ຕອນເຊົ້າວັນທີ 24 ພະຈິກ 2022 ຜ່ານມານີ້ ສະພາປະຊາຊົນແຂວງຫລວງນ້ຳທາ ໄດ້ເປີດກອງປະຊຸມດຳເນີນຊີວິດການເມືອງຂອງໜ່ວຍພັກ ຂຶ້ນຢ່າງເປັນທາງການ ທີ່ຫ້ອງປະຊຸມສະພາປະຊາຊົນແຂວງ ພາຍໃຕ້ການເປັນປະທານຂອງສະຫາຍ ນາງ ອຸ່ນຫລ້າ ອ້ຽງລໍລາດ ກຳມະການພັກແຂວງ ຮອງປະທານສະພາປະຊາຊົນແຂວງ ເລຂາໜ່ວຍພັກສະພາປະຊາຊົນ ມີບັນດາສະຫາຍຕາງໜ້າຈາກອົງການກວດກາ, ຄະນະຈັດຕັ້ງ ແລະ ຄະນະໂຄສະນາອົບຮົມແຂວງ ພ້ອມດ້ວຍສະມາຊິກພັກພາຍໃນສະພາປະຊາຊົນແຂວງເຂົ້າຮ່ວມ 27 ສະຫາຍ, ຍິງ 10 ສະຫາຍ.
ໃນວາລະກອງປະຊຸມໄດ້ຮັບຟັງການຜ່ານຮ່າງບົດປະເມີນການກໍ່ສ້າງພັກ, ປອດໃສ, ເຂັ້ມແຂງ, ໜັກແໜ້ນ ປະຈຳປີ 2022 ຂອງໜ່ວຍພັກສະພາປະຊາຊົນແຂວງ ແລະ ຜ່ານບົດສຳຫລວດຕົນເອງ ເພື່ອຕີລາຄາຄືນແຕ່ລະດ້ານຂອງສະມາຊິກພັກ, ຊຶ່ງໜ່ວຍພັກສະພາປະຊາຊົນແຂວງ ເປັນໜ່ວຍພັກເອກະລາດ ພາຍໃຕ້ການຊີ້ນຳ-ນຳພາໂດຍກົງຂອງຄະນະພັກພັກແຂວງ, ມີສະມາຊິກພັກທັງໝົດ 34 ສະຫາຍ, ຍິງ 11 ສະຫາຍ ກວມເອົາ 72,34% ຂອງພະນັກງານລັດຖະກອນທັງໝົດ, ໃນ ໄລຍະ 1 ປີຜ່ານມາ ຄະນະໜ່ວຍພັກສະພາປະຊາຊົນແຂວງ ໄດ້ເອົາໃຈໃສ່ສຶກສາອົບຮົມການເມືອງແນວຄິດໃຫ້ສະມາຊິກພັກ, ພະນັກງານລັດຖະກອນໂດຍຮ່ວມຊີວິດພັກປະຈຳເດືອນ, ເຮັດໃຫ້ສະມາຊິກພັກ-ພະນັກງານລັດຖະກອນ, ມີຄຸນທາດການເມືອງໜັກແໜ້ນ, ມີຄວາມຈົງຮັກພັກດີເຊື່ອໝັ້ນຕໍ່ການນຳພາຂອງພັກ, ຕັ້ງໜ້າປະຕິບັດໜ້າທີ່ວຽກງານວິຊາສະເພາະດ້ວຍຄວາມຮັບຜິດຊອບສູງ ແລະ ມີຜົນສຳເລັດຕາມລຳດັບຄາດໝາຍ, ພ້ອມດຽວກັນສະມາຊິກພັກແຕ່ລະສະຫາຍໄດ້ຜ່ານບົດສຳຫລວດຂອງຕົນ, ປະກອບຄຳຄິດເຫັນຢ່າງກົງໄປກົງມາ ເພື່ອຕີລາຄາຄືນແຕ່ລະດ້ານຄື: ຄຸນທາດການເມືອງ, ຄຸນສົມບັດສິນທຳປະຕິວັດ, ແນວຄິດ, ສະຕິຕໍ່ການຈັດຕັ້ງ ແລະ ລະບຽບວິໄນຂອງພັກ, ແບບແຜນນຳພາ ແລະ ວິທີເຮັດວຽກ, ຄວາມຮັບຜິດຊອບຕໍ່ໜ້າທີ່ການເມືອງ ແລະ ພ້ອມກັນໃຫ້ຄະແນນຕົນເອງ ແລະ ຄະແນນປິດລັບເຊິ່ງກັນ ແລະ ກັນ, ທັງນີ້ ກໍ່ເພື່ອຈະສືບຕໍ່ສະຫລູບຜົນການດຳເນີນຊີວິດການເມືອງຄັ້ງນີ້ ໃຫ້ໄດ້ປະກາດຮັບຮອງໃນຂັ້ນຕໍ່ໄປ.
ໂດຍ: ອາເມີງ ວີແຄລູ