(ສພຊ) ເພື່ອເປັນການປູກຈິດສຳນຶກໃຫ້ແກ່ຊາວໜຸ່ມ-ເຍົາວະຊົນ ແລະ ອານຸຊົນ, ພໍ່ແມ່ຜູ້ປົກຄອງ ກໍຄືອຳນາດການປົກຄອງ, ການຈັດຕັ້ງທຸກຂັ້ນ ເຫັນໄດ້ຄວາມສຳຄັນຂອງວັນເດັກນ້ອຍສາກົນ ວັນທີ 1 ມິຖຸນາ ເຊິ່ງຫຼາຍປະເທດໃນໂລກ ກໍໄດ້ຈັດຕັ້ງສະເຫຼີມສະຫຼອງດ້ວຍຫຼາຍກິດຈະກຳຢ່າງຄຶກຄື້ນ; ເພື່ອເສີມຂະຫຍາຍສາຍພົວພັນຄອບຄົວ, ພໍ່ແມ່-ລູກ ກໍຄືນະໂຍບາຍຂອງພັກ ແລະ ລັດເຮົາ ໃນການສຶກສາອົບຮົມ, ປູກຈິດສຳນຶກ ແນວຄິດຮັກຊາດ, ຮັກບ້ານເກີດເມືອງນອນ ທັງເປັນການປົກປ້ອງສົ່ງເສີມສິດຜົນປະໂຫຍດຂອງເດັກນ້ອຍຢູ່ ສປປລາວ ຕາມລະບຽບກົດໝາຍທີ່ກໍານົດໄວ້. ໃນວັນທີ 1 ມິຖຸນາ 2023 ທີ່ສະພາແຫ່ງຊາດ ໄດ້ຈັດພິທີສະເຫຼີມສະຫຼອງວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດ ໂດຍມີການນໍາຂອງສະພາແຫ່ງຊາດ, ກອງທຶນຊ່ວຍເຫຼືອສັງຄົມສະພາແຫ່ງຊາດ, ຕາງໜ້າສູນກາງສະຫະພັນກໍາມະບານລາວ, ຕາງໜ້າສູນກາງສະຫະພັນແມ່ຍິງລາວ, ຕາງໜ້າສູນກາງຊາວໜຸ່ມປະຊາຊົນປະຕິວັດລາວ ພ້ອມດ້ວຍລູກຫຼານຂອງພະນັກງານພາຍໃນສະພາແຫ່ງຊາດເຂົ້າຮ່ວມເປັນຈໍານວນຫຼາຍ.

ໃນພິທີດັ່ງກ່າວ ມີຫຼາກຫຼາຍກິດຈະກໍາຄື: ຢ້ຽມຊົມຫ້ອງປະຊຸມໃຫຍ່ສະພາແຫ່ງຊາດ ແລະ ຫໍມູນເຊື້ອ; ກວດສຸຂະພາບໃຫ້ເດັກນ້ອຍ; ຫຼີ້ນເກມ, ຖາມ-ຕອບ ຫຼື ແຕ້ມຮູບ ແລະ ການສະແດງສິລະປະຂອງຫຼານນ້ອຍ; ບັນດາທ່ານການນຳ, ພັນລະຍາການນຳ ແລະ ອົງການຈັດຕັ້ງມະຫາຊົນ ມອບຂອງຂວັນ, ເຂົ້າໜົມໃຫ້ຫຼານນ້ອຍ; ຄອບຄົວການນໍາຂອງສະພາແຫ່ງຊາດ ຈັດບູດອາຫານ ເພື່ອລ້ຽງເດັກນ້ອຍ ແລະ ຜູ້ເຂົ້າຮ່ວມງານ (ກຳມາທິການຂອງສະ ພາແຫ່ງຊາດ ແລະ ຄະນະເລຂາທິການສະພາແຫ່ງຊາດ).

ໃນພິທີຄັ້ງນີ້ ທ່ານ ມອນໄຊ ລາວມົວຊົ່ງ ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ ໄດ້ມີຄໍາເຫັນວ່າ: ວັນເດັກແຕ່ລະປີ ແມ່ນເຫດການພິເສດໜຶ່ງທີ່ມີຄວາມໝາຍຕໍ່ເດັກ ຈຸດປະສົງແນໃສ່ຊຸກຍູ້ສົ່ງເສີມ, ພັດທະ ນາ ແລະ ປົກປ້ອງເດັກ ໃນທົ່ວໂລກ; ຍ້ອນເຫັນໄດ້ຄວາມສຳຄັນຂອງເດັກ ທີ່ເປັນອະນາຄົດຂອງຊາດ, ເປັນເມັດພືດ, ເປັນໜໍ່ແໜງທຶນຮອນແຫ່ງຊີວິດໃນມື້ນີ້ ເພື່ອກາຍເປັນອະນາຄົດອັນແຈ່ມໃສຂອງປະເທດຊາດໃນມື້ໜ້າ, ທົ່ວໂລກ ຈຶ່ງໄດ້ສະເຫຼີມສະຫຼອງວັນເດັກສາກົນ ຕາມເງື່ອນໄຂ ແລະ ສະພາບຕົວຈິງຂອງປະເທດຕົນ. ປັດຈຸບັນໃນທົ່ວໂລກ ກໍຄື ສປປລາວ ໄດ້ກຳນົດເອົາການສະເຫຼີມສະຫຼອງວັນເດັກ ມີ 3 ວັນຄື: ວັນເດັກສາກົນ (ວັນທີ 1 ມິຖຸນາ), ວັນເດັກຈັກກະ ວານ ຫຼື ວັນເດັກໂລກ (20 ພະຈິກ) ແລະ ວັນເດັກແຫ່ງຊາດ ຫຼື ວັນຄອບຄົວແຫ່ງຊາດ (ຕາມແຕ່ລະປະເທດກຳນົດ).