(ສພຊ) ເພື່ອເຮັດໃຫ້ສະມາຊິກພັກ, ພະນັກງານ-ລັດຖະກອນ ພາຍໃນສະພາແຫ່ງຊາດ ມີຄວາມຮັບຮູ້ ແລະ ເຂົ້າໃຈຢ່າງເລິກເຊິ່ງຕໍ່ແນວທາງນະໂຍບາຍຂອງພັກ ທີ່ກຳນົດອອກໃນກອງປະຊຸມໃຫຍ່ ຄັ້ງທີ XI ຂອງພັກ, ແນໃສ່ການຜັນຂະຫຍາຍເຂົ້າສູ່ການຈັດຕັ້ງປະຕິບັດໃຫ້ກາຍເປັນຂະບວນການອັນກວ້າງຂວາງຂອງມະຫາຊົນ, ເຮັດໃຫ້ແນວທາງການປ່ຽນແປງໃໝ່ຂອງພັກສືບຕໍ່ດຳເນີນໄປຢ່າງເລິກເຊິ່ງ, ຮອບດ້ານ ແລະ ມີຜົນສຳເລັດໃຫຍ່ຫຼວງກວ່າເກົ່າ ນຳເອົາຜົນປະໂຫຍດຕົວຈິງມາໃຫ້ປະເທດຊາດ ແລະ ປະຊາຊົນບັນດາເຜົ່າ; ເພື່ອເປັນການຮຽນຮູ້ ແລະ ລະນຶກເຖິງຄຸນງາມຄວາມດີ, ຜົນງານອັນຍິ່ງໃຫຍ່ຂອງນັກຮົບປະຕິວັດ ເປັນພື້ນຖານໃນການເສີມສ້າງຄຸນທາດການເມືອງ, ມູນເຊື້ອຄວາມສາມັກຄີຂອງປະຊາຊົນລາວບັນດາເຜົ່າ, ປຸກລະດົມນ້ຳໃຈຮັກຊາດຮັກລະບອບໃໝ່, ເປັນເຈົ້າຕົນເອງ, ເຊີດຊູບົດບາດການນຳພາຂອງພັກ ສ້າງຄວາມເຂັ້ມແຂງດ້ວຍຕົນເອງ ແລະ ເພື່ອລະນຶກສະແດງຄວາມຮູ້ບຸນຄຸນຕໍ່ຜົນງານ ແລະ ຄຸນງາມຄວາມດີອັນໃຫຍ່ຫຼວງຂອງຜູ້ນຳ ແລະ ນັກຮົບວິລະຊົນ ຜູ້ທີ່ເສຍສະຫຼະຕໍ່ສູ້ເພື່ອປະເທດຊາດ; ໃນຕອນເຊົ້າຂອງວັນທີ 5 ມັງກອນ 2023 ທີ່ສະພາແຫ່ງຊາດ ໄດ້ຈັດກອງປະຊຸມເຜີຍແຜ່ເຊື່ອມຊຶມເອກະສານສຳຄັນຕ່າງໆຂອງພັກ, ຂອງຊາດ ແລະ ການທາບທາມບຸກຄະລາກອນ ຮອບທີ 2 ພາຍໃນສະພາແຫ່ງຊາດ ໂດຍການເຂົ້ົາຮ່ວມ ແລະ ປາຖະກະຖາວັນຊາດ ທີ 2 ທັນວາ 1975 ຄົບຮອບ 47 ປີ ແລະ ປາຖະກະຖາວັນຄ້າຍວັນເກີດປະທານ ໄກສອນ ພົມວິຫານ ຄົບຮອບ 102 ປີ ຈາກສະຫາຍ ສົມສະຫວາດ ເລັ່ງສະຫວັດ ອະດີດກຳມະການກົມການເມືອງສູນກາງພັກ, ອະດີດຮອງນາຍົກລັດຖະມົນຕີ; ມີສະຫາຍ ຄຳໃບ ດຳລັດ ກຳມະການສູນກາງພັກ, ຮອງປະທານສະພາແຫ່ງຊາດ; ບັນດາສະຫາຍຄະນະປະຈຳ, ປະທານ-ຮອງປະທານກຳມາທິການ, ຄະນະເລຂາທິການສະພາແຫ່ງຊາດ, ຫົວໜ້າສະຖາບັນຄົ້ນຄວ້ານິຕິກຳສະພາແຫ່ງຊາດ, ສະມາຊິກພັກພາຍໃນສະພາແຫ່ງຊາດເຂົ້າຮ່ວມ.
ໃນພິທີ, ສະຫາຍ ສົມສະຫວາດ ເລັ່ງສະຫວັດ ໄດ້ປາຖະກະຖາເລົ່າຄືນມູນເຊື້ອ ແລະ ຄວາມໝາຍຄວາມສຳຄັນຂອງວັນຊາດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ວັນທີ 2 ທັນວາ (2/12/1975-2/12/2022) ຄົບຮອບ 47 ປີ ແລະ ປາຖະກະຖາວັນຄ້າຍວັນເກີດປະທານ ໄກສອນ ພົມວິຫານ (13/12/1920-13/12/2022) ຄົບຮອບ 102 ປີ ເຊິ່ງທ່ານໄດ້ເລົ່າຄືນກ່ຽວກັບຊີວິດ ແລະ ການເຄື່ອນໄຫວປະຕິວັດ, ຜົນງານ ແລະ ຄຸນງາມຄວາມດີ ຂອງປະທານ ໄກສອນ ພົມວິຫານ.
ໃນຕອນບ່າຍຂອງວັນດຽວກັນ, ສະຫາຍ ຄຳໃບ ດຳລັດ ໄດ້ສືບຕໍ່ເຜີຍແຜ່ມະຕິຄົບຄະນະບໍລິຫານງານສູນກາງພັກ ຄັ້ງທີ 5 ສະໄໝທີ XI ແລະ ເຜີຍແຜ່ມະຕິວ່າດ້ວຍວຽກງານການເມືອງ-ແນວຄິດທົ່ວປະເທດ ຄັ້ງທີ 5.
ໃນໂອກາດດັ່ງກ່າວ, ກອງປະຊຸມຍັງໄດ້ຮັບຟັງການປະກາດແຕ່ງຕັ້ງຕຳແໜ່ງບໍລິຫານພາຍໃນສະພາແຫ່ງຊາດ ຈາກສະຫາຍ ສິງຄຳ ວົງພະຈັນ ຮອງເລຂາທິການສະພາແຫ່ງຊາດ ເຊິ່ງຕໍາແໜ່ງບໍລິຫານປະເພດ 3 ມີ 1 ສະຫາຍ ແລະ ຕໍາແໜ່ງບໍລິຫານປະເພດ 5 ມີ 4 ສະຫາຍ; ຈາກນັ້ນ, ສະຫາຍ ນາງ ປິ່ງຄຳ ລາຊະສິມມາ ກຳມະການສູນກາງພັກ, ເລຂາທິການສະພາແຫ່ງຊາດ ໄດ້ມອບມະຕິຕົກລົງຂອງຄະນະປະຈຳສະພາແຫ່ງຊາດ ວ່າດ້ວຍການແຕ່ງຕັ້ງຕຳແໜ່ງບໍລິຫານພາຍໃນສະພາແຫ່ງຊາດ; ພ້ອມນັ້ນ, ຍັງໄດ້ມີການທາບທາມບຸກຄະລາກອນ ເຂົ້າໃນແຜນກຳນົດພະນັກງານນຳພາ-ຄຸ້ມຄອງ ທີ່ຂຶ້ນກັບສິດຄຸ້ມຄອງຂອງຄະນະບໍລິຫານງານພັກສະພາແຫ່ງຊາດ ຮອບທີ 2.
(ຂ່າວ: ນາງ ສຸພາວັນ ຫອມສະນິດ; ພາບ: ສອນສັກ ວັນວິໄຊ)