັດພາລະບົດບາດຂອງອົງການນິຕິບັນຍັດ ເຊິ່ງອົງການສະຫະປະຊາຊາດເພື່ອການພັດທະນາ (UNDP), ສະຖານທູດ ສ.ອາເມລິກາ ປະຈໍາ ສປປລາວ ໄດ້ຮ່ວມກັນເປັນເຈົ້າພາບຈັດພິທີສະເຫຼີມສະຫຼອງວັນສ້າງຕັ້ງສະຫະພັນລັດຖະສະພາສາກົນ ຫລື IPU ຄົບຮອບ 133 ປີ (30 ມິຖຸນາ 1889-30 ມິຖຸນາ 2022) ຂຶ້ນຢູ່ທີ ໂຮງແຮມ ແລນມາກ ນະຄອນຫຼວງວຽງຈັນ ຂອງຄໍ່າຄືນຂອງວັນທີ 29 ມິຖຸນາຜ່ານມາ ໂດຍການນໍາພາຂອງທ່ານ ສັນຍາ ປຣະເສີດ ປະທານກໍາມາທິການການຕ່າງປະເທດ ສະພາແຫ່ງຊາດ ແຫ່ງ ສປປລາວ ພ້ອມດ້ວຍບັນດາທ່ານສະມາຊິກສະພາແຫ່ງຊາດເຂົ້າຮ່ວມ.
ໃນພິທີດັ່ງກ່າວ, ຜູ້ເຂົ້າຮ່ວມໄດ້ຮັບຟັງການກ່າວຕ້ອນຮັບຈາກທ່ານ ສັນຍາ ປຣະເສີດ; ການກ່າວຕ້ອນຮັບຂອງທ່ານ ນາງ ຈອຍ ມິຈິໂກະ ຊາກຸໄຣ ອຸປະທູດປະຈໍາສະຫະລັດອາເມລິກາ; ການກ່າວຕ້ອນຮັບຂອງທ່ານ ນາງ ແຄັດເທີລິນ ເຟືອງ ຮອງຜູ້ຕາງໜ້າອົງການສະຫະປະຊາຊາດເພື່ອການພັດທະນາປະຈໍາລາວ; ຈາກນັ້ນ ຜູ້ເຂົ້າຮ່ວມຍັງໄດ້ຮັບຊົມວິດີໂອສັ້ນ ຈາກເລຂາທິການຂອງສະຫະພັນລັດຖະສະພາສາກົນ ເຊິ່ງມີເນື້ອໃນເວົ້າເຖິງຄວາມໝາຍຄວາມສໍາຄັນຂອງວັນດັ່ງກ່າວ ແລະ ວຽກງານຂອງລັດຖະສະພາສາກົນ.
(ພາບ ແລະ ຂ່າວ: ສອນສັກ ວັນວິໄຊ)