ໃນຕອນບາຍ ເວລາ 13​:30 ໂມງ ຂອງ 16 ມັງກອນ 2024  ທ່ານ ລໍາໄມ ກູດລາວົງ ຮອງປະທານສະພາປະຊາຊົນແຂວງ ສະມາຊິກສະພາແຫ່ງຊາດ ປະຈໍາເຂດ ເລືອກຕັ້ງທີ 10 ແຂວງວຽງຈັນ ແລະ ທ່ານ ບຸນນໍາ ຈັນທອງສີ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 10 ແຂວງວຽງຈັນ  ໄດ້ລົງເຄື່ອນໄຫວພົບປະຜູ້ມີສິດເລືອກຕັ້ງ ເພື່ອໂຄສະນາເຜີຍແຜ່ເນື້ອໃນຜົນສໍາເລັດກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ IX ແລະ ກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງວຽງຈັນ ຊຸດທີ II ຢູ່ທີ່ກອງບັນຊາການທະຫານແຂວງວຽງຈັນ ເຂົ້າຮ່ວມມີ ຄະນະພັກ, ຄະນະບັນຊາ ແລະ ພະນັກງານຫຼັກແຫຼ່ງຈາກກອງບັນຊາການທະຫານແຂວງ ແລະ ກອງບັນຊາການ ປກສ ແຂວງວຽງຈັນ ເຂົ້າຮ່ວມຢ່າງພ້ອມພຽງ.

ກອງປະຊຸມໄດ້ຮັບຟັງບົດລາຍງານຫຍໍ້ຂອງກອງບັນຊາການທະຫານ ແຂວງວຽງຈັນ ໃຫ້ກຽດຂື້ນຜ່ານໂດຍ ທ່ານ ພັອ ສົມພັນ  ເຮືອງພະຈັນ ຫົວໜ້າຫ້ອງການເມືອງທະຫານແຂວງວຽງຈັນ, ກອງປະຊຸມໄດ້ຟັງແຈ້ງຂ່າວເນື້ອໃນຜົນສໍາເລັດກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ IX ແລະ ກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງວຽງຈັນ ຊຸດທີ II ໂດຍຕິດພັນກັບການເຜີຍແຜ່ພາລະບົດບາດ, ສິດ ແລະ ໜ້າທີຂອງ ສສຊ ແລະ ສສຂ ໃຫ້ສະມາຊິກພັກ, ພະນັກງານ-ລັດຖະກອນ ໄດ້ຮັບຮູ້ເຂົ້າໃຈຕໍ່ ແນວທາງນະໂຍບາຍຂອງພັກ-ລັດ ເພື່ອຜັນຂະຫຍາຍເຂົ້າໃນວຽກງານຕົວຈິ່ງ ໃນໂອກາດທີ່ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 10 ແຂວງວຽງຈັນ ລົງເຄື່ອນໄຫວວຽກງານດັ່ງກ່າວເຊິ່ງໄດ້ມອບເຄື່ອງກິລາໃຫ້ແກ່ກອງບັນຊາການທະຫານແຂວງວຽງຈັນ ເຄື່ອງນຸງຈໍານວນ 80 ຊຸດ, ບານເຕາະ 2 ໜ່ວຍ, ບານຕີ 2 ໜ່ວຍ ແລະ ໄດ້ສ້າງຂະບວນການແຂ່ງຂັນກິລາບານເຕາະເພດຊາຍເພື່ອຫັນແນນຄວາມສາມັກຄີ ລະຫວ່າງກອງບັນຊາການທະຫານແຂວງ ແລະ ສະພາປະຊາຊົນແຂວງວຽງຈັນ.

ພາບ-ຂ່າວ ບູລາຕີ ແສນທະວົງ.