ຕອນເຊົ້າຂອງວັນທີ 8 ສິງຫາ 2023 ນີ້ ສະພາປະຊາຊົນແຂວງຫລວງນໍ້າທາ ພ້ອມດ້ວຍການນຳຂອງແຂວງ ໄດ້ພ້ອມກັນວາງກະຕ່າດອກໄມ້ຢູ່ຕໍ່ໜ້າອານຸສາວະລີປະທານໄກສອນ ພົມວິຫານ ແລະ ວາງພວງມາລາຢູ່ອານຸສາວະລີນັກຮົບນິລະນາມແຂວງຫລວງນໍ້າທາ.
ຈາກນັ້ນໄດ້ຈັດພິທີປາຖະກະຖາວັນປະກາດໃຊ້ລັດຖະທຳມະນູນ ຄົບຮອບ 32 ປີ ວັນທີ ( 15 ສິງຫາ 1991-15 ສິງຫາ 2023 ) ແລະ ວັນສ້າງຕັ້ງສະພາປະຊາຊົນແຂວງ ຄົບຮອບ 45 ປີ ( ວັນທີ 4 ສິງຫາ 1975 – 4 ສິງຫາ 2023 ) ຢູ່ທີ່ຫໍວັດທະນະທໍາແຂວງ ໂດຍການໃຫ້ກຽດປາຖະກະຖາ ໂດຍ ທ່ານ ຄໍາຟອງ ອິນມານີ ຮອງເລຂາພັກແຂວງ ປະທານສະພາປະຊາຊົນແຂວງ ໃຫ້ກຽດເຂົ້າຮ່ວມຮັບຟັງໂດຍຄະນະນຳຂອງແຂວງ, ອະດີດການນຳຂອງແຂວງ, ພະນັກງງານປະຕິວັດອະວຸໂສບຳນານ, ອະດີດສະມາຊິກສະພາແຫ່ງຊາດ, ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ, ສອງກຳລັງປ້ອງກັນຊາດ, ປ້ອງກັນຄວາມສະຫງົບ ພ້ອມດ້ວຍພະນັກງານອ້ອມຂ້າງແຂວງເຂົ້າຮ່ວມຮັບຟັງທັງໝົດ 600 ກວ່າທ່ານ.
ພາຍຫຼັງປະເທດຊາດໄດ້ຮັບການປົດປ່ອຍຢ່າງສົມບູນ ແລະ ສະຖາປະນາ ສປປ ລາວ ຂຶ້ນໃນວັນທີ 2 ທັນວາ 1975 ເຊິ່ງແມ່ນຜົນງານ ແລະ ໄຊຊະນະອັນຍິ່ງໃຫ່ຍທີ່ສຸດ ຂອງປວງຊົນລາວບັນດາເຜົ່າທີ່ຍາດມາໄດ້; ເປັນການໄຂສັງກາດໃໝ່, ສັງກາດທີ່ປະເທດຊາດມີເອກະລາດ ແລະ ປະຊາຊົນມີອິດສະລະພາບຢ່າງແທ້ຈິງ ພາຍໃຕ້ການຊີ້ນຳ-ນຳພາຂອງພັກ ປະຊາຊົນ ປະຕິວັດລາວ. ລັດຖະທໍາມະນູນ ແຫ່ງ ສປປ ລາວ ໄດ້ຖືກຮັບຮອງເອົາໃນກອງປະຊຸມສະໄໝສາມັນເທື່ອ ທີ 6 ຂອງສະພາປະຊາຊົນສູງສຸດ ຊຸດທີ II ໃນປີ 1991 ແລະ ໄດ້ປະກາດໃຊ້ຢ່າງເປັນທາງການໃນວັນທີ 15 ສິງຫາ 1991. ມາເຖິງປັດຈຸບັນ ລັດຖະທໍາມະນູນແຫ່ງ ສປປ ລາວ ໄດ້ມີການປັບປຸງມາແລ້ວ 2 ຄັ້ງ ຄື: ຄັ້ງທີ 1: ໃນປີ 2003 ກອງປະຊຸຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ V ໄດ້ຮັບຮອງເອົາລັດຖະທໍາມະນູນສະບັບປັບປຸງ ຊຶ່ງປະກອບມີ 11 ໝວດ 98 ມາດຕາ. ຄັ້ງທີ 2: ປີ 2015 ກອງປະຊຸມສະໄໝສາມັນ ເທື່ອທີ 10 ຂອງສະພາແຫ່ງຊາດ ຊຸດທີ VII ໄດ້ຮັບຮອງເອົາ ລັດຖະທໍາມະນູນສະບັບປັບປຸງ ປະກອບມີ 14 ໝວດ, 119 ມາດຕາ ຊຶ່ງໄດ້ເຮັດໃຫ້ ລັດຖະທໍາມະນູນ ຂອງ ສປປ ລາວ ມີເນື້ອໃນຄົບຖ້ວນ ແລະ ສົມບູນກວ່າເກົ່າ.
ພ້ອມນັ້ນໄດ້ຮັບຟັງ ມູນເຊື້ອ ກ່ຽວກັບວັນສ້າງຕັ້ງສະພາປະຊາຊົນຂັ້ນແຂວງ ຄົບຮອບ 45 ປີ ໂດຍ ອີງໃສ່ການຂະຫຍາຍຕົວທາງດ້ານເສດຖະກິດ-ສັງຄົມ, ຄວາມຮຽກຮ້ອງຕ້ອງການໜ້າທີ່ການເມືອງໃນໄລຍະໃໝ່ ແລະ ທັງເປັນການຮັບປະກັນ ໃຫ້ແກ່ການຈັດຕັ້ງປະຕິບັດໜ້າທີ່ການ ເມືອງ ໃນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ດ້ວຍກົດໝາຍ, ການເຊື່ອມໂຍງກັບພາກພື້ນ ແລະ ສາກົນ, ທັງເປັນການມອບສິດ ອໍານາດໃຫ້ທ້ອງຖິ່ນເປັນຜູ້ຈັດຕັ້ງປະຕິບັດໃຫ້ຫຼາຍຂຶ້ນ. ກົມການເມືອງສູນກາງພັກ ຈຶ່ງໄດ້ຕົກລົງ ສ້າງຕັ້ງສະພາປະຊາຊົນຂັ້ນແຂວງ ຊຸດທີ I ຂຶ້ນໃນຂອບເຂດທົ່ວປະເທດ ໂດຍລັດຖະທໍາມະນູນ ສະບັບປັບປຸງ ປີ 2015 ກໍໄດ້ກໍານົດແຈ້ງ ກ່ຽວກັບການຈັດຕັ້ງ ແລະ ການເຄື່ອນໄຫວຂອງສະພາປະຊາຊົນທ້ອງຖິ່ນ ຊຶ່ງປະກອບມີ 3 ພາລະບົດບາດ ຄື: ສິດ ແລະ ໜ້າທີ່ດ້ານນິຕິກໍາ; ດ້ານການຕົກລົງບັນຫາພື້ນຖານຂອງທ້ອງຖິ່ນ; ດ້ານການຕິດຕາມກວດກາ ແລະ ກົດໝາຍວ່າດ້ວຍສະພາປະຊາຊົນຂັ້ນແຂວງ ສະບັບປີ 2015 ມາດຕາ 88 ໄດ້ກໍານົດເອົາ ວັນທີ 4 ສິງຫາ 1978 ເປັນວັນສ້າງຕັ້ງສະພາປະຊາຊົນຂັ້ນແຂວງເປັນຕົ້ນມາ. ພາຍຫຼັງສ້າງຕັ້ງແລ້ວ ສະພາປະຊາຊົນແຂວງຊຸດທໍາອິດ ກໍໄດ້ເອົາໃຈໃສ່ຈັດຕັ້ງປະຕິບັດ 3 ພາລະບົດບາດ, ເປັນຕົວແທນ ແຫ່ງສິດ ແລະ ຜົນປະໂຫຍດຂອງປະຊາຊົນ ບັນດາເຜົ່າ, ສະພາປະຊາຊົນຂັ້ນແຂວງ ຊຸດທີ I ປະກອບດ້ວຍສະມາຊິກສະພາປະຊາຊົນແຂວງ ຈໍານວນ 16 ທ່ານ.
ໃນໂອກາດສະເຫຼີມສະຫຼອງສອງວັນສຳຄັນດັ່ງກ່າວ ໃຫ້ມີເນື້ອໃນ ແລະ ເປັນຂະບວນຟົດຟຶ້ນ, ເປັນການສົ່ງເສີມກິລາ ແລະ ເຕົ້າໂຮມຄວາມສາມັກຄີ ຄະນະປະຈຳສະພາປະຊາຊົນແຂວງໄດ້ຕົກລົງສ້າງແຜນ ແລະ ແຕ່ງຕັ້ງຄະນະຮັບຜິດຊອບໂດຍກົງ ແລະ ປະສານສົມທົບກັບກັບພະແນກສຶກສາ ແລະ ກິລາແຂວງ ເພື່ອຈັດການແຂ່ງຂັນກິລາເປຕັງ ຊິງຂັນປະທານສະພາປະຊາຊົນແຂວງ ເຊິ່ງມີທັງໝົດ 47 ທີມ, ທີມຍິງ 18 ທີມ ເຊິ່ງຜົນການແຂ່ງຂັນແມ່ນທີມຊາຍທີ 1 ໄດ້ແກ່ທີມບໍລິສັດກໍ່ສ້າງໄຊສົມບູນ ແລະ ທີມຍິງທີ 1 ໄດ້ແກ່ທີມ ປກສ ເມືອງຫລວງນໍ້າທາ ໄດ້ຮັບຂັນ 1 ໜ່ວຍ ພ້ອມດ້ວຍເງິນສົດ 2,000,000 ກີບ.
ໂດຍ ນາງ ອຳພອນ ສີປະເສີດ