(ສພຂ)ລະຫວ່າງວັນທີ 24-25 ກຸມພາ 2022 ນີ້. ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 17 (ສສຊ ເຂດ17) ແຂວງ ອັດຕະປື ແລະ ສະມາຊິກສະພາປະຊາຊົນແຂວງ (ສສຂ) ເຂດເລືອກຕັ້ງເມືອງ ສາມັກຄີໄຊ ລົງເຄື່ອນໄຫວພົບປະຜູ້ມີສິດເລືອກຕັ້ງ ແລະເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ (ສພຊ) ຊຸດທີ IX ແລະ ຂອງສະພາປະຊາຊົນແຂວງ (ສພຂ) ຊຸດທີ II ຢູ່ທີ່ບ້ານໃຫ່ຍເຊກະໝາມ ແລະ ບ້ານລະຍາວເໜືອ ເມືອງສາມັກຄີໄຊ. ເຊິ່ງນຳໂດຍທ່ານ ນາງ ມີນາງພອນ ໄຊສົມພູ ປະທານຄະນະ ສສຊ ເຂດ17 ປະທານ ສພຂ ພ້ອມດ້ວຍຄະນະ ສສຊ ເຂດ17, ສສຂ ເຂດເລືອກຕັ້ງເມືອງສາມັກຄີໄຊ ແລະ ພະນັກງານ-ວີຊາການຕິດຕາມ. ມີອຳນາດການປົກຄອງບ້ານຕະຫລອດຮອດພໍ່ແມ່ປະຊາຊົນຜູ້ມີສິດເລືອກຕັ້ງເຂົ້າຮ່ວມ 100 ກວ່າຄົນ.

ໃນການເຄື່ອນໄຫວຄັ້ງນີ້, ໄດ້ຮັບຟັງການລາຍງານສະພາບລວມໂດຍຫຍໍ້ຂອງບ້ານ; ຈາກນັ້ນ, ບັນດາທ່ານ ສສຊ ເຂດ17  ແລະ ສສຂ ໄດ້ຜັດປ່ຽນກັນເຜີຍແຜ່ຜົນສຳເລັດກອງປະຊຸມ ສພຊ, ສພຂ ແລະ ໄດ້ຮັບຟັງຄຳຄິດຄຳເຫັນ, ຄຳສະເໜີຈາກປະຊາຊົນເປັນຕົ້ນ: ການຄຸ້ມຄອງວຽກງານກະສີກຳປູກຝັງລ້ຽງສັດ (ໃຫ້ວີຊາການກ່ຽວຂ້ອງແນະນຳ-ນຳພາປະຊາຊົນ), ບໍລິສັດທີ່ຕັ້ງໃນຂອບເຂດບ້ານຄວນມີນະໂຍບາຍ ຫລືການພັດທະນາໃຫ້ແກ່ບ້ານ, ເລັ່ງດ່ວນແກ້ໄຂບັນຫາຂໍ້ຂັດແຍ່ງທີ່ດີນ, ຕັດຕາຜ້າເສັ້ນທາງ, ງົບປະມານສ້າງຫ້ອງການບ້ານ  ແລະ ບັນຫາອື່ນໆອີກຈໍານວນໜຶ່ງ; ພ້ອມນັ້ນ, ບັນດາທ່ານ ສສຊ ແລະ ສສຂ ໄດ້ຊີ້ແຈງອະທິບາຍບາງບັນຫາທີ່ຕ້ອງດຳເນີນໄປຕາມຂັ້ນຕາມຕອນຂອງລະບຽບກົດໝາຍ ແລະ ບາງຄຳສະເໜີແມ່ນຈະໄດ້ສັງລວມນຳໄປຄົ້ນຄວ້າປະສານກັບພາກສ່ວນກ່ຽວຂ້ອງພິຈາລະນາແກ້ໄຂໃນຕໍ່ໜ້າ. ໂອກາດການເຄື່ອນໄຫວ ສສຊ-ສສຂ ຍັງໄດ້ມອບເຄື່ອງນຸ່ງຫົ່ມຈໍານວນ 1 ໃຫ້ແກ່ບ້ານລະຍາວເໜືອເພື່ອນໍາມອບຕໍ່ໃຫ້ແກ່ຄອບຄົວທີ່ທຸກຍາກຂາດເຂີນ. (ພາບ-ຂ່າວ: ວິນັດ ສພຂ)