ຕອນບ່າຍຂອງວັນທີ 23 ມິຖຸນາ 2022 ຢູ່ທີ່ຫ້ອງປະຊຸມຂອງສະພາປະຊາຊົນແຂວງຫລວງນໍ້າທາ ໄດ້ຈັດພິທີມອບ-ຮັບວຽກງານຂອງຄະນະເລຂາທິການ ໂດຍການເປັນປະທານຂອງ ທ່ານ ນາງ ອຸ່ນຫລ້າ ອ້ຽງລໍລາດ ກຳມະການພັກແຂວງ ຮອງປະທານສະພາປະຊາຊົນແຂວງ, ເຂົ້າຮ່ວມມີຄະນະປະຈຳສະພາປະຊາຊົນແຂວງ, ຄະນະເລຂາທິການ, ຫົວໜ້າ, ຮອງຫົວໜ້າຂະແໜງ ພ້ອມດ້ວຍພະນັກງານ-ລັດຖະກອນ ເຂົ້າຮ່ວມທັງໝົດ 32 ທ່ານ, ຍິງ 13 ທ່ານ.

ໃນພິທີໄດ້ຮັບຟັງການຜ່ານຂໍ້ຕົກລົງຂອງເຈົ້າແຂວງ ສະບັບເລກທີ 343/ຈຂ, ລົງວັນທີ 06 ມິຖຸນາ 2022 ວ່າດ້ວຍການອະນຸມັດໃຫ້ພະນັກງານ-ລັດຖະກອນ ອອກພັກຜ່ອນ ຮັບນະໂຍບາຍອຸດໜຸນນ-ບຳນານ, ເຊິ່ງເຈົ້າແຂວງໆຫລວງນ້ຳທາໄດ້ຕົກລົງ ອະນຸມັດໃຫ້ທ່ານ ປະລິນຍາເອກ ໄຊສົງຄາມ ພີມະສອນ ອອກພັກຜ່ອນຮັບນະໂຍບາຍອຸດໜຸນບຳນານ
ພ້ອມນັ້ນ ທ່ານ ປະລິນຢາເອກ ໄຊສົງຄາມ ພີມມະສອນ ຮອງເລຂາທິການສະພາປະຊາຊົນແຂວງ ໄດ້ຂຶ້ນຜ່ານບົດລາຍງານການເຄື່ອນໄຫວວຽກງານຂອງຕົນ ພາຍໃນສະພາປະຊາຊົນແຂວງຫລວງນໍ້າທາ ໃນໄລຍະຜ່ານມາ.
ຫລັງຈາກນັ້ນ ໄດ້ເຊັນບົດບັນທຶກມອບ-ຮັບໜ້າທີ່ວຽກງານຂອງຄະນະເລຂາທິການ ສະພາປະຊາຊົນແຂວງ ຢ່າງເປັນທາງການ ລະຫວ່າງທ່ານ ປະລິນຍາເອກ ໄຊສົງຄາມ ພິມມະສອນ ແລະ ທ່ານ ມີໄຊ ມີວິໄລ ເລຂາທິການສະພາປະຊາຊົນແຂວງ.

ໃນຕອນທ້າຍພິທີ ທ່ານ ນາງ ອຸ່ນຫລ້າ ອ້ຽງລໍລາດ ກຳມະການພັກແຂວງ ຮອງປະທານສະພາປະຊາຊົນແຂວງ ໄດ້ມີຄຳເຫັນໂອ້ລົມ ເຊິ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານຂອງຜູ້ກ່ຽວໃນໄລຍະຜ່ານມາ ຊຶ່ງມີຜົນງານອັນສຳເລັດຫລາຍດ້ານ ໂດຍສະເພາະ ໄດ້ເອົາໃຈໃສ່ຊີ້ນຳໆພາ ພະນັກງານ-ລັດຖະກອນໃນຂົງເຂດທີຕົນຮັບຜິດຊອບສາມາດຈັດຕັ້ງປະຕິບັດວຽກງານໄດ້ຮັບຜົນສຳເລັດຕາມລະດັບຄາດໝາຍ, ເອົາໃຈໃສ່ປັບປຸງແບບແຜນວິທີເຮັດວຽກ, ປະຕິບັດໜ້າທີ່ເປັນເສນາທິການໃຫ້ແກ່ສະພາປະຊາຊົນແຂວງ ເຊິ່ງເປັນການປະກອບສ່ວນ ສຸມທຸກສະຕິປັນຍາເຂົ້າໃນວຽກງານສ້າງສາ ແລະ ພັດທະນາປະເທດຊາດ.
ພາບແລະຂ່າວໂດຍນາງ ອຳພອນ ສີປະເສີດ