ເພື່ອຈັດຕັ້ງປະຕິບັດວຽກງານ ທາງດ້ານການເມືອງຂອງພັກ-ຂອງລັດ ພາຍໃນແຂວງໄຊສົມບູນ ໃນວັນທີ 5 ສິງຫາ 2022 ນີ້, ກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວງໄຊສົມບູນ ຊຸດທີ II ໄດ້ສືບຕໍ່ດໍາເນີນພາລະກິດຂອງຕົນໄດ້ເປັນຢ່າງດີ ໂດຍພາຍໃຕ້ການເປັນປະທານຂອງທ່ານ ແດງ ປະທຸມທອງ ປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 18, ປະທານສະພາປະຊາຊົນແຂວງໄຊສົມບູນ ໃຫ້ກຽດເຂົ້າຮ່ວມ ໂດຍທ່ານ ພອຍຄໍາ ຮຸ່ງບຸນຍວງ ເຈົ້າແຂວງໄຊສົມບູນ ພ້ອມດ້ວຍຄະນະພັກ-ຄະນະນໍໍາແຂວງ ແລະ ຫົວໜ້າ, ຮອງຫົວໜ້າ, ອົງການ, ກົມກອງ ຕະຫຼອດຮອດບັນດາບໍລິສັດລັດວິສາຫະກິດອ້ອມຂ້າງແຂວງໄຊສົມບູນ ກໍໃຫ້ກຽດເຂົ້າຮ່ວມໃນຄັ້ງນີ້ດ້ວຍ.
ໃນໂອກາດດັ່ງກ່າວ ທີ່ປະຊຸມ ໄດ້ຮັບຟັງການຜ່ານບົດສະເໜີແຕ່ງຕັ້ງບຸກຄະລາກອນ ຂອງອົງການປົກຄອງແຂວງ ໂດຍທ່ານ ນາງ ຂັນກາບ ໄຊຍະກຸມມານ ສະມາຊິກສະພາແຫ່ງຊາດ, ຄະນະປະຈໍາ, ເລຂາທິການສະພາປະຊາຊົນແຂວງໄຊສົມບູນ ໂດຍທ່ານ ໄດ້ໃຫ້ຮູ້ລາຍລະອຽດຄືດັ່ງນີ້:
ສະເໜີແຕ່ງຕັ້ງເອົາ ທ່ານ ທົງສະຫວັນ ໂພສະລາດ ຜູ້ຮັກສາການ ຂຶ້ນເປັນຫົວໜ້າພະແນກຖະແຫລ່ງຂ່າວ, ວັດທະນະທໍາ ແລະທ່ອງທ່ຽວແຂວງ, ສະເໜີການແຕ່ງຕັ້ງເອົາ ທ່ານ ພາທໍ່ ຕົ່ງເຢີທໍ່ ຜູ້ຮັກສາການ ຂຶ້ນເປັນຫົວໜ້າພະແນກອຸດສາຫະກໍາ ແລະ ການຄ້າແຂວງ ແລະ ສະເໜີແຕ່ງຕັ້ງເອົາ ທ່ານ ປອ ພຸດ ອິນທະວົງ ຜູ້ຮັກສາການ ຂຶ້ນເປັນຫົວໜ້າພະແນກກະສິກໍາ ແລະ ປ່າໄມ້ແຂວງໄຊສົມບູນ ແລ້ວບັນດາທ່ານ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ແລະ ສະມາຊິກສະພາປະຊາຊົນແຂວງໄຊສົມບູນ ໄດ້ລົງຄະແນນສຽງຮັບຮອງເອົາເປັນທີ່ຮຽບຮ້ອຍ.
ພ້ອມດຽວກັນນີ້ ທີ່ປະຊຸມໄດ້ຮັບຟັງບົດລາຍງານຫຍໍ້ ກ່ຽວກັບ (ຮ່າງ) ຂໍ້ຕົກລົງ ຂອງທ່ານ ເຈົ້າແຂວງ ວ່າດ້ວຍການຮັບຮອງເອົາໂຄງປະກອບກົງຈັກການຈັດຕັ້ງຂັ້ນແຂວງ ແລະ ໂຄງປະກອບກົງຈັກຈັດຕັ້ງຂັ້ນແຂວງ 5 ເມືອງ ໂດຍທ່ານ ພົມມາ ແກ້ວບົວພາ ຫົວໜ້າພະແນກພາຍໃນແຂວງ ຄະນະຜູ້ຮັບຜິດຊອບ; ຮັບຮອງເອົາ ຂໍ້ຕົກລົງ ຂອງທ່ານ ເຈົ້າແຂວງໄຊສົມບູນ ວ່າດ້ວຍກອງທຶນພະນັກງານບໍານານ ແລະ ຜູ້ສູງອາຍຸ ໂດຍທ່ານ ວັນຄໍາເກັງ ຢາຊົ່ງກົວ ຫົວໜ້າພະແນກແຮງງານສະວຫວັດດີການ ແລະ ສັງຄົມແຂວງ ຜູ້ຮັບຜິດຊອບ; ຮັບຮອງເອົາ ຂໍ້ຕົກລົງ ຂອງທ່ານ ເຈົ້າແຂວງໄຊສົມບູນ ວ່າດ້ວຍລະບຽບການ ແລະ ກົນໄກ ເຮັດວຽກ ຂອງອົງການປົກຄອງແຂວງໄຊສົມບູນ ຊຸດທີ I ໂດຍທ່ານ ສົມບູນ ສອນລິດທິເດດ ຫົວໜ້າຫ້ອງວ່າການແຂວງ ຄະນະຜູ້ຮັບຜິດຊອບ; ຮັບຮອງເອົາ ມະຕິກອງປະຊຸມ ວ່າດ້ວຍການຮັບຮອງເອົາບົດລາຍງານ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈໍາ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2022 ແຂວງໄຊສົມບູນ; ຮັບຮອງເອົາ ມະຕິກອງປະຊຸມ ວ່າດ້ວຍການຮັບຮອງເອົາ ບົດລາຍງານການຈັດຕັ້ງປະຕິບັດ ແຜນງົບປະມານແຫ່ງລັດ ຂອງແຂວງ ປະຈໍາ 6 ເດືອນຕົ້ປີ ແລະ ແຜນການ 6 ເດືອນທ້າຍປີ 2022; ຮັບຮອງເອົາ ມະຕິກອງປະຊຸມ ວ່າດ້ວຍການຮັບຮອງເອົາ ແຜນການເຄື່ອນໄຫວ ແລະ ແຜນງົບປະມານ ຂອງສອງວາລະແຫ່ງຊາດ; ຮັບຮອງເອົາ ມະຕິກອງປະຊຸມ ວ່າດ້ວຍການຮັບຮອງເອົາບົດລາຍງານ ຂອງສະພາປະຊາຊົນແຂວງໄຊສົມບູນ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2022;
ພາຍຫຼັງທີ່ກອງປະຊຸມໄດ້ ຮັບຟັງການຜ່ານການສະເໜີສໍາເລັດແລ້ວ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ແລະ ສະມາຊິກສະພາປະຊາຊົນແຂວງໄຊສົມບູນ ໄດ້ຜັດປ່ຽນກັນປະກອບຄໍາຄິດເຫັນແລກປ່ຽນ ຕໍ່ບົດຕ່າງໆທີ່ກ່າວມາຂ້າງເທິງນີ້ ຢ່າງກົງໄປກົງມາ ແລະ ບັນດາທ່ານ ໄດ້ລົງຄະແນນສຽງຮັບຮອງເອົາບັນດາມະຕິ ແລະ ເອກະສານທີ່ມີຄວາມໝາຍຄວາມສໍາຄັນພື້ນຖານຂອງແຂວງໄຊສົມບູນ ແລ້ວທ່ານ ແດງ ປະທຸມທອງ ປະທານກອງປະຊຸມໄດ້ກ່າວປິດກອງປະຊຸມຢ່າງເປັນທາງການ ແລະ ກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວງໄຊສົມບູນ ຊຸດທີ II ໄດ້ສໍາເລັດລົງຢ່າງຈົບງາມ.
(ນາງ ອໍາໄພພອນ ແກ້ວວິໄລ)