ໃນວັນທີ 04 ກໍລະກົດ 2022 ທີ່ຜ່ານມາ ສະພາປະຊາຊົນແຂວງໄຊສົມບູນ ໄດ້ຈັດກອງປະຊຸມຂຶ້ນ ທີ່ຫ້ອງປະຊຸມຂອງຕົນ ໂດຍພາຍໃຕ້ການເປັນປະທານ ຂອງທ່ານ ຄໍາພູທອນ ວົງພະຈັນ ເລຂາໜ່ວຍພັກ, ຮອງປະທານສະພາປະຊາຊົນແຂວງ ເຂົ້າຮ່ວມມີປະທານ, ຮອງປະທານຄະນະກໍາມະການຈາກ 3 ຄະນະກໍາມະການ, ມີຫົວໜ້າ, ຮອງຫົວໜ້າຂະແໜງ ຕະຫຼອດຮອດພະນັກງານວິຊາການພາຍໃນ ສະພາປະຊາຊົນແຂວງໄຊສົມບູນ ເຂົ້າຮ່ວມຢ່າງພ້ອມພຽງ.
ໃນໂອກາດດັ່ງກ່າວນີ້ ທີ່ປະຊຸມໄດ້ຮັບຟັງການຜ່ານ ມະຕິ ວ່າດ້ວຍ ການແຕ່ງຕັ້ງຄະນະຮັບຜິດຊອບກະກຽມດໍາເນີນ ກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວງໄຊສົມບູນ ຊຸດທີ II ເຊິ່ງນໍາສະເໜີໂດຍ ທ່ານ ຊັນຢາ ແສນຍາກອນ ຫົວໜ້າຂະແໜງຈັດຕັ້ງ-ກວດກາ ແລະ ຊ່ວຍວຽກງານ ສສຊ-ສສຂ ທີ່ຄະນະປະຈໍາສະພາປະຊາຊົນແຂວງໄຊສົມບູນ ໄດ້ເຫັນດີຕົກລົງຄື:
ແຕ່ງຕັ້ງຄະນະຮັບຜິດຊອບຊີ້ນໍາລວມປະກອບມີ ຄະນະປະຈໍາສະພາປະຊາຊົນແຂວງ 7 ທ່ານດ້ວຍກັນ ໂດຍມີສິດຮຽກໂຮມປະຊຸມຄະນະຮັບຜິດຊອບຊີ້ນໍາລວມ ແບ່ງຄວາມຮັບຜິດຊອບໃຫ້ແຕ່ລະ ທ່ານ ຊີ້ນໍາ, ລົງເລິກແຕ່ລະອະນຸກໍາມະການ, ກໍານົດດ້ານຮູບການ, ວິທີການດໍາເນີນກອງປະຊຸມ,ກໍານົດເນື້ອໃນ ແລະ ລາຍງານການເຄື່ອນໄຫວ ການຈັດຕັ້ງປະຕິບັດວຽກງານ ໃຫ້ຂັ້ນເທິງເປັນປົກກະຕິແຕ່ລະໄລຍະ ໃນການກະກຽມ ແລະ ດໍາເນີນກອງປະຊຸມບັນລຸຕາມຈຸດປະສົງ ລະດັບຄາດໝາຍທີ່ວາງໄວ້ ແລະ ມີສິດຂໍຄໍາເຫັນ, ທິດຊີ້ນໍາຈາກຄະນະປະຈໍາສະພາແຫ່ງຊາດ, ການນໍາຂັ້ນແຂວງ, ປະສານສົມທົບກັບບັນດາພະແນກການ, ອົງການ, ກົມກອງ ອ້ອມຂ້າງແຂວງຕ່າງໆ ເພື່ອໃຫ້ຄວາມຮ່ວມມື ແລະ ອໍານວຍຄວາມສະດວກ ຕໍ່ການສະໜອງຂໍ້ມູນຂ່າວສານ.
ຄະນະປະຈໍາສະພາປະຊາຊົນແຂວງໄດ້ແຕ່ງຕັ້ງອະນຸກໍາມະການຊ່ວຍວຽການແຕ່ລະດ້ານມີຄືດັ່ງນີ້:
- ອະນຸກໍາມະການເນື້ອໃນປະກອບມີ 14 ທ່ານ ເຊິ່ງມີໜ້າທີ່ຄື: ກະກຽມເນື້ອໃນເອກະສານຮັບໃຊ້ ກອງປະຊຸມ ໃຫ້ຄົບຖ້ວນຕາມເນື້ອໃນ ທີ່ໄດ້ກໍານົດໄວ້ໃນແຜນການກະກຽມ ແລະ ດໍາເນີນກອງປະຊຸມສະໄໝສາມັນ ເທື່ອທີ 3 ເພື່ອມອບໝາຍວຽກງານຢ່າງເປັນລາຍຫຼັກອັກສອນ, ປຶກສາຫາລືວາງແຜນກາເຄື່ອນໄຫວ ແລະ ປະຕິບັດຈັດຕັ້ງຕາມຄໍາສັ່ງ ແຜນການຂອງຄະນະຊີ້ນໍາກອງປະຊຸມ;
- ອະນຸກໍາມະການເສດຖະກິດປະກອບດ້ວຍ 5 ທ່ານ ເຊິ່ງມີໜ້າທີ່ຄື: ຂຶ້ນແຜນງົບປະມານ, ຂຶ້ນແຜນຊື້ອຸປະກອນຕ່າງໆ ເພື່ອຮັບໃຊ້ກອງປະຊຸມໃຫ້ພຽງພໍ; ເຄື່ອນໄຫວລະດົມການປະກອບສ່ວນດ້ານວັດຖຸ, ປັດໄຈຕ່າງໆ ນໍາບັນດາພາກສ່ວນອົງການຈັດຕັ້ງລັດ, ອົງການຈັດຕັ້ງສັງຄົມ, ເພື່ອອໍານວຍຄວາມສະດວກ ເຮັດໃຫ້ກອງປະຊຸມດໍາເນີນດ້ວຍຜົນສໍາເລັດ ແລະ ສະຫຼຸບສັງລວມງົບປະມານ ແລະ ການປະກອບສ່ວນຕ່າງໆ, ສະຫຼຸບລາຍຮັບ, ລາຍຈ່າຍທີ່ຮັບໃຊ້ກອງປະຊຸມ;
- ອະນຸກໍາມະການກອງເລຂານຸການ ປະກອບມີ 8 ທ່ານ ເຊິ່ງມີໜ້າທີ່ຄື: ປະສານສົມທົບຂໍທິດຊີ້ນໍາຈາກຂັ້ນເທິງ, ຈາກຄະນະຊີ້ນໍາ ແລະ ພົວພັນຂໍ້ມູນນໍາພະແນກການ, ອົງການທີ່ກ່ຽວຂ້ອງພາຍໃນແຂວງ, ບັນດາອານຸກໍາມະການຕ່າງໆ ແລະ ຮັບຜິດຊອບສັງລວມ, ບັນທຶກກອງປະຊຸມ, ສ້າງຮ່າງມະຕິກອງປະຊຸມ, ເຮັດບົດລາຍງານໃຫ້ຂັ້ນເທິງຮັບຊາບ ແລະ ລົງທະບຽນຜູ້ເຂົ້າຮ່ວມແຕ່ລະວັນ;
- ຄະນະຮັບຜິດຊອບວຽກງານໂທລະສັບສາຍດ່ວນ ປະກອບມີ 3 ທ່ານ ເຊິ່ງມີໜ້າທີ່ຄື: ປະຈໍາການເປັນປະຈໍາ ແລະ ຮັບໂທລະສັບສາຍດ່ວນ ໃນກໍລະນີມີປະຊາຊົນໂທເຂົ້າສາຍດ່ວນ; ບັນທຶກຄໍາສະເໜີຂອງປະຊາຊົນຜ່ານໂທລະສັບສາຍດ່ວນ ແລ້ວຈັດສົ່ງເນື້ອໃນ ໃຫ້ຄະນະເລຂານຸການ;
- ຄະນະຮັບຜິດຊອບຈັດພິມເອກະສານ (ແຈ້ງການ, ຊອງບັດເຊີນ, ບັດຕິດເອິກ ແລະ ເອກະສານທີ່ປິ່ນອ້ອມ) ແລະ ຈັດສົ່ງເອກະສານ ປະກອບມີ 12 ທ່ານ ເຊິ່ງມີໜ້າທີ່ຄື: ພິມ ແລະ ກຽມຊອງບັນເຊີນ ຈັດສົ່ງເອກະສານ ຫຼື ແຈ້ງການ ໃຫ້ພະແນກການ, ອົງການ ກົມກອງ ແລະ ເປົ້າໝາຍຜູ້ເຂົ້າຮ່ວມໃຫ້ທັນກັບເວລາອັນສົມຄວນ ແລ້ວໂທເຊັກຜູ້ເຂົ້າຮ່ວມໃຫ້ລະອຽດຈະແຈ້ງ;
- ອະນຸກໍາມະການຮັບຜິດຊອບວຽກງານຈັດສະຖານທີ່ປະດັບປະດາ ແລະ ອະນາໄມ ປະກອບມີ 24 ທ່ານ ເຊິ່ງມີໜ້າທີ່ຄື: ກະກຽມ ແລະ ຈັດສະຖານທີ່ ປະດັບປະດາຫ້ອງປະຊຸມ, ຕິດປ້າຍຄໍຂວັນຫ້ອງປະຊຸມ, ຢາຍນໍ້າ, ອະນາໄມສະຖານທີ່ປະຊຸມ ເພື່ອຮັບປະກັນຄວາມສະອາດງາມຕາ ໃຫ້ແກ່ຜູ້ແທນກອງປະຊຸມ;
- ຄະນະຮັບຜິດຊອບ ຮັບແຂກຈາກສູນກາງ, ສສຊ-ສສຂ ແລະ ແຂກທີ່ມາຈກແຕ່ລະເມືອງ ປະກອບມີ 3 ທ່ານ ເຊິ່ງມີໜ້າທີ່ຄື: ປະສານສົມທົບກັບ ແຂກທີ່ມາຈາກສູນກາງ ແລະ ບັນດາເມືອງ ເພື່ອຮັບປະກັນຄວາມລະອຽດຂອງ ຜູ້ເຂົ້າຮ່ວມກອງປະຊຸມໃຫ້ຈະແຈ້ງ ແລະ ກະກຽມ ພົວພັນສະຖານທີ່ພັກເຊົ່າໃຫ້ແຂກທີ່ມາຈາກສູນກາງ ແລະ ສສຂ ບັນດາເມືອງ;
- ຄະນະຮັບຜິດຊອບຮັບແຂກເຂົ້າຫ້ອງປະຊຸມ ແລະ ລົງທະບຽນ ປະກອບມີ 9 ທ່ານ ເຊິ່ງມີໜ້າທີ່ຄື: ກະກຽມໃບລົງທະບຽນ, ໃຫ້ຜູ້ແທນ ແລະ ແຂກລົງທະບຽກ່ອນເຂົ້າປະຊຸມ ແລະ ຕ້ອນຮັບແຂກ, ແນະນໍາແຂກເຂົ້າຮ່ວມກອງປະຊຸມ, ຊັບຊ້ອນ ແນະນໍາຕາມບ່ອນນັ່ງຂອງແຂກ ເພື່ອຮັບປະກັນລະດັບກຽດສັກສີ ລະຫວ່າງ ການນໍາ-ຂັ້ນວິຊາການ ໃຫ້ຖືກຕາມຄວາມເໝາະສົມ;
- ຄະນະຮັບຜິດຊອບເສີບນໍ້າຊາ-ກາເຟ ແລະ ຄະນະຮັບຜິດຊອບອອກຕະຫຼາດ, ຕົ້ມນໍ່້າ, ຈັດອາຫານວ່າງ ປະກອບມີ 12 ທ່ານ ເຊິ່ງມີໜ້າທີ່ຄື: ເສີບນໍ້າຊາ-ການເຟ ໃຫ້ຜູ້ແທນ ແລະ ການນໍາ ຕາມຄວາມເໝາະສົມ ແລະ ອອກຕະຫຼາດ ເພື່ອຊື້ອາຫານວາງ, ນໍ້າຊາ-ກາເຟ ແລະ ອາຫານປະເພດຕ່າງໆ ເພື່ອຮັບໃຊ້ກອງປະຊຸມ ໃຫ້ສໍາເລັດ;
- ຄະນະຮັບຜິດຊອບວຽກງານສື່ມວນຊົນ ປະກອບມີ 5 ທ່ານ ເຊິ່ງມີໜ້າທີ່ຄື: ກະກຽມບົດຖະແຫລ່ງຂ່າວໃຫ້ແກ່ ປະທານ ຫຼື ຄະນະເລຂາທິການ ກ່ອນ ແລະ ຫຼັງ ກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວງໄຊສົມບູນ ເພື່ອແຈ້ງຂ່າວຜ່ານສື່ມວນຊົນ, ຖ່າຍທໍາ VDO, ພາບໜິ້ງໃນໄລຍະ ທີ່ຜູ້ແທນ ແລະ ແຂກຜູ້ເຂົ້າຮ່ວມກອງປະຊຸມ ຂຶ້ນລາຍງານ ແລະ ປະຄໍາເຫັນຕ່າງໆ;
- ອະນຸກໍາມະການຮັບຜິດຊອບວຽກງານ ປກຊ-ປກສ ແລະ ວຽກງານຮັກສາສຸຂະພາບ ປະກອບມີ 8 ສະຫາຍ ເຊິ່ງມີໜ້າທີ່ ສົມທົບກັບກໍາລັງ ປກຊ-ປກສ ແຂວງ ຕາມການສະເໜີຂອງຄະນະເລຂາທິການ ເພື່ອຮັບປະກັນຄວາມເປັນລະບຽບຮຽບຮ້ອຍ, ວາງແຜນປ້ອງກັນເວນຍາມໃນມື້ກະກຽມ ແລະ ດໍາເນີນກອງປະຊຸມ ຕາມຄວາມເໝາະສົມ ເພື່ອຮັບປະກັນຄວາມປອດໄພ ແລະຄວາມ ສະຫງົບຮ້ອຍສວນຮ້ອຍ ແລະ ສົມທົບກັບພະແນກສາທາລະນະສຸກແຂວງ ໃນການຂໍວິຊາການ ດ້ານການແພດ ແລະ ຂຶ້ນແຜນໃນການຈັດຊື້ປະເພດຢາ, ກະກຽມອຸປະກອນປ້ອງກັນໂຄວິດ ເພື່ອຮັບໃຊ້ກອງປະຊຸມ ແລະ ນອກນັ້ນ ຍັງໄດ້ມີຂະບວນການກິລາ ເຊິ່ງປະກອບມີ 5 ທ່ານ ມີໜ້າທີ່ຄື: ກະກຽມ ແລະຈັດການແຂ່ງຂັນກິລາປະເພດຕ່າງໆ ແລະ ສ້າງຂະບວນການອອກແຮງງານອະນາໄມ ໃນບໍລິເວນສໍານັກງານອົງການປົກຄອງເມືອງ ເພື່ອເປັນການຂໍ່ານັບຮັບຕ້ອນ ໃຫ້ແກ່ກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວງໄຊສົມບູນໃຫ້ມີຄວາມຄຶກຄື້ນ.
(ນາງ ອໍາໄພພອນ ແກ້ວວິໄລ)