ໂດຍປະຕິບັດຕາມແຈ້ງການຂອງຄະນະເລຂາທິການສະພາແຫ່ງຊາດ ສະບັບເລກທີ 160/ຄລສ.ກກໝ, ລົງວັນທີ 25 ເມສາ 2023 ວ່າດ້ວຍ ການທາບທາມຄໍາເຫັນໃສ່ຮ່າງກົດໝາຍ 11 ສະບັບ ທີ່ຈະນໍາເຂົ້າພິຈາລະນາ ຮັບຮອງໃນກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ກອງປະຊຸມແນະນໍາການທາບທາມຄໍາເຫັນຂອງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ ທົ່ວປະເທດ ໃສ່ຮ່າງກົດໝາຍ ຈໍານວນ 11 ສະບັບ ໃນຄັ້ງວັນທີ 25 ເມສາ 2023 ທີ່ຜ່ານມາ ເຫັນດີໃຫ້ສະພາປະຊາຊົນແຂວງໃນຂອບເຂດທົ່ວປະເທດ ຈັດກອງປະຊຸມທາບທາມຮ່າງກົດໝາຍ 11 ສະບັບ ທີ່ຈະນໍາເຂົ້າພິຈາລະນາ ຮັບຮອງໃນກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ໃຫ້ສໍາເລັດກ່ອນວັນທີ 5 ພຶດສະພາ 2023.
ດັ່ງນັ້ນ, ສະພາປະຊາຊົນແຂວງ ເຊກອງ ຈິ່ງໄດ້ຈັດກອງປະຊຸມທາບທາມຮ່າງກົດໝາຍຈໍານວນ 11 ສະບັບຂຶ້ນ ໃນຕອນເຊົ້າວັນທີ 28 ເມສາ 2023 ໂດຍການເປັນປະທານຂອງ ທ່ານ ດົງເພັດ ພະຍົນ ຮອງເລຂາພັກແຂວງ, ປະທານສະພາປະຊາຊົນແຂວງ, ມີບັນດາທ່ານຄະນະປະຈໍາພັກແຂວງ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 16, ສະມາຊິກສະພາປະຊາຊົນແຂວງ ພ້ອມດ້ວຍແນກການ ແລະ ຂະແໜງການທີ່ກ່ຽວຂ້ອງເຂົ້າຮ່ວມ.
ເຊິ່ງຮ່າງກົດໝາຍທີ່ນໍາມາທາບທາມໃນຄັ້ງນີ້ ປະກອບມີ: ຮ່າງກົດໝາຍວ່າດ້ວຍ ການຊົດເຊີຍຄ່າເສຍຫາຍຈາກລັດ(ສ້າງໃໝ່); ຮ່າງກົດໝາຍວ່າດ້ວຍ ການປົກຄອງ (ສ້າງໃໝ່); ຮ່າງກົດໝາຍວ່າດ້ວຍ ການຈັດຫາງານ (ສ້າງໃໝ່); ຮ່າງກົດໝາຍວ່າດ້ວຍ ອາກອນທີ່ດິນ (ສ້າງໃໝ່); ຮ່າງກົດໝາຍວ່າດ້ວຍ ສາທາລະນະສຸກ (ສ້າງໃໝ່); ຮ່າງກົດໝາຍວ່າດ້ວຍ ການຈັດພິມຈໍາໜ່າຍ (ປັບປຸງ); ຮ່າງກົດໝາຍວ່າດ້ວຍ ສັດນໍ້າ ແລະ ການປະມົງ (ປັບປຸງ); ຮ່າງກົດໝາຍວ່າດ້ວຍ ສັດປ່າ (ປັບປຸງ); ຮ່າງກົດໝາຍວ່າດ້ວຍ ການປົກປ້ອງສິດ ແລະ ຜົນປະໂຫຍດຂອງເດັກ (ປັບປຸງ); ຮ່າງກົດໝາຍວ່າດ້ວຍ ທະນາຄານທຸລະກິດ (ປັບປຸງ) ແລະ ຮ່າງກົດໝາຍວ່າດ້ວຍ ສານທະຫານ (ປັບປຸງ).
ໃນກອງປະຊຸມຜູ້ເຂົ້າຮ່ວມໄດ້ສຸມທຸກສະຕິປັນຍາເຂົ້າໃນການຄົ້ນຄວ້າປະກອບຄໍາເຫັນຕໍ່ຮ່າງກົດໝາຍດັ່ງກ່າວ ເພື່ອແນໃສ່ເຮັດໃຫ້ເນືຶ້ອໃນຄົບຖ້ວນ, ສົມບູນ, ຮັດກຸມ ແລະ ສອດຄ່ອງກັບສະພາບການຂະຫຍາຍຕົວຂອງເສດຖະກິດ-ສັງຄົມ ແລະ ມີຄວາມຖືກຕ້ອງສອດຄ່ອງກັບສະພາບຄວາມເປັນຈິງ, ສາມາດນໍາເຂົ້າພິຈາລະນາຮັບຮອງໃນກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ທີ່ຈະໄດ້ໄຂຂຶ້ນໃນໝໍ່ໆນີ້, ພ້ອມທັງຮັບປະກັນການຕົກລົງບັນຫາຢ່າງມີຄວາມເປັນເອກະພາບ, ສາມາດເປັນບ່ອນອີງໃນການຈັດຕັ້ງປະຕິບັດວຽກງານຕົວຈິງ.ກອງປະຊຸມຈະໄດ້ດໍາເນີນໄປເປັນເວລາ 04 ວັນເຕັມ ນັບແຕ່ວັນທີ 28 ເມສາ ແລະ ວັນທີ 02-04 ພຶດສະພາ 2023 ນີ້ ຈິ່ງຈະສໍາເລັດ.
#ໂດຍ: ອາລົມດີ.