ເພື່ອຮັບປະກັນໃຫ້ເນື້ອໃນຂອງຮ່າງກົດໝາຍ ຂອງສະພາແຫ່ງຊາດ ຈຳນວນ 10 ສະບັບໃຫ້ມີເນື້ອໃນຄົບຖ້ວນ, ຮັດກຸມ ແລະ ສອດຄ່ອງກັບສະພາບການຂະຫຍາຍຕົວຂອງເສດຖະກິດ-ສັງຄົມໃນປັດຈຸບັນ, ເພື່ອປະກອບຄຳເຫັນຕໍ່ການປັບປຸງຮ່າງກົດໝາຍວ່າດ້ວຍສະພາແຫ່ງຊາດ ຈຳນວນ 10 ສະບັບໃຫ້ເປັນລະບົບ, ຄົບຖ້ວນ, ຮັດກຸມ ແລະ ສາມາດປະຕິບັດໄດ້ຢ່າງມີປະສິດທິພາບ, ປະສິດທິຜົນ.

ກອງປະຊຸມທາບທາມຮ່າງກົດໝາຍຂອງສະພາແຫ່ງຊາດ ຈຳນວນ  10 ສະບັບ ເຊິ່ງປະກອບມີ  ຮ່າງກົດໝາຍວ່າດ້ວຍການສົ່ງເສີມການລົງທຶນ; ຮ່າງກົດໝາຍວ່າດ້ວຍການປົກປັກຮັກສາສິ່ງແວດລ້ອມ; ຮ່າງກົດໝາຍວ່າດ້ວຍອາກອນມູນຄ່າເພີ່ມ; ຮ່າງກົດໝາຍວ່າດ້ວຍການຕ້ານການສໍ້ລາດບັງຫຼວງ; ຮ່າງກົດໝາຍວ່າດ້ວຍການຕ້ານການສະກັດກັ້ນການຟອກເງີນ ແລະ ການສະໜອງທຶນໃຫ້ແກ່ການກໍ່ການຮ້າຍ; ຮ່າງກົດໝາຍວ່າດ້ວຍການທ່ອງທ່ຽວ; ຮ່າງກົດໝາຍວ່າດ້ວຍສະຫະກອນ(ສ້າງໃໝ່);ຮ່າງກົດໝາຍວ່າດ້ວຍຊັບພະຍາກອນທີ່ເປັນຢາ (ສ້າງໃໝ່); ຮ່າງກົດໝາຍວ່າດ້ວຍການກັນ ແລະ ຄວບຄຸມເຊື້ອເຮສໄອວີ; ຮ່າງກົດໝາຍວ່າດ້ວຍການສະກັດກັ້ນ ແລະ ຕ້ານອັກຄີໄພ, ໄດ້ຈັດຂຶ້ນໃນວັນທີ 20-21 ພຶດສະພາ 2024 ທີ່ສະໂມສອນຂອງແຂວງ ໂດຍການເປັນປະທານຮ່ວມຂອງທ່ານ ກົງເພັດ ແກ້ວບົວພາ ກຳມະການພັກແຂວງ ຮອງປະທານສະພາປະຊາຊົນແຂວງ, ມີບັນດາທ່ານ ສສຊ ປະຈໍາເຂດເລືອກຕັ້ງ, ສະມາຊິກສະພາປະ ຊາຊົນແຂວງ , ອະດິດສສຊ, ຫົວໜ້າ-ຮອງຫົວໜ້າພະແນກການຂອງແຂວງ, ຂົງເຂດຕຸລາການ, ຄະນະນໍາຈາກ 2 ກໍາລັງປ້ອງກັນຊາດ-ປ້ອງກັນຄວາມສະຫງົບ, ອົງການຈັດຕັ້ງມະຫາຊົນ, ລັດວິສາຫະກິດ, ບັນດາທະນາຄານ ແລະ ພະນັກງານທີ່ກ່ຽວຂ້ອງເຂົ້າຮ່ວມທັງໝົດ 80 ກວ່າທ່ານ.
ໃນກອງປະຊຸມໄດ້ຮັບຟັງການສະເໜີເນື້ອໃນໂດຍຫຍໍ້ຂອງຮ່າງກົດໝາຍທີ່ສ້າງ ແລະ ປັບປຸງ, ຫລັງຈາກນັ້ນປະທານກອງປະຊຸມໄດ້ມີຄຳເຫັນເຈາະຈີ້ມແຕ່ລະຮ່າງກົດໝາຍ ເພື່ອໃຫ້ບັນດາທ່ານຜູ້ແທນກອງປະຊຸມໄດ້ປະກອບຄຳເຫັນໃສ່ແຕ່ລະຮ່າງກົດໝາຍ

ພ້ອມດຽວກັນ ຜູ້ແທນເຂົ້າຮ່ວມກອງປະຊຸມໄດ້ພ້ອມໃກັນຄົ້ນຄວ້າ ແລະ ປະກອບຄຳຄິດເຫັນຕໍ່ຮ່າງກົດໝາຍ 10 ສະບັບ ຢ່າງມີຈຸດສຸມ ເພື່ອເຮັດໃຫ້ເນື້ອໃນຂອງກົດໝາຍມີເນື້ອໃນຖຶກຕ້ອງສອດຄ່ອງກັບຄວາມເປັນຈິງ, ສາມາດຮັບຮອງເອົາ ແລະ ນຳໄປຈັດຕັ້ງປະຕິບັດໃຫ້ມີຄຸນນະພາບ ແລະ ກອງປະຊຸມຈະໄດ້ດຳເນີນໄປເປັນເວລາ 2 ວັນຈື່ງສຳເລັດ.

ໂດຍ ນາງ ອຳພອນ ສີປະເສີດ