ເພື່ອລາຍງານເຜີຍແຜ່ເນື້ອໃນຜົນສໍາເລັດຂອງກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II, ເພື່ອເຂົ້າຮ່ວມໃນການປະຕິບັດ ແນວທາງນະໂຍບາຍ, ລັດຖະທໍາມະນູນ, ກົດໝາຍ, ການຄຸ້ມຄອງລັດ ຄຸ້ມຄອງເສດຖະກິດ-ສັງຄົມ, ໃຫ້ຮູ້ ແລະ ເຂົ້າໃຈພາລະບົດບາດ, ສິດ ແລະໜ້າທີ່ຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ແລະ  ເພື່ອເປັນການເກັບກຳ, ນຳເອົາຄວາມຄິດເຫັນ ແລະ ຄວາມມຸ້ງມາດປາຖະໜາຂອງປະຊາຊົນ. ໃນວັນທີ 19 ຕຸລາ 2023 .​ ນໍາໂດຍ ທ່ານ ນາງ ພຸດມະໄລພອນ ແກ້ວວົງສາ ຮອງເລຂາພັກເມືອງ ຫົວໜ້າໜ່ວຍສະມາຊິກສະພາປະຊາຊົນແຂວງ ເຂດເລືອກຕັ້ງເມືອງສາມັກຄີໄຊ ພ້ອມດ້ວຍຄະນະ ສະມາຊິກສະພາປະຊາຊົນແຂວງ ເຂດເລືອກຕັ້ງເມືອງ ແລະ ວີຊາການຕິດຕາມ ລົງພົບປະຢ້ຽມຢາມຜູ້ມີສິດເລືອກຕັ້ງ ຢູ່ບ້ານສາມັກຄີ ເມືອງ ສາມັກຄີໄຊ, ໂດຍມີ: ພະນັກງານກໍ່ສ້າງຮາກຖານ,ອົງການປົກຄອງບ້ານ ແລະ ປະຊາຊົນ ເຂົ້້າຮ່ວມ 42 ຄົນ. ຍິງ 29 ຄົນ.

​​        ໃນການພົບປະ,ໄດ້ຮັບຟັງການລາຍງານສະພາບລວມຂອງບ້ານໂດຍຫຍໍ້ວ່າ: ບ້ານສາມັກຄີ ມີພົນລະເມືອງທັງໝົດ 2.592 ຄົນ,ຍິງ 1.296 ຄົນ, ມີ 568 ຄອບຄົວ, ມີ 536 ຫຼັງຄາເຮືອນ ມີແຮງງານສົມບູນ-ສໍາຮອງທັງໝົດ 1.392 ຄົນ, ປະຊາຊົນພາຍໃນບ້ານມີອາຊີບເຮັດເປັນຕົ້ນ ແລະ ຖືອາຊີບຄ້າຂາຍເປັນສໍາຮອງ, ມີເນືຶ້ອທີ່ນາທໍາການຜະລິດ 187 ເຮັກຕາ, 9 ເດືອນຜ່ານມາສາມາດສ້າງລາຍຮັບຈາກການເກັບຄ່າທໍານຽມ ແລະ ການບໍລິການຕ່າງໆທັງໝົດ 12.725.000 ກີບ, ເກັບພາສີທີ່ດີນໄດ້ 33.866.651 ກີບ ເທົ່າກັບ 49,57%. ຈາກນັ້ນ, ບັນດາທ່ານ ສະມາຊິກສະພາປະຊາຊົນແຂວງ ໄດ້ຜັດປ່ຽນກັນເຜີຍແຜ່ຜົນສຳເລັດຂອງກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II. ພ້ອມທັງໄດ້ໂອ້ລົມໃຫ້ປະຊາຊົນເອົາໃຈໃສ່ສູ້ຊົນ ສ້າງເສດຖະກິດຄອບຄົວໃຫ້ກຸ້ມຢູ່ກຸ້ມກີນ, ຢູ່ແບບພໍພຽງ ເປັນເຈົ້າຕົ້ນເອງ ມີຄວາມສາມັກຄີປ່ອງດອງ ໃນສະພາບທີ່ມີຄວາມເຄັ່ງຮ້ອນທາງດ້ານເສດຖະກິດ-ການເງີນ, ພ້ອມນີ້ ກໍ່ໄດ້ສົນທະນາ ຄວາມຄິດຄວາມເຫັນ ແລະ ຄໍາສະເໜີຂອງປະຊາຊົນ ທີ່ພົວພັນເຖິງການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ.

(ນັກຂ່າວ​:ສພຂ​ ອັດຕະປື)