(ສພຊ) – ວັນທີ 8-11 ພະຈິກນີ້ ທີ່ແຂວງວຽງຈັນ, ສະພາແຫ່ງຊາດ (ສພຊ) ໄດ້ມີການຈັດກອງປະຊຸມສໍາມະນາວິທະຍາສາດ ຕິດພັນກັບເນື້ອໃນທີ່ຈະນໍາເຂົ້າພິຈາລະນາໃນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ໂດຍການເປັນປະທານຂອງທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ເຊິ່ງມີບັນດາທ່ານປະທານກໍາມາທິການ ແລະ ຮອງປະທານກໍາມາທິການພາຍໃນ ສພຊ, ປະທານສະພາປະ ຊາຊົນຂັ້ນແຂວງ, ສະມາຊິກສະພາແຫ່ງຊາດ (ສສຊ) ທົ່ວປະເທດ ພ້ອມດ້ວຍບັນດາທ່ານຕາງໜ້າຈາກກະຊວງ ແລະ ອົງການທີ່ກ່ຽວຂ້ອງ, ພ້ອມທັງຊ່ຽວຊານດ້ານເສດຖະກິດ ຈາກອົງການຈັດຕັ້ງສາກົນ ແລະ ແຂກຖືກເຊີນຈາກພາກສ່ວນຕ່າງໆ ເຂົ້າຮ່ວມຢ່າງຫຼວງຫຼາຍ.
ທ່ານ ປອ. ນາງ ສູນທອນ ໄຊຍະຈັກ ໄດ້ເນັ້ນໜັກເຖິງຈຸດປະສົງຂອງກອງປະຊຸມໃນຄັ້ງນີ້ ແມ່ນເພື່ອສ້າງຄວາມຮັບຮູ້, ເຂົ້າໃຈໂດຍພື້ນຖານໃຫ້ແກ່ສະມາຊິກສະພາແຫ່ງຊາດ ກ່ຽວກັບສະພາບລວມຂອງເສດຖະກິດມະຫາພາກ, ການປົກປ້ອງທາງສັງຄົມ, ການປ່ຽນແປງດິນຟ້າອາກາດ ແລະ ການເຄື່ອນຍ້າຍຖິ່ນຖານ, ບັນດາວຽກງານຂອງກຳມາທິການແຜນການ, ການເງິນ ແລະ ການກວດສອບ, ກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ແລະ ກຳມາທິການວັດທະນະທຳ-ສັງຄົມ ໂດຍມີບັນດາຊ່ຽວຊານທັງພາຍໃນ ແລະ ຕ່າງປະເທດຫຼາຍທ່ານມາໃຫ້ບົດຮຽນດ້ານຕ່າງໆທີ່ເປັນຜົນປະໂຫຍດຫຼາຍຕໍ່ເນື້ອໃນທີ່ຈະນຳເຂົ້າພິຈາລະນາຮັບຮອງໃນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງ ຊາດຊຸດທີ IX ໃຫ້ແກ່ ສສຊ ໃນບັນດາເຂດເລືອກຕັ້ງທົ່ວປະເທດ ກ່ຽວກັບບົດຮຽນໃນການສ້າງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ X, ວຽກງານທີ່ຢູ່ອາໄສທີ່ຕິດພັນກັບການສ້າງຮ່າງກົດໝາຍວ່າດ້ວຍທີ່ຢູ່ອາໄສ (ສ້າງໃໝ່), ຮ່າງຍຸດທະສາດການຄຸ້ມຄອງ ແລະ ພັດທະນາທີ່ດິນກະສິກໍາ ຮອດປີ 2030 ແລະ ວິໄສທັດຮອດປີ 2040, ການຈັດຕັ້ງປະຕິບັດຍຸດທະສາດການປະຕິຮູບລະບົບການສຶກສາ ແລະ ການພັດທະນາຊັບພະຍາກອນມະນຸດແຫ່ງຊາດໃນໄລຍະຜ່ານມາ.
ຜູ້ແທນກອງປະຊຸມ ໄດ້ຮັບຟັງການນໍາສະເໜີບົດຮຽນໃນການຈັດຕັ້ງປະຕິບັດວຽກ ງານທີ່ພົວພັນກັບເນື້ອໃນທີ່ກ່ຽວຂ້ອງເປັນຈຳນວນກວ່າ 20 ບົດ ຈາກບັນດາຊ່ຽວຊານທັງພາຍໃນ ແລະ ຕ່າງປະເທດ ຜູ້ທີ່ມີປະສົບປະການຫຼາຍ ເພື່ອເປັນການສ້າງຄວາມຮັບຮູ້ ແລະ ຄວາມເຂົ້າໃຈຂອງ ສສຊ ຕໍ່ກັບວຽກງານດັ່ງກ່າວ; ພ້ອມດຽວກັນນັ້ນ, ຍັງໄດ້ຮັບຟັງລາຍງານເຫດຜົນ ແລະ ຄວາມຈໍາເປັນຂອງການສ້າງ ແລະ ປັບປຸງບັນດາກົດໝາຍ, ນິຕິກໍາໃຕ້ກົດໝາຍ ຈາກຂະແໜງການທີ່ພົວພັນເຖິງວຽກງານເສດຖະກິດ, ແຜນການ-ການເງິນ, ກວດສອບ ແລະ ວັດທະນະທໍາ-ສັງຄົມ ທີ່ຈະສະເໜີເຂົ້າພິຈາລະນາໃນກອງປະຊຸມສະໄໝສາມັນເທື່ອທີ 8 ຂອງສະພາແຫງຊາດຊຸດທີ IX.
ຕະຫຼອດໄລຍະດຳເນີນກອງປະຊຸມ, ບັນດາທ່ານທີ່ເຂົ້າຮ່ວມໄດ້ເອົາໃຈໃສ່ເກັບກຳຂໍ້ມູນ ແລະ ແລກປ່ຽນຄຳຄິດເຫັນ ໂດຍໄດ້ຍົກບັນຫາຂຶ້ນມາສົນທະນາແລກປ່ຽນບົດຮຽນນຳວິທະ ຍາກອນທັງພາຍໃນ ແລະ ຕ່າງປະເທດ ເພື່ອສ້າງຄວາມຮັບຮູ້ ແລະ ເຂົ້າໃຈໃຫ້ເລິກເຊິ່ງ ເພື່ອນໍາບົດຮຽນດັ່ງກ່າວໄປໝູນໃຊ້ເຂົ້າໃນການພິຈາລະນາບັນດາເນື້ອໃນທີ່ຈະນໍາເຂົ້າຜ່ານໃນກອງປະຊຸມສະໄໝສາມັນເທື່ອທີ 8 ຂອງ ສພຊ ຊຸດທີ IX ທີ່ຈະໄຂຂຶ້ນໃນມໍ່ໆນີ້ ໃຫ້ມີປະສິດທິພາບ ແລະ ປະສິດທິຜົນສູງ.
(ນາງ ອາລິນ ສຸພິມມະປະດິດ)