ໃນຕອນເຊົ້າຂອງວັນທີ 18 ຕຸລາ 2023 ສະພາປະຊາຊົນແຂວງຫລວງນໍ້າທາ ໄດ້ເປີດກອງປະຊຸມ ປະເມີນຜົນການຈັດຕັ້ງປະຕິບັດວຽກງານ ພະນັກງານ-ລັດຖະກອນ ປະຈໍາປີ 2023 ຂື້ນທີຫ້ອງປະຊຸມຂອງ ສະພາປະຊາຊົນແຂວງ ໂດຍການເປັນປະທານ ຂອງທ່ານ ຂັດ ໝັ້ນທະໄລ ຮອງເລຂາທິການສະພາປະຊາຊົນແຂວງ, ມີຫົວໜ້າຂະແໜງ, ຮອງຫົວໜ້າຂະແໜງ ແລະ ພະນັກງານວິຊາການທີ່ຂຶ້ນກັບຄະນະເລຂາທິການເຂົ້າຮ່ວມຢ່າງພ້ອມພຽງ

ພ້ອມດຽວກັນນັ້ນ 3 ຄະນະກຳມະການທີ່ຂຶ້ນກັບສະພາປະຊາຊົນແຂວງຄືຄະນະກຳມະການເສດຖະກິດ, ແຜນານ ແລະ ການເງິນ; ຄະນະກຳມະການວັດທະນະທຳສັງຄົມ ແລະ ບັນດາເຜົ່າ; ຄະນະກຳມະການຍຸຕິທຳ ແລະ ປກຊ-ປກສ ກໍໄດ້ເປີດກອງປະຊຸມ ປະເມີນຜົນການຈັດຕັ້ງປະຕິບັດວຽກງານ ພະນັກງານ-ລັດຖະກອນ ປະຈໍາປີ 2023 ຂື້ນທີຫ້ອງປະຊຸມຂອງ ສະພາປະຊາຊົນແຂວງ ໂດຍການເປັນປະທານຂອງ ທ່ານ ຄຳພອນ ເຕີ່ນຈະເລີນ ກຳມະການຄະນະປະຈຳສະພາປະຊາຊົນແຂວງ ປະທານຄະນະກຳມະການເສດຖະກິດແຜນການ ແລະ ການເງິນ, ເຂົ້າຮ່ວມມີຫົວໜ້າຂະແໜງ, ຮອງຂະແໜງ ແລະ ວິຊາການທີ່ຂຶ້ນກັບ 3 ຄະນະນຳມະການເຂົ້າຮ່ວມຢ່າງພ້ອມພຽງ.

ກອງປະຊຸມໄດ້ຮັບຟັງການເຜີຍແຜ່, ເຊື່ອມຊືມບາງມາດຕາຂອງດໍາລັດ 300/ລບ ວ່າດ້ວຍການປະເມີນຜົນການປະຕິບັດວຽກງານຂອງ ພະນັກງານ-ລັດຖະກອນ; ພ້ອມດຽວກັນນັ້ນ ພະນັກງານ-ລັດຖະກອນແຕ່ລະທ່ານໄດ້ຜັດປ່ຽນກັນຂຶ້ນຜ່ານໃບເກັບກ່ຽວຜົນສຳເລັດໃນການຈັດຕັ້ງປະຕິບັດວຽກງານໃນຮອບ 1 ປີຜ່ານມາ ເພື່ອຕີລາຄາດ້ານຄຸນທາດການເມືອງ ແລະ ຄຸນສົມບັດສິນທຳປະຕິວັດ,​ດ້ານຄວາມຮູ້ຄວາມສາມາດ ແລະ ປະສົບການ ແລະ  ດ້ານຜົນສຳເລັດໃນການຈັດຕັ້ງປະຕິບັດໜ້າທີ່ວຽກງານ, ທັງນີ້ກໍເພື່ອຕີລາຄາດ້ານດີ ແລະ ຂໍ້ຄົງຄ້າງ, ວິທີປັບປຸງ ແລະ ແກ້ໄຂ, ການໃຫ້ຄະແນນ ແລະ ຈັດປະເພດຕົນເອງ. ພ້ອມນັ້ນຍັງໄດ້ຕີລາຄາ ແລະ ໃຫ້ຄະແນນໝູ່ຄະນະ ແລະ ເພື່ອນຮ່ວມງານ.

ໂດຍ ອຳພອນ ສີປະເສີດ